އަގުބޮޑު އިންޖީނެއްގެ ގިޔަރުބަޔާއި އެނޫންވެސް ތަކެތި ވަގަށްނެގި ބަޔަކު މިލަންދޫއިން ހައްޔަރުކޮށްފި

ށ. މިލަންދޫ ގެއެއްގެ ގަރާޖަކުން އަގުބޮޑު އައުޓްބޯޑު އިންޖީނެއްގެ ބަޔަކާއި، ގެއަކުން ޓީވީތަކަކާއި ސެންޓުފުޅިތަކެއް ވަގަށް ނެގި މައްސަލައެއްގައި ދެ މީހަކު ހައްޔަރުކޮށްފިއެވެ.

ފުލުހުން ބުނީ އެއިދާރާއަށް ހުށަހެޅުނު މައްސަލައަކާ ގުޅިގެން  ހައްޔަރުކޮށްފައި ވަނީ ރެޑްރޯސް / ށ. މިލަންދޫ، އަޙްމަދު ޢަޒީމް (34އ) އަދި ތަރިވިދާގެ / ށ. މިލަންދޫ، މުޙައްމަދު ޝިފާއު (29އ) އެވެ. ފުލުހުން މައުލޫމާތުދޭ ގޮތުގައި، އެމީހުން ވަގަށް ނެގި ތަކެތީގެ ތެރޭގައި 60 އިންޗީގެ ސްކައިވޯތް ޓީވީއަކާއި، 65 އިންޗީގެ ޓީސީއެލް ޓީވީއަކާއި، 240 އެމެރިކާ ޑޮލަރުގެ އަގު ހުރި ގުޗީ ފުލޯރާ ސެންޓު ފުޅިއެއްގެ އިތުރުން ހަ ހާހެއްހާ ރުފިޔާގެ އަގުހުރި އިތުރު ސެންޓުފުޅިތައް ހިމެނެއެވެ. ވަގަށް ނެގި ހުރިހާ ތަކެއްޗެއް މިހާރު ވަނީ ހޯދައި ވެރިފަރަތާ ހަވާލުކޮށްފައެވެ.

މީގެ އިތުރުން މި މީހުން ވަނީ، ގެއެއްގެ ގަރާޖުން ލައްކައަކަށް ވުރެ ގިނަ ރުފިޔާގެ އިންޖީނު ބައިތަކެއް ވަގަށް ނަގައި އަގުހެޔޮކޮށް ވިއްކާލާފައެވެ. އެމީހުން ވަގަށް ނެގި އެއްޗެހީގެ ތެރޭގައި ޔަމަހާ ބްރޭންޑްގެ އައުޓްބޯޑް ގިޔަރަކާއި އޭގައި އަޅުވައިފައިވާ ބުރަފައްޗެކެވެ. ވެރިފަރާތުން ބުނާ ގޮތުގައި އެ ތަކެތީގެ އަގު 120،000 ރުފިޔާއަށް ވުރެ ބޮޑެވެ.

އެމީހުން އެތަކެތި ވިއްކާލާފައިވަނީ މިލަންދޫ ފަޅުތެރޭގައި އަޅާފައި އޮތް ބޯޓެއްގެ ކައްޕިއަކަށް 2،500 ރުފިޔާއަށެވެ. ފުލުހުން އެ ބޯޓަށް ގޮސް ބޯޓު ބަލައިފާސްކުރިއިރު، އިންޖީނުގެ ވަތުތެރެއިން، ވަގަށް ނެގި ތަކެތި ވަނީ ފެނިފައެވެ.

ފުލުހުން ދަނީ މި މައްސަލަތައް ބަލަމުންނެވެ. އަދި ކޯޓު އަމުރެއްގެ ދަށުން އެމީހުން މިވަގުތު ތިބީ 10 ދުވަހުގެ ބަންދެއްގައެވެ.