ސިޔާސީ ޕާޓީތަކަށް މިފަހަރު ދޫކުރީ 27.9 މިލިއަން ރުފިޔާ: އިލެކްޝަންސް

އިލެކްޝަންސް ކޮމިޝަނުގައި ދަފްތަރުވެފައިވާ ސިޔާސީ ޕާޓީތަކުގެ ތެރެއިން ޝަރުތު ހަމަވާ ޕާޓީތަކަށް ދޫކުރުމަށް 27.9 މިލިއަން ރުފިޔާ ބޭންކަށް ފޮނުވާފައިވާކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަނުން ބުނީ މިއަހަރުގެ ބަޖެޓް ރައްޔިތުންގެ މަޖިލީހުން ފާސްކުރި ދުވަހާ ހަމައަށް 10,000 މެންބަރުން ހަމަވި ސިޔާސީ ޕާޓީތަކަށް، ދޫކުރަންޖެހޭ ފައިސާގެ ޕޭމަންޓް ޕްރޮސެސް ކުރުމަށްފަހު، އިއްޔެ ބޭންކަށް ފޮނުވާފައިވާކަމަށެވެ. އިލެކްޝަނުން އާއްމުކޮށްފައިވާ މައުލޫމާތަށް ބަލާއިރު، މިފަހަރު އެންމެގިނަ ފައިސާ ލިބޭ ޕާޓީތަކުގެ ތެރޭގައި ހިމެނެނީ ޕީޕަލްސް ނޭޝަނަލް ކޮންގްރެސް، އާއި އިދިކޮޅު އެންމެބޮޑު ޕާޓީ، އެމްޑީޕީއެވެ.

ޕާޓީތަަކަށް ދޫކުރި ފައިސާގެ އަދަދު:

- ޕީއެންސީއަށް 13.3 މިލިއަން ރުފިޔާ

- އެމްޑީޕީއަށް 8.4 މިލިއަން ރުފިޔާ

- ޖުމްހޫރީ ޕާޓީއަށް 2.6 މިލިއަން ރުފިޔާ

- އެމްޑީއޭއަށް 1.7 މިލިއަން ރުފިޔާ

- އަދާލަތު ޕާޓީއަށް 1.7 މިލިއަން ރުފިޔާ

ސިޔާސީ ޕާޓީތަކާ ބެހޭ ޤާނޫނުގެ 35 ވަނަ މާއްދާގައި ބުެނފައިވަނީ ސިޔާސީ ޕާޓީ ހިންގުމަށް ދައުލަތުގެ ބަޖެޓުން ދޫކުރެވޭ ފައިސާއަކީ، އެއަހަރަކަށް ފާސްކުރާ ބަޖެޓުގެ 0.1 އިންސައްތައެވެ. ސިޔާސީ ޕާޓީތަކަށް މިއަހަރުގެ ބަޖެޓުން ޖުމްލަ 27 މިލިއަން ރުފިޔާ ދޫކުރިއިރު، މިދިޔަ އަހަރު ސިޔާސީ 5 ޕާޓީއަކަށް ވަނީ، އެޕާޓީއެއްގައި މެންބަރުން ތިބި ނިސްބަތުން، ބޮލަކަށް 193.23 ރުފިޔާ ގެ މަގުން ފައިސާ ދޫކޮށްފައެވެ.

އިލެކްޝަންސް ކޮމިޝަނުން އެންމެފަހުން އާންމުކޮށްފައިވާ ދަފްތަރުގައިވާ ގޮތުން ވެރިކަންކުރާ ކޮންގްރެސް ޕާޓީ ގައި ތިބީ 68،665 މެންބަރުން ތިބިއިރު. އެމްޑީޕީ ގައި 43،765 މެންބަރުން އެބަ ތިއްބެވެ. ދެން އެންމެ މެންބަރުން ގިނަ ޖުމްހޫރީ ޕާޓީގައި ތިބީ 13،456 މެންބަރުންނެވެ.