ތިލަފުށި ދެވަނަ ފިޔަވަހީގެ ބިން ހިއްކުމުގެ ދަށުން އޭރިއާ އީ ހިއްކަން ފަށައިފި

ތިލަފުށީގެ ދެވަނަ ފިޔަވަހީގެ ބިން ހިއްކުމުގެ ދަށުން އޭރިއާ އީ އާބަންކޯއިން މިއަދު ހިއްކަން ފަށައިފިއެވެ.

މިގޮތުން އާބަންކޯއިން ބުނީ ތިލަފުށި ބިން ހިއްކުމުގެ މަޝްރޫޢުގެ ދެވަނަ ފިޔަވަހީގެ ދަށުން އޭރިއާ އީ ހިއްކުމުގެ މަސައްކަތް މިއަދުން ފެށިގެން 25 ދުވަހަށް ކުރިއަށްދާނެ ކަމަށެވެ. އެހެންކަމުން މި މުއްދަތުގައު އެ ސަރަހައްދުން ދަތުރުކުރާ އުޅަނދުތަކުން މިކަމަށް ސަމާލުވުމަށް އެކޯޕްރޭޝަނުން ވަނީ އެދިފައެވެ.

އޭރިއާ އީ ގެ ދަށުން 5.9 ހެކްޓަރުގެ ސަރަޙައްދެއް 25 ދުވަސް ތެރޭ ހިއްކާ ނިންމާލެވޭނެ ކަމަށް އާބަންކޯ އިން ބުނެއެވެ.

އޭރިއާ އީ ގެ އިތުރުންވެސް ތިލަފުށީގެ ދެވަނަ ފިޔަވަހި ތަރައްޤީކުރުމަށް އެރިއާ އޭ، ބީ ގެ ބިން ހިއްކައި ގޮނޑުދޮށް ހިމާޔަތްކުރުމުގެ މަޝްރޫޢަކީ އާބަންކޯއާއި ޗައިނާ ހާރބަރ އިންޖިނިއަރިންގ ކޮމްޕެނީ ލިމިޓެޑް އާ ގުޅިގެން ކުރިއަށްގެންދެވޭ މަޝްރޫއެކެވެ.

ތިލަފުށީގެ ބިންހިއްކައި ތަރައްޤީ ކުރުމުގެ މަޝްރޫއުގެ މައިގަނޑު މަގްސަދަކީ މާލެ ސަރަޙައްދުގެ ރަށްތަކުގެ އިންޑަސްޓްރިއަލް ހަބަކަށް ތިލަފުށި ބަދަލުކޮށް ތަފާތު ފުރުޞަތުތައް ހޯދައިދިނުން ކަމަށް އާބަންކޯއިން މައުލޫމާތުދެއެވެ.

މި މަޝްރޫއުގެ ދަށުން ތިލަފުށި ފަޅުގައި ހުރި އުޅަނދުތައް ނެގުމުގެ މަސައްކަތް ކޮށް، މާސްޓަރ ޕްލޭނާއި އެއްގޮތަށް ހިއްކަން ޖެހޭ ސަރަހައްދުތައް ހިއްކުން އަވަސް މުއްދަތެއްގެ ތެރޭގައި ނިންމުމަށް އާބަންކޯއިން ދަނީ މަސައްކަތް ކުރަމުންނެވެ.

ތިލަފުށީގެ ސިނާއީ މަޝްރޫއަކީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ ސަރުކާރުގެ ލަފަޔާއި އިރުޝާދުގެ ދަށުން އާބަންކޯއިން ކުރިއަށްގެންދާ މަޝްރޫއެކެވެ.