ކޮންގްރެސް ޕާޓީގެ މަތީ މަޖިލީހުގެ 49 މަގާމަކަށް ހުޅުވާލައިފި، ހަ ނާއިބުން އިންތިހާބުކުރާނެ
ލިޔުންތެރިޔާ
އަހުމަދު ހަމީދު އާދަމް
ސަރުކާރު ހިންގާ ޕީޕަަލްސް ނެޝަނަލް ކޮންގްރެެސް (ޕީއެންސީ) ގެ މަތީ މަޖިލީހުގައި އިންތިހާބު ކުރުމަށް ހަމަޖެހިފައިވާ މަގާމުތަކަށް ކުރިމަތިލާން ހުޅުވާލައިފިއެވެ.
އެ ޕާޓީން މިރޭ ބުނީ ޕީއެންސީގެ އަސާސީ ގަވާއިދުގެ ދަށުން ލާޒިމްކުރާ ކޮންގްރެސް ނުވަތަ މަތީ މަޖިލީހުގައި މަގާމުތަކަށް މެންބަރުން އިންތިހާބު ކުރުމަށް އެ މަގާމުތަކަށް ހުޅުވާލާ ކަމަށެވެ. ޖުމްލަ 49 މަގާމަށް ވަނީ ހުޅުވާލާފަ އެވެ.
އޭގެ ތެރޭގައި ޕާޓީގެ ނާއިބު ރައީސުންގެ ހަ މަގާމު ހިމެނެ އެވެ. ދެން ހިމެނެނީ މެންބަރުންގެ މަޖލީހުގެ 18 މަގާމަކާއި އެ މަޖިލީހަށް އިންތިހާބުކުރާ ޒުވާން 7 މެންބަރުންގެ މަގާމާއި މަޖިލީހުގަައި އަންހެންނަށް ހާއްސަ ކުރެވޭ 10 މަގާމެވެ.
މީގެ އިތުރުން އަންހެނުންގެ ހަރަކާތުގެ ރައީސާއި އަންހެނުންގެ ހަރަކާތުގެ ނައިބު ރައީސާއި އަންހެނުންގެ ހަރަކާތުގެ ސެކްރެޓަރީ އާއި އަންހެނުންގެ ހަރަކާތުގެ ހަޒާންދާރު މަގާމު ހިމެނެ އެވެ.
އަދި ޒުވާނުންގެ ހަރަކާތުގެ ރައީސާއި ޒުވާނުންގެ ހަރަކާތުގެ ނައިބު ރައީސާއި ޒުވާނުންގެ ހަރަކާތުގެ ސެކްރެޓަރީ އާއި ޒުވާނުންގެ ހަރަކާތުގެ ޚަޒާންދާރުގެ މަގާމު ހިމެނެ އެވެ.
މި މަގާމުތަކަށް ކުރިމަތިލުމުގެ ފުރުސަތު މި މަހުގެ 8 ވަނަ ދުވަހުގެ ނިޔަލަށް އޮންނާނެ އެވެ.
މި މަހު ފަހުކޮޅު ކޮންގްރެސްގެ މަތީ މަޖިލީސް އޮންނައިރު މަގާމުތަކަށް ބޮޑު ވާދައެއް އެބަ އޮތެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
