ގޯތީގެ ލިޔުން ހަވާލުނުކުރެވޭ ފަރާތްތަކަށް މިއަދު ލިޔުން ހަވާލުކުރަނީ

ނިމިދިޔަ ރައީސް އިބުރާހިމް މުހައްމަދު ޞާލިހްގެ ސަރުކާރުގެ އެންމެ ފަހު ދުވަސްކޮޅު "ބިންވެރިޔާ" ސްކީމުގެ ދަށުން ދޫކުރި ގޯތިތަކުން މިހާރު ރަޖިސްޓްރީ ހަވާލު ނުކުރެވިވާ ފަރާތްތަކަށް އަންނަ އަންގާރަ ދުވަހުން ފެށިގެން ރަޖިސްޓްރީ އާއި ހަވާލުވުމަށް އަންގަމުން ދާނެކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން ވިދާޅުވެއްޖެއެވެ.

އެކަން ހާމަކޮށްފައިވަނީ އެމިނިސްޓްރީގެ ފަރާތުން މިއަދު ނެރުނު ނޫސް ބަޔާނެއްގައެވެ. އެނޫސް ބަޔާނުގައި ބުނެފައިވަނީ ގޯތި ލިބުނު ފަރާތްތަކަށް ގޯތީގެ ރަޖިސްޓަރީ އަދި ގޯތި ލިބުނުކަމުގެ ލިޔުމާއި ހަވާލު ނުވާ ފަރާތްތަކާއި ހަވާލުކުރުން، އަންގާރަ ދުވަހުން ފެށިގެން ރަސްމީ ދުވަސްތަކުގެ މެންދުރު 14:00 އިން ފެށިގެން އިރުއޮއްސި 18:00 އާއި ދެމެދު އެ ވުޒާރާގައި ކުރިއަށް ގެންދިޔުމަށް ހަމަޖެހިފައިވާ ކަމަށެވެ.

މިނިސްޓްރީގެ ބަޔާނުގައި އިތުރަށް ބުނެފައިވަނީ  އެ މަސައްކަތް ކުރިއަށް ގެންދިއުމަށް ނިންމާފައިވަނީ އެ ދުވަހަކަށް ސޮއިކުރުމަށް ވަޑައިގަންނަވާ ފަރާތްތަކަށް ހާޟިރުވެލައްވާނެ ގަޑި އަދި ތާރީޚް އެ މިނިސްޓްރީގެ ފަރާތަކުން އެފަރާތްތަކަށް އަންގާ ތަރުތީބުން ތާވަލް ކުރެވިގެން ކަމަށެވެ.

މި ސަރުކާރު ވެރިކަމަށް އައުމަށް ވެވަޑައިގެންނެވި އެއް ވައުދަކީ ނިމިދިޔަ ސަރުކާރުން ދޫކޮށްފައިވާ އެއްވެސް ގޯއްޗެއް އަދި ފުލެޓެއްވިޔަސް އަތު ނުލާނެކަމުގެ ވަޢުދެވެ. އަދި ރައީސް ޞާލިޙްގެ ސަރުކާރުން މޫދުންނާއި ފަޅުފަޅުން ދީފައިވަ ގޯތިތައް ހިއްކާ އެތަންތަނުގެ ޙައްޤުވެރި ފަރާތްތަކާއި ހަވާލުކުރާނެކަމުގެ ވަޢުދެވެ.

އެގޮތުން މިހާރު މި ސަރުކާރުންވަނީ ހުލުމާލެ ފޭސް 3 އާއި ގިރާވަރުފަޅާއި ގުޅީފަޅު ހިއްކަށް ފަށާފައެވެ. އަދި މީގެ އިތުރުން ރައީސްޑރ.މުހައްމަދު މުއިއްޒުގެ ސަރުކާރުން ވަނީ މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ހޯދައި ދިނުމަށް ބިޔަ ބޮޑު މަޝްރޫޢުއެއް "ރަސްމާލެ" ނަމުގައި ފުށިދިއްގަރު ފަޅުގައި ފައްޓާފައެވެ.