260 މިލިޔަން ރުފިޔާގެ މަސްތުވާތަކެތި ދިވެހި ފުުލުހުން އަތުލައިގެންފި

މޯލްޑިވްސް ޕޮލިސް ސާވިސްގެ ފަރާތުން ގދ.އަތޮޅުގައި ހިންގި ޚާއްސަ އޮޕަރޭޝަނެއްގައި ފަޅުރަށެއްގެ ގޮނޑުދޮށުގައި ވަޅުލާފައިހުރި 260މިލިޔަން ރުފިޔާގެ މަސްތުވާތަކެތި އަތުލައިގެންފިއެވެ.

ފުލުހުން ބުނެފައިވަނީ 150 ކިލޯގެ މަސްތުވާތަކެތި ފެނިފައިވާއިރު، އެއީ ކަނޑުމަގުން ރާއްޖެއަށް އެތެރެކޮށްފައިވާ ތަކެތި ކަމަށެވެ.

އެ މަސްތުވާތަކެތި ހޯދުނީ ފުލުހުންގެ ކްރިމިނަލް އިންވެސްޓިގޭޝަން ކޮމާންޑާއި، ޑިވިޝަން ޕޮލިސިން ކޮމާންޑާއި، ޑްރަގް އިންޓެލިޖެންސް ޔުނިޓް ގުޅިގެން ފާއިތުވި 72 ގަޑިއިރު ގދ. އަތޮޅުގެ ކަނޑުގެ ސަރަހައްދާއި ފަޅުރަށްތަކުގައި ހިންގި އޮޕަރޭޝަނެއްގެ ތެރެއިން ކަމަށް ވެސް ފުލުހުން ބުނެފައިވެއެވެ.

އެ މަސްތުވާތަކެތި ހޯދާފައި ވަނީ ގދ. އަތޮޅުގެ ކޮން ފަޅު ރަށަކުން ކަމެއް ހާމަކޮށްފައެއް ނުވެއެވެ.

މި އޮޕަރޭޝަންގެ އިތުރު ތަފްސީލްތައް ފަހުން ހާމަކުރާނެކަމަށް ފުލުހުން ވަނީ ބުނެފައެވެ. މި މައްސަލައާއި ގުޅިގެން ފަސް މީހަކު ވަނީ ހައްޔަރުކޮށްފައެވެ.