މިކަން ވެސް ހައްދުން ނެއްޓިފައި، ހަރުކަށި ފިޔަވަޅާއެކު ހުއްޓުވަން ޖެހޭ

ޤާނޫނުތަކާއި ޤަވާއިދުތައް ހެދިފައި ހުންނަނީ އެންމެންގެ ސަލާމަތާއި ރައްކާތެރިކަމަށްޓަކަ އެވެ. ފަހަރުގައި ތިމާއަށް އެއީ މާ ބޮޑު ކަމެކޭ ހީނުވާ ކަމަކީ އެެހެން މީހެއްގެ ފުރާނައަށް ބޮޑު ނުރައްކަލަކަށް ވެސް ވެދާނެ ކަމެކެވެ. ޤާނޫނުތަކާއި ޤަވާއިދުތަކަށް ތަބާވާން ޖެހެނީ ތިމާއަށް އެއީ މުހިންމު ކަމަކަށް ވެގެނެއް ނޫނެވެ. އެއީ އެންމެންގެ ރައްކާތެރިކަމަށްޓަކައި ހެދިފައިވާ އެއްޗަކަށް ވާތީ އެވެ.

މިއީ މިހާރު ހުޅުމާލެއިން ވަރަށް އާންމުކޮށް ފެންނަ ކަމެކެވެ. ދޭތެރެ ދޭތެރެއިން މާލެ އިން ވެސް ފެނެ އެވެ. ވެލިއަރުވާ ބަރާކޮށްގެން އެއްވެސް ރައްކާތެރިކަމެއް ނެތި ބޮޑެތި ލޮރީތަކުގައި އުފުލުމެވެ.

މިގޮތަށް އުފުލުމަކީ މުޅީން މަނާ ކަމެކެވެ. އެކަމަކު ޤަވާއިދަށް ބެލުމެއް ނެތި މިކަން ކުރުން އާންމުވެ މިހާރު އެކަން ވަނީ ހައްދުން ނައްޓާފައި ކަމުގައި ބުނުމަކީ ދޮގަކަށް ނުވާނެ އެވެ. ހުޅުމާލޭގެ ދެ ފިޔަވަހީން ވެސް މި މަންޒަރު މިހާރު އާންމުކޮށް ފެނެ އެވެ.

އިއްޔެއާ މިއަދު ވެސް "ވޮއިސް" ގެ ކެމެރާއަށް މި މަންޒަރުތައް ނެގުނީ އެންމެ ޕީކު ގަޑީގަ އެވެ. މަގުުތައް އެންމެ ކާރުބާރު ބޮޑު ގަޑީގަ އެވެ. މިއަދުގެ އެ ވަގުތަކީ ސުކޫލުތަކުން ކުދީން ގެއަށް ފޮނުވި ވަގުތެވެ. ދެން ތިބި ދަރިވަރުން ސުކޫލަށް ހާޒިރުވަމުން ދިޔަ ވަގުތެވެ.

އެކަމަކު އެއިން ކަމަކަށް ބެލުމެއް ނެތި ވެލިތައް ބުރުއްސަމުން ބާރު ދުވެލީގައި މި ލޮރީތައް ދިޔައީ ދުއްވަމުންނެވެ.

މާލެއާ ހުޅުމާލެ ފޭސް އެކަަކާއި ހިލާފަށް ފޭސް ދެއަކީ ވައި ބާރު ސަރަހައްދެކެވެ. މިގޮތަށް އެއްވެސް ރަައްކާތެރިކަމެއް ނެތި ވެލި އުފުލުމުގެ ސަބަބުން އެކަމުގެ ތަކްލީފު އެތައް ބަޔަކަށް އުފުލަން ޖެހެ އެވެ. މޫނާއި މުޅި ގަޔަށް ވެލި ބުރާ އެކަމުން އުނދަގުލާއި ގެއްލުން އަދި ތުރާ ކުރުމަތިވެ އެވެ.

ހަގީގަތުގައި މިއީ ހީކުރާ ވަރަށް ވުރެ ނުރައްކާތެރި ހާލަތެއް ކުރިމަތިވެދާނެ ވެސް ކަމެކެވެ. އަހަރެމެން ދިވެހީންގެ ތެރެއިން ވަރަށް ގިނަ މީހުންނަކީ ލޮލުގެ މައްސަލަ ހުންނަ މީހުންނެވެ. ލޮލުގެ ފެނުމަށް އަސަރުކޮށް އައިނު އަޅާ މީހުންނާއި އައިނު އަޅަން ޖެހިފައިވާ މީހުން ވަރަށް ގިނަ އެވެ.

މިގޮތަށް ވެލި އުފުލާ ވެހިކަލެއްގެ ފަހަތުގައި ވަނިކޮށް ބުރައިގެން އަންނަ ވެލިތަކުން ލޮލުގެ ހާލަތު އިތުރަށް ގޯސްވުމުގެ ފުރުސަތު އެބަ އޮތެވެ.

އެހެން ކަމުން މިއީ ހަރުކަށި ފިޔަވަޅުތަކާއެކު ހުއްޓުވަން ޖެހިފައި އޮތް ކަމެކެވެ. ގިނަ ފަހަރަށް މިހެން ވެލި އުފުލަނީ ކޮންސްޓްރަކްޝަން ސައިޓްތަކުންނެވެ. މިއީ ކަމާބެހޭ އިދާރާތަކުން ފަރުވާތެރިކަމާއެކު ބަލަހައްޓަން ޖެހޭ ކަމެކެވެ. ފުލުހުންނާއި ހުޅުމާލޭގެ ބެލެނިވެރިކަން އޮތް އެޗްޑީސީއާ މާލެ ސިޓީ ކައުންސިލުން މިފަދަ ކަންކަން ހުއްޓުވުމަށް އިތުރަށް މަސައްކަތް ކުރަން ޖެހެ އެވެ. އެހެން ނޫނީ ދެން ފެންނާނީ ހިތާމަވެރި ކަމެއް މެދުވެރިވެފައި ވަނިކޮށެވެ.