ރާއްޖޭގެ މޫސުން ރަނގަޅުވެއްޖެ!

ރާއްޖޭގެ ހުރިހާ ހިސާބުތަކަށް މޫސުން ރަނގަޅުވެއްޖެއެވެ.

މޫސުމާ ބެހޭ ޤައުމީ އިދާރާއިން ބުނީ، ރާއްޖޭގެ މޫސުން ރަނގަޅުވެ، ހުރިހާ ސަރަހައްދެއްގެ ކަނޑުތައްވެސް މަޑުވެފައިވާކަމަށެވެ. ރާއްޖޭގެ މޫސުން ރަނގަޅުވެފައިމިވަނީ ފަސް ދުވަސް ފަހުންނެވެ. މިއަދު މާލޭގެ ފިނިހޫނުމިން ހުރީ

މިފަހުން މޫސުން ގޯސްވެ ރާއްޖެއަށް ކުރި ވިއްސާރާގައިވަނީ، ބައެއް ރަށްތަކުގައި ފެންބޮޑުވެ، އެކިވަރުގެ ގެއްލުންތައް ލިބިފައެވެ. މިގޮތުން ވިއްސާރަވެ ފެންބޮޑުވުމުގެ ސަބަބުން 6 ރަށަކުން ރިޕޯޓްކުރިއިރު، ބައެއް ރަށްތަކުން ފެންބޮޑުވި ގޭތަކުގެ މީހުން ވަނީ އެހެން ތަންތަނަށް ބަދަލުކޮށްފައެވެ.

މާލެއަށް ބަލާއިރު، މިފަހުން ކުރި ވިއްސާރާގައި ފެންބޮޑުވުމުގެ ސަބަބުން 35 ގޭގެ މީހުންނަށް އެހީތެރިކަން ދޭންޖެހުނުކަމަށް ޑިޒާސްޓާ އޮފީހުން ވަނީ ބުނެފައެވެ. މީގެ އިތުރުން ވެލިބަސްދާ ޖެހުމަށާއި އެކި ގޮތްގޮތުން އެހީތެރިކަން ބޭނުންވެގެން 1328 އަށްވުރެ ގިނަ ކޯލް ލިބިފައިވާކަމަށް ޑިޒާސްޓާ އޮފީހުން ވަނީ ބުނެފައެވެ. މީގެ ތެރެއިން 554 އަށްވުރެ ގިނަ މީހުން ރިކުއެސްޓްކޮސްފައިވަނީ ވެލިބަސްތާ ޖެހުމަށެވެ.

މޫސުންގޯސްވެ މިދިޔަ ދުވަސްތަކުގައި ކަނޑުމަތީގެ ނުރައްކާތެރި 2 ހާދިސާއެއްވެސް ވަނީ ހިނގާފައެވެ. މީގެ ތެރެއިން އެއް ހާދިސާއަކީ މިދިޔަ ހޮނިހިރުދުވަހު ދިގުރަށުން މާލެއަށް ދަތުރުކުރި "ހުވަން" ނަމަކަށް ކިޔާ ލޯންޗެއް އަޑިއަށްގޮސް ހިނގި ހާދިސާއެވެ. އެ ހާދިސާގައި 48 މީހަކު ވަނީ ކަނޑުވެފައެވެ. އޭގެ ތެރޭގައި 4 ކުޑަކުދިން ހިމެނެއެވެ.

އަނެއް ހާދިސާއަކީ ތިލަފުށި ކައިރިން ދަނިކޮސް ސްވެނިއާ ނަމަކަށްކިޔާ ލޯންޗެއް ފަޅައިގެންގޮސް އެ ލޯންޗް ދިޔަވި ހާދިސާއެވެ. މި ހާދިސާގައި ލޯންޗުގައި ތިބި 38 މީހަކު ވަނީ އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންގެ އެހީތެރިކަމާއެކު ސަލާމަތްކޮށްފައެވެ.

ރާއްޖެއަށް ކުރި ވިއްސާރައަކީ އަވައްޓެރި ސްރީލަންކާގެ ސަރަހައްދުގައި އުފެދިފައިވާ ސަރކިއުލޭޝަންއާއި އެއާ ގުޅިފައިވާ ޓްރަފްގެ ސަބަބުން ކުރި ވިއްސާރައެއްކަމަށް މެޓް އޮފީހުން ވަނީ ބުނެފައެވެ.