އިނގިރޭސިވިލާތުގެ ސަފީރުކަމަށް ޖަމީލާ ޢަލީގެ ނަން މަޖިލީހަށް

އިނގިރޭސިވިލާތުގައި ހުންނަވާ ދިވެހި ސަފީރުގެ މަޤާމަށް ޖަމީލާ ޢަލީ ޚާލިދު ޢައްޔަންކުރެއްވުމަށް ރުހުން ހޯދުމަށް ރައީސުލްޖުމްހޫރިއްޔާ މިއަދު ރައްޔިތުންގެ މަޖިލީހަށް ހުށަހަޅުއްވައިފިއެވެ.

މިއަދުގެ ޖަލްސާގައި ރިޔާސަތުން ވަނީ ރައީސުލްޖުމްހޫރިއްޔާގެ ސިޓީފުޅު އިއްވަވައިފައެވެ. ފޮރިން ސާވިސްގެ ޤާނޫނުގެ ދަށުން ހުށަހެޅުނު މި މައްސަލަ ދިރާސާކުރުމަށް މަޖިލީހުގެ ޚާރިޖީ ގުޅުންތަކުގެ ކޮމިޓީއަށް މިހާރު ވަނީ ފޮނުވައިފައެވެ.

ކުރިން އެ މަޤާމުގައި ހުންނެވީ އިރުތިޝާމް އާދަމެވެ. އޭނާ 2024 ވަނަ އަހަރުގެ ޑިސެމްބަރުން ފެށިގެން 2026 ވަނަ އަހަރުގެ އެޕްރީލް 14 ވަނަ ދުވަހާ ހަމައަށް ސަފީރުކަން އަދާކުރެއްވުމަށްފަހު ފޮރިން މިނިސްޓަރުކަމާ ހަވާލުވެވަޑައިގެންނެވުމުން އެ މަޤާމު ހުސްވީއެވެ.

ޖަމީލާއަކީ ދައުލަތުގެ އެކި ފެންތަކުގައި ޚިދުމަތްކުރައްވައިފައިވާ ބޭފުޅެކެވެ. އެގޮތުން 2017 ވަނަ އަހަރުން 2019 ވަނަ އަހަރަށް ޖަރުމަނުވިލާތުގައި ހުންނެވި ފުރަތަމަ ދިވެހި ސަފީރުގެ މަގާމު އަދާކުރެއްވިއެވެ.

އޭގެ އިތުރުން ސިވިލް ސާވިސް ކޮމިޝަނުގެ ނައިބު ރައީސްކަމާއި ތަޢުލީމީ ދާއިރާ އާއި މީޑިއާގެ ދާއިރާގައި ވެސް ގިނަ އަހަރުތަކެއް ވަންދެން މަސައްކަތްކުރައްވައިފައިވެއެވެ.

މިހާރު އޭނާ ހުންނެވީ ފޮރިން މިނިސްޓްރީގެ އެމްބެސެޑާ އެޓް ލާޖުގެ މަޤާމުގައެވެ.