އަލް-ޤުދުސް ގައި ހުންނަ އދ. ގެ މައި އޮފީސް ބަންދުކޮށްފި

އިރުމަތީ ޤުދުސްގައި ހުންނަ އދ. ގެ މައި އޮފީހުގައި އިސްރާއީލުން ރޯކޮށްލުމާ ގުޅިގެން އެ އޮފީސް ވަގުތީ ގޮތުން ބަންދު ކޮށްފިއެވެ.

ފަލަސްޠީނުގެ ޤުދުސްގައި ހުންނަ އެ އޮފީހުގެ ވެރިޔާ ފިލިޕް ލަޒާރިނީ ވިދާޅުވިގޮތުގައި، ފާއިތުވި ހަފްތާތަކުގައި ޔަހޫދީން ދިޔައީ އެ އޮފީހަށް އެކި ވަރުގެ ހަމަލާތައް ދެމުންނެވެ. އެގޮތުން އިއްޔެ އެ އޮފީހުގައި ދެ ފަހަރު އަލިފާން ރޯކޮށްލާފައިވާ ކަމަށްވެސް ފިލިޕް ލަޒާރިނީ ވިދާޅުވިއެވެ.

އދ. ގެ އުޅަނދުތަކަށް ބޭނުންވާ ތެޔޮވެސް ރައްކާ ކޮށްފައި ހުންނަ އެ އޮފީހުގައި ހުޅުޖެހި ވަގުތު، އޮފީހުގައި ގިނަ މުވައްޒަފުންތަކެއް ތިބިނަމަވެސް އެއްވެސް މުވައްޒަފަކަށް އަނިޔާއެއް ލިބިފައިވާކަމަށް ރިޕޯޓުކޮށްފައެއް ނުވެއެވެ. ނަމަވެސް އަލިފާނުގެ ސަބަބުން އޮފީހުގެ ގޯތިތެރެއަށް ވަނީ ބޮޑެތި ގެއްލުންތަކެއް ލިބިފައެވެ.

ފިލިޕް ލަޒާރިނީ އިތުރަށް ވިދާާޅުވީ، އެ އޮފީހުގެ ބޭރުގައި ޔަހޫދީން މުޒާހަރާ ކުރަމުންދާތާވެސް ދެ މަސް ދުވަސް ވެއްޖެ ކަމަށެވެ. އެގޮތުން، މިހަފްތާ ކުރި މުޒާހަރާއެއްގައި މުވައްޒަފުންނާއި، އިމާރާތާއި ދިމާލަށް ގައު އުކާ، އެތައް ފަހަރެއްގެ މަތިން ޔަހޫދީން ވަނީ އެ އޭޖެންސީގެ މުވައްޒަފުންނަށް ބަޑިން ބިރު ދައްކާފައި ކަމަށްވެސް ލަޒާރިނީ ވިދާޅުވިއެވެ.

ނިރުބަވެރި އިސްރާއީލުން ދަނީ ޣައްޒާގައި ހިންގަމުންދާ ޤަތުލުޢާންމުގެ އިތުރުން ހުޅަނގު އައްސޭރީގައިވެސް އެތައްބަޔަކު ޝަހީދުކޮށް، ޚާއްސަކޮށް ފަލަސްޠީނުގެ ރައްޔިތުންގެ ޙައްޤުގައި މަސައްކަތް ކުރަމުންދާ ފަރާތްތަކަށް އަމާޒުކޮށް ހަމަލާދެމުންނެވެ. އެގޮތުން މިދިޔަ އާދިއްތަ ދުވަހުވެސް އިސްރާއީލުން ވަނީ އިސްރާއީލުގައި އަލްޖަޒީރާ ދެއްކުން މަނާކޮށް، އިސްރާއީލުގައި ހުންނަ އަލްޖަޒީރާގެ އޮފީސްވެސް ބަންދުކޮށްފައިކަން ފާހަގަކޮށްލެވެއެެވެ.

މިދިޔަ އަހަރުގެ އޮކްޓޯބަރުގެ 7 ވަނަ ދުވަހަަށް ފަހު މިހާތަނަށް، ނިރުބަވެރި އިސްރާއީލުން ވަނީ ޣައްޒާގައި މަދުވެގެން 34،904 މީހުން ޝަހީދުކޮށްލާފައެވެ. މީގެ ތެރޭގައި 14،500 އަށް ވުރެ ގިނަ ކުޑަކުދިން ހިމެނެއެވެ. މީގެ އިތުރުން ޣައްޒާގައި 78،514 މީހުން ޒަޚަމްވެފައި ވާއިރު، 8،000 މީހުން ވަނީ ގެއްލިފައެވެ. ވޭތުވެ ދިޔަ 7 މަސް ތެރޭ، އިސްރާއީލުން، ފަލަސްޠީނުގެ ހުޅަނގު އައްސޭރިން މަދުވެގެން 498 މީހުން ޝަހީދުކޮށްލާފައިވާއިރު، މީގެ ތެރެއިން 124 ޝަހީދުންނަކީ ކުޑަކުދިންނެވެ. އިސްރާއިލުން ދެމުންދާ ލާއިންސާނީ ހަމަލާތަކުގައި، ހުޅަނގު އައްސޭރިން މިހާތަނަށް 4،950 މީހުން ވަނީ ޒަޚަމްވެފައެވެ.