ޝާހިދު އިބުރޭއަށް؛ ޕާޓީ އެތެރޭގެ މަސްލަހަތު ގެއްލޭފަދަ ކަންކަމުން ދުރުވާންޖެހޭ

އެމްޑީޕީގެ އެތެރޭގެ މަަސްލަހަތު ގެއްލޭ ކަންކަން ނުކުރުމަށް އެޕާޓީގެ ރައީސް ޢަބްދުﷲ ޝާހިދު ގޮވާލައްވައިފިއެވެ.

ޝާހިދު މިކަމަށް ގޮވާލެއްވީ އެމްޑީޕީގެ ވަގުތީ ޗެއާޕާސަނެއް ހޮވުމަށް އެންމެފަހުން އެޕާޓީގެ ޤައުމީ މަޖލީހުގެ ތެރޭގައި ކަންތައްވެދިޔަ ގޮތާ ގުޅޭގޮތުން ޑެޕިއުޓީ ޗެއާޕާސަން އިބްރާހިމް ވަހީދަށް މިއަދު ސިޓީއެއްގައެވެ.

ސިޓީގައި ޝާހިދު ވަނީ އެދުވަހުގެ ޤައުމީ މަޖިލީހުގެ ޖަލްސާގައި ކަންކަންވެ ދިޔަގޮތް ބަޔާންކޮށްދެއްވާފައެވެ. އެގޮތުން އެރޭގެ ޖަލްސާގައި ފުރަތަމަ ވޯޓު ނަގާ ނިމުމުން ޖަލްސާގައި ތިއްބެވި ވޯޓުލެވޭ މެމްބަރުންގެ އަދަދަކީ 96 ކަން އިއުލާނުކުރެއްވުމަށްފަހު ރިޔާސަތު ނުހިމަނައި އެ އަދަދަކީ 95 ކަމަށް އިއުލާނު ކުރެއްވިކަމަށާއި، އެންމެފަހުން ވަގުތީ ޗެއާޕާސަން ވޯޓަށް އަހައި 47 ވޯޓުލިބި އަބްދުﷲ ވަހީދުގެ ނަން ފާސްވެއްޖެކަމަށް ރިޔާސަތުން އިއުލާނުކުރެއްވި ކަމަށެވެ.

ނަމަވެސް 95 ގެ ދެބައިކުޅަ އެއްބަޔަކީ 47 ނޫންކަމަމަށް ބައެއް މެމްބަރުން އިހުތިޖާޖުކުރެއްވުމުން ރިޔާސަތުން ހިސާބު ހެއްދެވުމަށްފަހު އެންމެފަހުން އިއުލާނުކުރެއްވީ ޢަބްދުﷲ ވަހީދުގެ ނަން ފާސްނުވާކަަށެވެ.

ޝާހިދު ވިދާޅުވީ ރިޔާސަތުން ދެފަހަރު ދެގޮތަށް އަމަލުކުރެއްވުމުގެ ސަބަބުން އެންމެފަހުން އެރޭގެ ޖަލްސާގެ ނިޒާމު ގެއްލި ހަމަނުޖެހުމަކަށް ދިޔަކަމަށެވެ. އަދި އެންމެފަހުން ކުރިއަށްނުގެންދެވި މެދުކަނޑާލެއްވިކަން ރިޔާސަތުން އިއުލާނުކުރެއްވި ކަމަށެވެ.

ޤައުމީ މަޖިލީހުގެ ޖަލްސާއަށްފަހު ޕާޓީގެ އެތެރެ ހނުވެފައިވަނިކޮށް އަބްދުﷲ ވަހީދު ވަނީ މިއަދު އަބްދުﷲ ޝާހިދަށް ސިޓީފުޅެއް ފޮނުއްވައި އެމްޑީޕީގެ ވަގުތީ ޗެއާޕާސަންކަމަށް ވާދަކުރެއްވި ކުރެއްވުން އަނބުރާ ގެންދަވާފައެވެ.

މިކަމާ ގުޅިގެން އަބްދުﷲ ޝާހިދު ފޮނުއްވި ސިޓީގައި ވަނީ ލޯކަލް ކައުންސިލް އިންތިހާބު ކައިރިވެފައިމިވާ ދަނޑިވަޅުގައި ޕާތީގެ އެތެރޭގެ މަސްލަހަތު ގެއްލޭފަދަ އެއްވެސް ކަމެއް ނުކުރުމަށް އިލްތިމާސްކޮށްފައެވެ.