ސާންތި އަވަހާރަވުމަކީ ދިވެހި ކުޅިވަރަށް ލިބުނު ހިތާމައެއް، ހުސްކަމެއް: ރައީސް

މަޝްހޫރު ފުޓްބޯޅަ ކޯޗު އިޙްސާން ޢަބްދުލްޣަނީ (ސާންތީ) އަވަހާރަވުމަކީ، ދިވެހި ކުޅިވަރުގެ ދާއިރާއަށް ލިބުނު ބޮޑު ހިތާމައެއް އަދި ހުސްކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ސާންތި އަވަހާރަވުމާއި ގުޅިގެން ހިތާމަފާޅު ކުރައްވާ އެކްސްގައި ކުރެއްވި ޕޯސްޓެއްގަ އެވެ.

‏ރައީސްގެ ޕޯސްޓްގައި ވިދާޅުވީ ސާންތި ވަނީ ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާމީ އަދި ޤައުމީ ފެންވަރުގައިވެސް ދިވެހިރާއްޖެ ފަޚުރުވެރިވާ ޚިދުމަތްތަކެއް ޤައުމަށް ކޮށްދެއްވާފައި ކަމަށެވެ.

‏”ހިތާމައިގެ މިވަގުތު ކުޅިވަރުގެ ދާއިރާގެ ހުރިހާ ޚިދުމަތްތެރީންނަށް އަދި މަރުޙޫމްގެ ލޮބުވެތި ޢާއިލާއަށް ތަޢުޒިޔާ ދަންނަވަން،”

ސާންތި އަވަހާރަވީ ކެންސަރަށް ފަރުވާ ހޯއްދަވަމުން ގެންދަވަނިކޮށް މިރޭ ޓްރީޓޮޕް ހޮސްޕިޓަލްގަ އެވެ. ހާލު ގޯސްވެ ހޮސްޕިޓަލްގައި ފަރުވާ ދެމުންދާތާ ދެތީން ދުވަސް ވެއްޖެ އެވެ.

ސާންތި ފާހަގަކުރެވިފައި ވަނީ ދިވެހި ފުޓްބޯޅަ ތާރީހު ދުށް އެންމެ މޮޅު ކޯޗުންގެ ތެރޭގަ އެވެ. ގައުމީ ފުޓްބޯޅަ ޓީމާއި ބައެއް ކުލަބުތަކަށް ވަރަށް ހިދުމަތް ކުރެއްވި އެވެ.

ފުރަތަމަ ފަހަރަށް ދިވެހި ގައުމީ ޓީމު ރަން މެޑަލް ހާސިލުކުރިއިރު ގައުމީ ފުޓްބޯޅަ ޓީމުގެ އެސިސްޓެންޓް ކޯޗްގެ މަގާމުގައި ހުންނެވީ ސާންތި އެވެ. ސާންތި ވަނީ ޔުނައިޑެޓް ވިކްރީ އާއި އީގަލްސްއަށް ކޯޗްކަން ކޮށްދީފަ އެވެ.

ސާންތި ވަނީ އެފްއޭއެމްގެ ޓެކްނިކަލް ޑައިރެކްޓަރުގެ މަގާމު ވެސް އަދާކުރައްވާފަ އެވެ. އޭނާ އަކީ މި ދާއިރާ އިން މަތީ ތައުލީމު ހާސިލުކޮށްގެން ހުރި ވަރަށް ތައުލީމީ ބޭފުޅެކެވެ.

ކުޅިވަރުގެ އާއިލާގެ ވަރަށް ބޮޑު ލޯތްބެއް ހޯއްދަވާފައިވެ އެވެ. އެއީ އެހެން ޓީމުތަކާއި ކުޅުންތެރީންނަށް ސާންތި އަދާކުރެއްވި އިހްތިރާމާއި ބެހެއްޓެވި ގާތް ކަމުގެ ސަބަބުންނެވެ.