ކައުންސިލްތައް ހިމަނާފައި އޮންނަނީ ދަށް ފަންތީގައި؛ މުވައްޒަފުންގެ މުސާރަ ބޮޑު ކުރަން ދަތީ އެހެންވެ: ރައީސް

ކައުންސިލް ތަކުގައި މަސައްކަތް ކުރާ އިދާރީ މުވައްޒަފުންގެ މުސާރަ ބޮޑު ކުރަން ދަތި ވަނީ، ކައުންސިލްތައް ދަށް ފަންތީގެ ހިމަނާފައި އޮތުމުން ކަމަށާ، އެ މައްސަލަ ހައްލު ކުރެވެން އޮތީ މަޖިލީހުގެ ތެރެއިން ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވެފައި ވަނީ މ.ނާލާފުށީ، މަތަރެސްމާގޭ، މޫސާ ޞާބިރު، ސިވިލް ސާވިސްގައި ޚިދުމަތްކުރާ އިދާރީ މުވައްޒަފުންގެ މުސާރަ ބޮޑުކުރުމާއިމެދު ދެންނެވި ސުވާލަށް ދެއްވި ޖަވާބުގައެވެ.

އެގޮތުން ޞާބިރު ވަނީ އޭނާ އަކީ، ޑިގްރީ އާއި ހަމައަށް ކިޔަވައިގެން، ކައުންސިލްގެ އިދާރީ ބައިގައި މަސައްކަތް ކުރަމުން އަންނަ މުވައްޒަފެއް ކަން ފާހަގަކޮށް، އެ ފެންވަރަށް ކިޔަވައިގެން ހުރި ނަމަވެސް މުސާރައާއި އެލަވަންސް ހިމަނައިގެން ގެއަށް ގެންދަން ލިބޭ މުސާރަ ކުޑަ ކަން ފާހަގަ ކޮށްފައެވެ. އަދި އެ މައްސަލަ ހައްލު ކުރުމަށް ސަރުކާރުގެ ވިސްނުން ހުރި ގޮތަކީ ކޮބައިތޯ އޭނާ ވަނީ ސުވާލުކޮށްފަ އެވެ.

އެ ސުވާލަށް ޖަވާބު ދެއްވަމުން ރައީސް މުޢިއްޒު ވަނީ، ކައުންސިލް ތަކުގެ އިދާރީ މުވައްޒަފުންގެ މުސާރަ ބޮޑު ކުރުމަށް އޮތް އެންމެ ބޮޑު ހުރަހަކީ މަޖިލީހުގެ ކަމާއި ބެހޭ ގާނޫނު ތަކުން، ކައުންސިލްތައް ކެޓަގަރައިޒް ކޮށްފައި އޮތް ފަންތި ކަން ފާހަގަކުރައްވާފައެވެ.

ކައުންސިލްތައް ކެޓަގަރައިޒް ކޮށްފައި މިއޮންނަނީ ވަރަށް ދަށް ފަންތިއެއްގައި. ރައްޔިތުންގެ މަޖިލީހުގެ ކަމާއި ބެހޭ ގާނޫނުގެ ތެރެއިން ކެޓަގަރައިޒް ކޮށްފައި މިއޮތް ގޮތް. އެއީ މައިގަނޑު މައްސަލަ އަކީ. ސަރުކާރުން، ފިނޭންސް މިނިސްޓްރީން، މުސާރަ ބޮޑުކުރަން ބޭނުން ވިޔަސް އެކަމެއް ނުވެއް ކުރެވޭ ކެޓަގަރައިޒް ކޮށްފައި އޮތް ގޮތުން.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އަދި ކަން އެހެން އޮތުމުން، ކައުންސިލް ތަކުގެ އިދާރީ މުވައްޒަފުންގެ މުސާރަގެ މައްސަލައަށް މިހާރުން މިހާރަށްވެސް ހައްލެއް ގެނެވެން އޮތީ ރައްޔިތުންގެ މަޖިލީހުގެ ތެރެއިން ކަމަށް އެމާނިކުފާނު ވިދާޅުވި އެވެ.

މިއާއެކު ރައީސުލްޖުމްހޫރިއްޔާ ވިދާޅުވީ، ސަރުކާރުގެ އަމާޒަކީ ޖުމްލަކޮށް، އެންމެހައި ފަރާތްތަކުގެ މުސާރަ ބޮޑު ކުރުން ކަމަށެވެ. އެހެން ނަމަވެސް، މުސާރަތައް ބޮޑު ކުރެވެން އޮތީ، އިގްތިޞާދު ހަރުދަނާކޮށް ވަރުގަދަކުރެވޭ މިންވަރަކުން ކަމަށެވެ.