ކަންކަމަށް ދަހިވެތި ވުމުގެ ސަބަބުން ސްކޭމް ތަކުގައި ޖެހޭ މީހުންނަށްވެސް ޕެނަލްޓީއެއް އޮންނަންޖެހޭ: އިބްރާޙީމް

ކަންކަމަށް ދަހިވެތި ވުމުގެ ސަބަބުން، އެކިއެކި ސްކޭމް ތަކުގައި ޖެހޭ މީހުންނަށްވެސް އަދަބެއް ދެވެންޖެހޭ ކަމަށް ރައްޔިތުންގެ މަޖިލީހުގެ މައްޗަންގޯޅީ އުތުރު ދާއިރާގެ މެންބަރު އިބްރާޙީމް މުހައްމަދު ( އިއްބެ ޖަނާބު ) ވިދާޅުވެއްޖެއެވެ.

ސްކޭމްތަކުން ހޯދާ ފައިސާ ޖަމާކުރާ އެކައުންޓްތައް ކޯޓު އަމުރެއް ނެތި ފްރީޒް ކުރަން އެމްޑީޕީގެ މެންބަރު މުހައްމަދު އިބްރާހިމް (ކުޑޫ) ޖިނާއީ އިޖުރާއަތުގެ ޤާނޫނަށް ހުށަހެޅި އިސްލާހުގެ ބަހުސް މިއަދު މަޖިލީހުގައި ވަނީ ކުރިއަށް ގެންގޮސްފައެވެ.

އެ އަށް ބަހުސް ކުރައްވަމުން ބައެއް މެންބަރުން ވަނީ، މީހުންގެ ފޮޓޯ ފޮނުވައި ވަކި ލިންކަކަށް ފިތުމަށް އެދިގެންނާއި، އެކިއެކި އިނާމްތަކާއި އެނޫންވެސް އެއްޗެއް ލިބޭނެ ކަމަށް ބުނެ، މީހުން ސްކޭމްތަކުގައި ޖައްސަމުންދާކަން ފާހަގަކުރައްވާފައެވެ.

އެކަން ފާހަގަކުރައްވައި، އިއްބެ ވަނީ، ޖިނާޢީ އިޖުރާޢަތުގެ ގާނޫނަށް އިސްލާހު ގެނެވޭއިރު، ކަންކަމަށް ދަހިވެތިވެ ނާޖާއިޒް ގޮތުގައި ފައިސާ ހޯދަން ބޭނުން ވުމުގެ ސަބަބުން، ސްކޭމް ތަކުގައި ޖެހޭ މީހުންނަށްވެސް އަދަބެއް ގާނޫނުން ކަނޑައަޅަންޖެހޭ ކަމަށް ވިދާޅުވެފައެވެ.

ދެންމެ އިއްޒަތްތެރި މެންބަރަކު ފާހަގަ ކުރައްވައިފި ރައްޔިތުންގެ ތެރޭގައި ސްކޭމްގައިޖެހޭ ވަރަށް ގިނަ މީހުން ތިބި ކަމަށް. އެހެން ކަމަށް ވާނަމަ ސްކޭމްގައި ޖެހޭ މީހުން މި ޖެހެނީ ދަހިވެތިކަމުގެ ސަބަބުން. ދަހިވެތިކަމުގެ އިންތިހާއަކީ މީހާ ނުބައި ނަތީޖާތަކެއްގެ ތެރެއަށް ވައްޓާލާ ކަމެއް. އެހެންްކަމުން، ގިނަ ފައިދާ، ނުވަތަ ނާޖާއިސް ގޮތުގައި ފައިސާ ހޯދަން ބޭނުންވެގެން އެކިއެކި ޕްރޮގްރާމް ތަކަށް ވަންނަން ބޭނުންވާ މީހުންނަށްވެސް އަަޅުގަނޑަށް ހީވަނީ ކޮންމެވެސް ކަހަލަ ޕެނަލްޓީއެއް އޮންނަންޖެހޭނެ ހެން

މައްޗަންގޯޅީ އުތުރު ދާއިރާގެ މެންބަރު އިބްރާޙީމް މުހައްމަދު ( އިއްބެ ޖަނާބު )

އަދި އެފަދައިން އަދަބު ކަނޑައެޅުމަކީ، ރައްޔިތުން ޒިންމާދާރު ކުރެވޭނެ ގޮތެއް  ކަމަށްވެސް މެންބަރު ފާހަގަކުރެއްވިއެވެ.