ސިއްހީ ހިދުމަތްތެރިން ގޭގެއަށް ގޮސް، މައުލޫމާތު ދިނުމަށް ރައީސް އިލްތިމާސްކުރައްވައިފި

ރަށްރަށުގެ އާއްމު ސިއްހީ ހިދުމަތްތެރިން، ގަވައިދުން ގޭގެއަށް ޒިޔާރަތްކޮށް، ވަކިވަކި ފަރުދުންގެ ހާލުއަހުވާލު ބަލައި، ސިއްޙީ ގޮތުން ރައްޔިތުންނަށް ބޭނުންވާ މައުލޫމާތު ފޯރުކޮށްދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ލ. ހިތަދޫ ސިއްހީ މަރުކަޒަށް 50 އަހަރު ފުރުން ފާހަގަކުރުމަށް މިއަދު ހަވީރު އެރަށުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ރައީސް ސޯލިހު ވިދާޅުވީ، ރަށްރަށުގެ އާއްމު ސިއްހީ ހިދުމަތްތެރިން، ގަވައިދުން ގޭގެއަށް ޒިޔާރަތްކޮށް، ވަކިވަކި ފަރުދުންގެ ހާލުއަހުވާލު ބަލައި، ސއްހީ ގޮތުން ރައްޔިތުންނަށް ބޭނުންވާ މައުލޫމާތާއި އިރުޝާދު ފޯރުކޮށްދިނުމަކީ، މިހާރު އަލުން ފަށަންވެފައި އޮތް ކަމެއް ކަމަށެވެ.

އެކަމަށް ހަރުދަނާ އިންތިޒާމެއް ހަމަޖެއްސުމަށް އެމަނިކުފާނު ވަނީ ސިއްހީ ހިދުމަތްދޭ އިދާރާތަކަށާއި ކައުންސިލްތަކަށް އިލްތިމާސް ކުރައްވައިފައެވެ.

ލާމަރުކަޒީ ގާނޫނަށް ގެނައި އިސްލާހާއި ގުޅޭގޮތުން ދެއްކެވި ވާހަކަފުޅުގައި ރައިސް ވިދާޅުވީ، އެ ގާނޫނަށް ގެނައި މުހިންމު ބަދަލުތަކުގެ ސަބަބުން، ރަށްރަށުގެ އާންމު ސިއްހީ ނިޒާމު ހަރުދަނާވެގެންދާނެ ކަމަށް އުންމީދު ކުރައްވާ ކަމަށެވެ.

''ރައްޔިތުންނަށް ދޭންޖެހޭ ސިއްހީ ހިދުމަތްތައް މިހާރަށްވުރެ ފުޅާކޮށް، މިހާރަށްވުރެ ދުޅަހެޔޮ ދިރިއުޅުމަކަށް ރައްޔިތުންނަށް މަގުފަހިކޮށްދިނުމަކީ، ރާއްޖޭގެ ހުރިހާ ކައުންސިލަރުންނަށް އަޅުގަނޑު ކުރާ ވަރަށް މުހިންމު އިލްތިމާސެއް.'' ރައިސް ވިދާޅުވިއެވެ.

އެމަނިކުފާނު ވިދާޅުވީ، ލާމަރުކަޒީ ނިޒާމަށް ބަދަލުތައް ގެނައީ، ރައްޔިތުން އެދޭގޮތަށް ރައްޔިތުންނާ ވީހާ ގާތުން ހިދުމަތް ދިނުމުގެ ސިޔާސަތުގެ ދަށުން ކަމަށެވެ. އެހެންވެ އެބަދަލުތަކާއެކު، ބަލިވުމުގެ ކުރިން، ބަލިން ދުރުކުރެވޭނެ އާންމު ސިއްހަތުގެ ރަނގަޅު ނިޒާމެއް، ރަށްރަށުގައި ގާއިމުކުރުމަށް ކައުންސިލްތަކުން އިސްނަގައިގެން މަސައްކަތްކޮށްދިނުމަށް ރައީސް އެދިވަޑައިގެންނެވި އެވެ.

މާޒީގައި ސިއްހީ އެހީތެރިން ކޮށްދެއްވި އަގުހުރި ހިދުމަތްތައް ފާހަގަކުރައްވައި، ރައީސް ވިދާޅުވީ ގައިން ގަޔަށް އަރާ ބަލިތައް ބަލިތައް ނައްތައިލުމުގައި، ކުރު މުއްދަތެއްގެ ތެރޭގައި، ރަނގަޅު ކާމިޔާބެއް ހޯދުނީ، އާންމު ސިއްޙަތަށް އިސްކަންދީގެން، ވަރަށް ރޭވުންތެރިކަމާއެކު ކުރެވުނު މަސައްކަތްތަކެއްގެ ސަބަބުން ކަމަށެވެ.

ރާއްޖޭގެ ސިއްހީ ހިދުމަތުގެ ތާރީހަށް ބަލާއިރު، އެންމެ ކާމިޔާބު ދުވަސްވަރެއްގެ ގޮތުގައި ފާހަގަކުރެވެނީ، ޖަމާއަތުގެ ސިއްހީ އެހީތެރިންނާއި، އާއިލާގެ ސިއްހީ އެހީތެރިންގެ ދައުރު ފުޅާވެގެން އައި ދުވަސްވަރު ކަމަށް ރައީސް ވިދާޅުވިއެވެ.

''އޭގެ ނަތީޖާވެސް ވަރަށް ރަނގަޅު. ފަސޭހަކަމާއެކު ގައިން ގަޔަށް އަރާ ބަލިތައް، އާދެ، މެލޭރިއާ، ފައިލޭރިއާ، ޕޯލިއޯ، ޓެޓްނަސް އަދި ހިމަބިހިފަދަ ބަލިތައް ކޮންޓްރޯލްކޮށް، ރާއްޖެއިން ނައްތައިލެވުނީ، އާންމު ސިއްހަތާމެދު ރައްޔިތުން ހޭލުންތެރިކުރުމަށް، ސިއްހީ އެހީތެރިން މެދުވެރިކޮށް، މުޅި ރާއްޖޭގައި ހިންގި ކާމިޔާބު ހަރަކާތްތަކުން.'' ރައީސް ވިދާޅުވިއެވެ.

ރައިސް ސޯލިހު ވިދާޅުވީ މިއަދު އެފަދަ ބަލިތައް ނެތަސް، ސިއްހީ ގޮތުން މިހާރު ކުރިމަތިވެފައި ހުރި ނުރައްކާތައް ވަކި ކުޑައެއް ނޫން ކަމަށެވެ.

މިހާރު ސިއްހީ ގޮތުން އޮތް އެންމެ ބޮޑު ގޮންޖެހުމަކީ، ގައިން ގަޔަށް ނާރާ ބަލިތައް، ދިވެހިންގެ ތެރޭގައި އާދަޔާ ހިލާފަށް އިތުރުވުންކަން ފާހަގަކުރައްވައި ރައީސް ވިދާޅުވީ، މިހާރު އެންމެ ގިނަ ދިވެހިން މަރުވަނީ ކެންސަރާއި، ހިތުގެ ބަލިތަކާއި، ސްޓްރޯކާއި، ފުއްޕާމޭގެ ބަލިތަކާއި ކިޑްނީއާ ގުޅުން ހުރި ބަލިތަކުގައި ކަމަށެވެ.