އެއާ އެމްބިއުލާންސުން މިހާތަނަށް 500 އަށް ވުރެ ގިނަ ބަލި މީހުން އުފުލައިފި

އެއާ އެމްބިއުލާންސް ހިދުމަތް ރާއްޖޭގައި ތައާރަފް ކުރިފަހުން މިހާތަނަށް 500 އަށް ވުރެ ގިނަބަލި މީހުން އުފުލައިފިއެވެ.

ސިއްހީ ވުޒާރާއިން ހާމަކުރި ގޮތުގައި، އެއާ އެމްބިއުލާންސްގެ ޚިދުމަތް ރާއްޖޭގައި މުޅިން އަލަށް ތައާރަފް ކުރެވި ޚިދުމަތް ދޭން ފެށިފަހުން މިހާތަނަށް 437 ދަތުރުކޮށް، 540 ބަލި މީހުން ވަނީ އުފުލާފައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅާއި އެއްގޮތަށް ރާއްޖޭގައި އެއާ އެމްބިއުލާންސް ގެ ހިދުމަތް ފަށާފައިވަނީ މިއަހަރުގެ މާރިޗް މަހުގެ 1 ވަނަ ދުވަހުއެވެ.

ޑޭޝް8-200 މަރުކާގެ މަތިންދާ ބޯޓެއް ބޭނުންކޮގެން އެއަރ އެމްބިޔުލާންސްގެ ޚިދުމަތް ރާއްޖޭގައި ފެށިއިރު، މާރިޗް މަހުގެ 15 ވަނަ ދުވަހު ވަނީ މި ޚިދުމަތަށް މޯލްޑިވިއަން ގެ ސީޕްލޭނެއްވެސް ތައާރަފް ކޮށްފައެވެ.

މޯލްޑިވިއަނުން އޮޕަރޭޓް ކުރަމުންދާ، އެ ދެ ބޯޓުގައިވެސް އެމަޖެންސީ ހާލަތުގައި ބަލި މީހަކަށް ފަރުވާ ދިނުމަށް ބޭނުންވާ ވަސީލަތްތަކާއި އާލާތްތައް ވަނީ ގާއިމުކޮށްފައެވެ. އޭގެ އިތުރުން، އެއާ އެމްބިއުލާންސްގައި ހިދުމަތް ދިނުމަށް 15 މީހަކު ތަމްރީންކޮށްފައިވާއިރު އޭގެތެރޭގައި ހިމެނެނީ ފަސް ޑޮކްޓަރަކާއި ފަސް ނަރުހަކާއި މެޑިކަލް ޓެކްނީޝަނުންނެވެ.