ޑިވެލޮޕްމެންޓް ބޭންކުގެ ސީއީއޯ އަދި ޗެއާޕާސަނަކަށް ބޭރުގެ ތަޖުރިބާކާރު ދެބޭފުޅުން އައްޔަނުކޮށްފި

ރާއްޖޭގެ ފުރަތަމަ ޑިވެލޮޕްމަންޓް ބޭންކް، ޑިވެލޮޕްމެންޓް ބޭންކް އޮފް މޯލްޑިވްސްގެ ސީއީއޯ އަދި ޗެއާޕާސަން ކަމަށް ބޭރުގެ ދެބޭފުޅުން އައްޔަނުކޮށްފިއެވެ.

ޑިވެލޮޕްމެންޓް ބޭންކުގެ ސީއީއޯއަކަށް އިނގިރޭސި ރައްޔިތެއްކަމަށްވާ ނޮއެލް ގްރެގާ ޕެޓަސަން ޖޯންސް އައްޔަނުކޮށްފައިވާއިރު، ޗެއާޕާސަނަކަށް އައްޔަނުކޮށްފައިވަނީ ސިންގަޕޫރުގެ ރައްޔިތެއްކަމަށްވާ އަރުނީ ގުނެތިލަކައެވެ.

މި ދެ ބޭފުޅުންނަކީ ވެސް ބައިނަލްއަގްވާމީ މާލީ އެކި އިދާރާތަކުގައި ކުރިން މަސައްކަތް ކުރައްވާފައިވާ ތަޖުރިބާކާރު ދެ ބޭފުޅުންކަން ފާހަގަކޮށްލަން ޖެހެއެވެ.

މިގޮތުން، މި ބޭންކްގެ ސީއީއޯ އަކީ ސައުދީ އަރަބިއްޔާގެ ނެޝަނަލް އިންސްފްރާސްޓްރަކްޗާ ފަންޑުގެ ޗީފް އިންވެސްޓްމެންޓް އޮފިސަރުގެ މަގާމުގައި އެންމެ ފަހުން ހުންނެވި ބޭފުޅާއެވެ. އަދި އެބޭފުޅާ ވަނީ 2013 އިން 2016 އަށް އިނގިރޭސި ވިލާތުގެ ޔޫކޭ ގްރީން އިންވެސްޓްމެންޓް ބޭންކުގެ މެނޭޖިން ޑިރެކްޓަރުގެ މަގާމު ވެސް ފުރުއްވާފައެވެ.

މީގެ އިތުރުންވެސް، އޮކްސްފޯޑު ޔުނިވާސިޓީން މާލީ ދާއިރާ އިން މަތީ ތައުލީމު ހާސިލް ކުރައްވާފައިވާ ޑިވެލޮޕްމެންޓް ބޭންކުގެ ސީއީއޯ އަކީ ސްޓާލިން ވޯޓަފޯޑް ސެކިއުރިޓީސްގެ ސީއީއޯގެ މަގާމު 2004 އިން 2013 ވަނަ އަހަރަށް އަދާކުރައްވައިފައިވާ ފަރާތެކެވެ.

ހަމައެއާއިއެކު، މި ބޭންކް ގެ ޗެއާޕާސަންގެ މަގާމަށް އައްޔަންކުރެއްވި ގުނެތިލަކަ އަކީ ފައިނޭންޝަލް ސެކްޓަރުގައި 25 އަހަރުގެ ތަޖުރިބާ ހުރި ބޭފުޅެކެވެ. އެންމެ ފަހުން ލަންކާގެ ހެޓަން ނެޝަނަލް ބޭންކްގެ ޗެއާޕާސަންގެ މަގާމުގައި ހުންނެވި ގުނެތިލަކަ ވަނީ 2016 އިން 2021 ގެ ނިޔަލަށްލަންކާގެ ޕީޕަލްސް ބޭންކްގެ ހެޑް އޮފް ކޯޕަރޭޓް ބޭންކިންގެ މަގާމާއި، ސިންގަޕޫރުގެ ސްޓޭންޑަޑް ޗާޓަޑް ބޭންކްގައި ވެސް މަސައްކަތް ކުރައްވާފައިވާ ބޭފުޅެކެވެ.

މި ދެބޭފުޅުންނާއި މިއަދު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބައްދަލުކުރެއްވިއިރު، އެކަމާއި ގުޅިގެން އެމަނިކުފާނު ވިދާޅުވީ، ޑިވެލްޕްމަންޓް ބޭންކް އޮފް މޯލްޑިވްސް ވާނީ ރާއްޖޭގެ ޓޫރިޒަމް އިންޑަސްޓްރީގެ ރިސޯޓުތައް ހެދުމަށާއި، ހައުސިން މާކެޓާއި އެނޫންވެސް އެހެނިހެން ދާއިރާތަކުން ރާއްޖޭގައި އިންވެސްޓުކުރާ ފަރާތްތަކުގެ ހަބަކަށް ކަމަށެވެ.

"އިރާދަކުރެއްވިއްޔާ ބޭންކު ގާއިމުކުރެވި، ދުނިޔޭގެ އެކި ތަންތަނުގައި ވަރަށް ތަޖުރިބާކާރު ވަރަށް ގިނަ ދުވަހު މަސައްކަތްކޮށްފައިވާ ބޭފުޅެއް ސީއީއޯއަކަށް ވެސް ހަމަޖެހިފަ ހުރީ، ޗެއާމަނަކަށް ވެސް ހަމަޖެހިފަ މިވަނީ، އަޅުގަނޑު އެބޭފުޅުންނާ ބައްދަލުކޮށްލަން މިދަނީ،"

ރައީސް ޑރ.މުޢިއްޒު ވިދާޅުވިއެވެ.

އެ ބޭންކަށް ތިން މެމްބަރުން ވެސް މިހާރު ވަނީ އައްޔަން ކުރައްވައިފައެވެ. އެއީ؛

އަހުމަދު އަލީ، މއ. ވޭސައިޑް 805 ފްލެޓް

ސައީދު އަބްދުއްނާސިރު ބިން ސައީދު ހަސަން އަލް ޖުނައިދު، ސިންގަޕޫރު

ރޮބާޓް ޑެނިއެލް ކާންޓް، ޔުނައިޓެޑް ކިންގްޑަމް

ރާއްޖޭގައި ފުރަތަމަ ފަހަރަށް، ޑިވެލްޕްމަންޓް ބޭންކެއް އުފައްދާފައި ވަނީ މޭ މަހުގެ 16 ވަނަ ދުވަހެވެ.