މޭރީ މަރުގެ މައްސަލަ: މާވިންގެ މައްޗަށް އުމުރުދުވަހުގެ ޖަލު ހުކުމެއް
ލިޔުންތެރިޔާ
އަބްދުﷲ ހުސައިން
އައިޖީއެމްއެޗްގެ އީއާރްގައި މަސައްކަތް ކުރި ނަރުސް މޭރީ ގްރޭސް މަރުގެ މައްސަލާގައި އޭނާގެ ފިރިމީހާ މާވިން އެސްވައިގެ މައްޗަށް އުމުރުދުވަހުގެ ޖަލު ހުކުމެއް މިއަދު އިއްވައިފިއެވެ.
ފިލިޕީންސްއަށް ނިސްބަތްވާ މާވިންގެ މައްޗަށް ކްރިމިނަލް ކޯޓުގައި ކުރިއަށްދިޔަ ހުކުމް އިއްވުމުގެ މަޖިލީހުގައި ދައުލަތުން ވަނީ އެދިފައިވަނީ އޭނާ 25 އަހަރަށް ޖަލަށް ލުމަށެވެ. ދައުވާގައި ދައުލަތުން ވަނީ މާވިން އަކީ އަނިޔާލިބުނު ފިރިމީހާގެ އިތުރުން ދަރިފުޅުގެ ބައްޕަކަން ފާހަގަކޮށްފައެވެ. އެގޮތުން އޭނާގެ އަމަލުގައި ރަހުމެއް ނެތަތީވެ ދައުލަތުން ވަނީ ދޭވެން އޮންނަ އެންމެ ބޮޑު އަދަބެއް ދިނުމަށް އެދިފައެވެ.
މި މައްސަލާގައި މާވިންގެ މައްޗަށް ހުކުމް އިއްވާފައިމިވަނީ ކްރިމިނަލް ކޯޓުގައި މައްސަލަ ކުރިއަށްދާތާ ހަތަރު އަހަރަށްވުރެ ގިނަދުވަސް ވެފައިވަނިކޮށްކަން ފާހަގަކޮށްލެވެއެވެ.
2021 ވަނަ އަހަރުގެ އޮކްޓޯބަރު މަހުގެ 19 ވަނަ ދުވަހު މޭރީ މަރާލާފައި ހުއްޓާ ފެނުނީ އޭނާ ދިރިއުޅޭ ގޭގެ ކޮޓަރި ތެރެއިންނެވެ. މޭރީގެ މަރު ރިޕޯޓްކޮށް، ހަށިގަނޑު ހޮސްޕިޓަލަށް ގެންދިޔައީ އޭނާގެ ފިރިމީހާ މާވިން އެވެ. މާވިން ބުނީ އޭނާއަށް ގްރޭސް ފެނުނީ ދަންޖެހި އަމިއްލައަށް މަރުވެފައި ހުއްޓާ ކަމަށެވެ.
މޭރީ މަރުގެ މައްސަލާގައި ތުހުމަތުކުރެވޭ ހަލީމަތު ލަމްހާގެ މައްޗަށްވެސް މިއަދު ހުކުމް އިއްވުމަށް ވަނީ ތާވަލްކޮށްފައެވެ. ލަމްހާގެ މައްޗަށް ވަނީ މޭރީ މަރާލުމުގައި ބައިވެރިވި ކަމުގެ ދައުވާގެ އިތުރަށް އައިޖީއެމްއެޗްއިން ހުއްދަ ނަގައިގެން ނޫނީ އެ ހޮސްޕިޓަލުން ނުގެންދެވޭ ނުރައްކާތެރި ބޭސްތަކެއް ގެންދިޔަ މައްސަލަގާއި އިތުރު ދެ ދައުވާއެއް ކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
