މިދިޔަ މަހު މާލެއިން 90 ސައިކަލެއް ގެއްލިގެން ހޯދައިދީފައިވޭ

ނިމުނު އޮގަސްޓު މަހު މާލެ ސަރަޙައްދުން 90 ސައިކަލެއް ގެއްލިގެން ހޯދައިދީފައިވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.

މާލެ ސަރަޙައްދުގައި ފުލުހުންގެ ކުރަމުން އައި މަސައްކަތްތަކުގެ ތަފާސް ހިސާބުތަކުން ދައްކާ ގޮތުން، މާލެ ޕޮލިސް ކޮމާންޑުގެ ޑިޕާޓެމްންޓުތަކުން ވަނީ 90 ސައިކަލާއި 19 މޯބައިލް ފޯނު ހޯދައިދީފައިވެއެވެ. އަދި ހަތަރު އިލެކްޓްރޯނިކްސްގެ ބާވަތަކާއި، 329،350 ރުފިޔާގެ ނަގުދު ފައިސާ ވެސް ހޯދައިދީފައިވާ ކަމަށް އެ ހިސާބުތަކުން ދައްކައެވެ. އަދި އެހެނިހެން 47 ތަކެއްޗެއް ހޯދައިދީފައިވާ ކަމަށް ވެސް ފުލުހުންގެ ހިސާބުތަކުން ދައްކައެވެ.

އެ ހިސާބުތަކުން ދައްކާ ގޮތުން މިދިޔަ މަހު ވަނީ ހަތަރު ބިދޭސީއަކު އިމިގްރޭޝަނާ ވެސް ހަވާލުކޮށްފައެވެ.

މީގެ އިތުރުން މާލް ފްރޮންޓް ލައިން ޕޮލިސިން އިން މިދިޔަ މަހު  26،674 ސަރަހައްދެއް ބަލައިފާސްކޮށްފައިވާއިރު، ވެހިކަލް 127 ޗެކްޕޮއިންޓެއް އަދި 999 ގަޑިއިރަށް ވުރެ ގިނަ އިރު ފައިގެމަގުން ޕެޓްރޯލް ބަލަހައްޓައިފައިވެއެވެ.

އެގޮތުން މިދިޔަ މަހު 5،581 މީހަކު ހުއްޓުވައި ސުވާލުކުރެވުނުއިރު އޭގެ ތެރެއިން 5،373 މީހަކު ކުށުގެ ރެކޯޑު އޮތް މީހުންނެވެ. އަދި 208 މީހުންނަކީ ކުށުގެ ރެކޯޑު ނެތް މީހުން ކަމަށް ފުލުހުންގެ ހިސާބުތަކުން ދައްކައެވެ.

އެހެން ނަމަވެސް އެފަދަ ފަރާތްތަކުގެ ތެރެއިން ފުލުހުންގެ ބެލުމުގެ ދަށަށް ގެންދިޔަ މީހުންގެ އަދަދެއް ފުލުހުން ހާމަކޮށްފައެއް ނުވެއެވެ.