ޓެކްސީތައް ހިފަހައްޓައި ޑްރައިވަރުން ހައްޔަރުކުރީ، އާއިލާތަކަށް ދަތިކުރަން: އެމްޑީޕީ

ޓެކްސީ ޑްރައިވަރުން ކުރަމުންދިޔަ މުޒާހަރާގެ ތެރެއިން ބައެއް ޓެކްސީތައް ޓޯކޮށް ބައެއް ޑްރައިވަރުން ހިފެހެއްޓުމަކީ ފުލުހުން އެ ޓެކްސީތަކުގެ އާއިލާތަކަށް ދަތިކުރުމުގެ ނިޔަތުގައި ކުރިކަމެއްކަމަށް އިދިކޮޅު އެމްޑީޕީން ބުނެފިއެވެ.

އިއްޔެއިން ފެށިގެން ބައެއް ޓެކްސީ ޑްރައިވަރުން ކުރިއަށްގެންދިޔަ މުޒާހަރާ ރޭ ހޫނުވެ، ފުލުހުން ވަނީ ބައެއް ޓެކްސީތައް ޓޯކޮށް، ބައެއް ޓެކްސީ ޑްރައިވަރުންވެސް ފުލުހުންގެ ބެލުމުގެ ދަށަށް ގެންގޮސްފައެވެ.

ފުލުހުން ބުނީ އާއްމު ދަތުރުފަތުރަށް އުނދަގޫވާގޮތަށް މުޒާހަރާކުރުމުން 22 އުޅަނދަކާއި 3 މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށެވެ. މީގެ ތެރެއިން ދެ މީހަކު 5 ދުވަސްވަންދެން ބަންދުގައި ބެހެއްޓުމަށް ކޯޓުން އަމުރުކުރިއިރު، އަނެއް މީހާ ވަނީ ޝަރުތުތަކާއެކު ދޫކޮށްލާފައެވެ.

މިކަމާ ގުޅިގެން އެމްޑީޕީން މިއަދު ނެރުނު ބަޔާނުގައި ބުނެފައިވަނީ، މި މައްސަލާގައި ލުއި އަދަބު ދެވެން އޮއްވައި އެންމެ ހަރުކަށި އަދަބު ފުލުހުން ހިޔާރުކުރީ ޓެކްސީ އާއިލާތަކަށް ދަތިކުރުމަށް ކަމަށެވެ. އެމްޑީޕީން ބުނީ ޓެކްސީ ޑްރައިވަރުންނަކީ ދުވަހުން ދުވަހަށް ލިބޭ އާމްދަނީއަށް ބަރޯސާވެގެން ދިރިއުޅޭ ބައެއް ކަމަށްވާއިރު، ޓެކްސީތައް 30 ދުވަހަސް ހިފެހެއްޓުމަކީ އެ އާއިލާތަކުގެ އާމްދަނީ ހުއްޓުވާލުން ކަމަށެވެ. އެއްގަމު ދަތުރުފަތުރުގެ ގާނޫނުގައި ލުއި އަދަބެއް ދެވެން އޮއްވައި އެންމެ ހަރުކަށި އަދަބު އިހުތިޔާރުކޮށްފައިވަނީ ތެކްސީ ޑްރައިވަރުން ކުރަމުންދާ ސުލްހަވެރި އިހުތިޖާޖު ހުއްޓުވާލައި އާއިލާތަކަށް ގެއްލުންދިނުމުގެ ނިޔަތުގައިކަމަށް އެމްޑީޕީން ބުންޏެވެ.

އެމްޑީޕީގެ ބަޔާނުގައި ވަނީ އެމީހަކު އިހުތިޔާރުކުރާ ވަޒީފާއެއް އަދާކުރުމާއި މަސައްކަތްކޮށްގެން އާމްދަނީ ހޯދުމުގެ ހައްގަކީ ހަމަ ކޮންމެ މީހަކަށްމެ ލިބިގެންވާ އަސާސީ ހައްގެއް ކަމަށެވެ. އާމްދަނީ ހޯދުމަށްޓަކައި ބޭނުންކުރާ ވަސީލަތްތައް ހިފެހެއްޓުމަކީ މި މާއްދާގެ ދަށުން ލިބިދޭ އަސާސީ ހައްގަކަށް ހުރަސްއެޅުންކަމަށް އެމްޑީޕީގެ ބަޔާނުގައި ވަނީ ފާހަގަކޮށްފައެވެ.

އިދިކޮޅު އެމްޑީޕީން ބުނީ ހައްޔަރުކުރި 3 ޑްރައިވަރުންނަށް އެ ޕާޓީގެ ގާނޫނީ ވަކީލުންގެ ޓީމުން އެހީތެރިކަން ފޯރުކޮށްދެމުންދާ ކަމަށާއި ޑްރައިވަރުންގެ އުޅަނދުތައް އަނބުރާ ހޯދުމަށް ކުރަންޖެހޭ ގާނޫނީ މަސައްކަތްވެސް ކުރަމުންދާކަމަށެވެ