ތަރައްޤީގެ މަޝްރޫޢުތަކަށް ބަޖެޓް އެކަނި މަޖިލީހުން ފާސްނުކޮށްދިނަސް އޮންނާނީ ތާށިވެފައި: ރައީސް މުޢިއްޒު

ތަރައްޤީގެ މަޝްރޫޢުތަކަށް ބަޖެޓް އެކަނި މަޖިލީހުން ފާސްނުކޮށްދިނަސް އޮންނާނީ ތާށިވެފައިކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.

ހޯރަފުށި، ތުރާކުނު އަދި އުލިގަމު ހިމެނޭ ހޯރަފުށި ދާއިރާގެ ސަރުކާރު ކެންޑިޑޭޓް ޢަލީ މޫސަގެ ކެމްޕެއިން ޖަލްސާގައި ރޭ ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، އެމަނިކުފާނު ވެފައިވާ ވައުދުތައް ފުއްދޭނީ އެކަމަށް ރައްޔިތުން އެއްބާރުލުން ދެއްވައިގެން ކަމަށެވެ.

ސަރުކާރުން ކިތަންމެ ބޭނުންވިޔަސް، ރައްޔިތުންގެ މަޖިލީހުން އެއްބާރުލުން ނުލިބޭނަމަ ހުރަސްތަކާއި ދިމާވާނެކަމަށް ރައީސް މުޢިއްޒު ވިދާޅުވިއެވެ.

ބަޖެޓު ފާސްނުކޮށްދިނަސް އަޅުގަނޑުމެން ކޮންތާކަށްތޯ ދާނީ؟ ބަޖެޓު ފާސްނުކޮށްދިނީމަ، އެބޭފުޅުން ބޭނުންގޮތަކަށް މަސްހުނިކޮށްފައި ބަދަލުކޮށްފައި ފާސްކޮށްލީމަ އަޅުގަނޑުމެން ތިބޭނީ ތާށިވެފައި ނޫންތޯ؟ އަޅުގަނޑު ބޭނުމެއްނޫން އެކަން އެހެން ވާކަށް

ރައީސް ޑރ.މުޙައްމަދު މުޢިއްޒު ވިދާޅުވިއެވެ

ރައީސް މުޢިއްޒު ވިދާޅުވީ، މިހާރު މަޖިލީހުގައި ފާސްކޮށްފައި އޮތް ބަޖެޓު އޮތީ އެގޮތަށްކަމަށެވެ.

ޓްރާންސިޝަން މަރުހަލާގައި ބަޖެޓަށް ކެމްޕެއިންގައި ވީ ވައުދުތަށް ހުށަހެޅުމަށް ދިނީ 10 ދުވަސްކަން ފާހަގަކުރައްވައި ރައީސް މުޢިއްޒު ވިދާޅުވީ، މިއަހަރަށް ހިންގޭނެ ހުރިހާ މަޝްރޫޢެއްގެ ތަފްސީލު ފޮނުއްވާފައިވާނެ ކަމަށެވެ.

ނަމަވެސް، އެކަންކަން މި ސަރުކާރުން ކުރައްވާނެކަން އެނގިލައްވާތީ އެކިއެކި މަޝްރޫޢުތައް އުނިކޮށް އެ މަޝްރޫޢުތައް ނުހިންގޭ ގޮތަށް މިއަދު މަޖިލީހުގައި އޮތް އެމްޑީޕީ ސުޕާމެޖޯރިޓީން ފާސްކޮށްފައިވާ ކަމަށް ރައީސް މުޢިއްޒު ވިދާޅުވިއެވެ.

ރައީސް މުޢިއްޒު ވިދާޅުވީ، މަޖިލީހުން ނިންމާ މިފަދަ ނިންމުންތަކުގެ ސަބަބުން މަޝްރޫޢުތައް ހިންގުމަށް ވަރަށް ބޮޑެތި ހުރަސްތަކެއް ކުރިމަތިވާ ކަމަށާއި، އެކަންކަން ހުއްޓުވުމަށް ރައްޔިތުން ސަރުކާރުގެ ކެންޑިޑޭޓުން މަޖިލީހަށް އިންތިހާބު ކުރަން ޖެހިފައިވާ ކަމަށެވެ.