ރާއްޖޭގައި ބޭރުގެ އެއްވެސް އަސްކަރީ ބޭސްއެއް ނެހެދޭނެ: އެމްއެންޑީއެފް

ރާއްޖޭގެ އެއްވެސް ސަރަހައްދެއްގައި ބޭރުގެ އެއްވެސް ގައުމެއްގެ އަސްކަރީ ބޭސްއެއް ނެހެދޭނެ ކަމަށް އެމްއެންޑީއެފުން ބުނެފިއެވެ.

ނޫސްވެރިންނަށް މައުލޫމާތު ދިނުމަށް އެމްއެންޑީއެފުން މިއަދު ބޭއްވި ބައްދަލުވުމުގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލު ވިދާޅުވީ، ރާއްޖޭގައި އިންޑިއާގެ މިލިޓަރީ ބޭސް އެއް ހެދުމާއި ގުޅޭގޮތުން ބައެއް ފަރާތްތަކުން ތަފާތު ވާހަކަތައް ދައްކަމުންދާކަމަށެވެ. ޝަމާލު ވިދާޅުވީ ރާއްޖޭގެ އެއްވެސް ހިސާބެއްގައި ބޭރުގެ އެއްވެސް ގައުމެއްގެ މިލިޓަރީ ބޭސްއެއް ހެދުމަށް ހުއްދަ ނުދޭނެ ކަމަށާއި އެކަމަށް އެއްވެސް ގައުމަކުން އެދިފައިވެސް ނުވާކަމަށެވެ.

އަދި އެފަދަ ކަމެއް ކުރުމުގެ ވިސްނުން ދިވެހި އަސްކަރިއްޔާއިންވެސް އަދި ސަރުކާރުންވެސް ނުގެންގުޅޭ ކަމަށާއި ނަމަވެސް މިލިޓަރީ ކެޕޭސިޓީ އިތުރުކުރުމަށް ބޭރުގެ އެހީތެރިކަން ހޯދުމުގެ ވިސްނުން އެބައޮތް ކަމަށް ޝަމާލު ވިދާޅުވިއެވެ. ޝަމާލު ވިދާޅުވީ އަސްކަރީ ތަމްރީނުތައް ހޯދުމަށް ދިވެހި ސިފައިން ބޭރު ގައުމުތަކުގެ އެހީ ހޯދަމުންދާކަމަށާއި މިއީ އަބަދުވެސް ހިންގާ ޕްރޮގްރާމްތަކެއް ކަމަށެެވެ.

ޝަމާލު ވިދާޅުވީ މެރިންކޯ ސިފައިން އަސްކަރީ ތަމްރީނުތައް ހެދުމަށް ބޭރުގެ ގައުމުތަކަށް ފޮނުވާ ކަމަށާއި އެގޮތުން މިހާރުވެސް ހަތް ޕްރިގްރާމެއް ކުރިއަށްދާކަމަށެވެ.

މީގެއިތުރުން އުތުރުގެ ތިލަފަޅުގައި އިންޑިއާގެ އަސްކަރީ ބޭސް އެއް ހެދުމަށް ތައްޔާރުވަމުންދާކަމުގެ މައުލޫމާތު ލިބިފައިވާކަމަށް ނޫސްވެރިއަކު ދެންނެވުމުން، ޖަވާބުގައި ޝަމާލު ވިދާޅުވީ ކޯސްޓްގާޑުގެ އުޅަނދު ފަހަރު މަރާމާތު ކުރުމަށް ތަނެއް ނެތުމުން ދަތިވާތީ، އުތުރުތިލަފަޅުގައި އެފަދަ ތަނެއް ހެދުމަށް ވިސްނަމުންދާކަމަށެވެ. އަދި އެކަމަށް ބޭރުގެ އެހީއެއް ހޯދަން ބަލާއިރު އިންޑިއާއިން އެކަމަށް އެހީތެރިވެދޭނެ ކަމަށް ބުނެފައިވާކަމަށް ވިދާޅުވިއެވެ.

އެހެންކަމުން އުތުރު ތިލަފަޅުގައި ކޯސްޓްގާޑު މަރާމާތުކުރުމަށް ޑޮކްޔާޑެއް ހެދުމުގެ ވިސްނުން އެބަހުރިކަން ފާހަގަކުރައްވައި ޝަމާލު ވިދާޅުވީ، އުތުރު ތިލަފަޅުގެ ކޮންމެވެސް އެއް ހިސާބަކުން ކޯސްޓްގާޑުގެ ރިިޕެއާ ފެސިލިޓީއެއް ހެދިއްޖެނަމަ މިހާރަށްވުރެ ކޯސްޓްގާޑުގެ ހިދުމަތް އެތައް ގުނައެއް ފުޅާވެގެންދާނެ ކަމަށެވެ.