ދޫންޏަށް ވޯޓް ދީގެން ވާނީ ފައިދާ، ގެއްލުމެއްވާ ކަމެއް ނުކުރާނެ: ރައީސް

ދޫންޏަށް ވޯޓް ދީގެން ވާނީ ފައިދާ ކަމަށާ އެމަނިކުފާނުގެ ވެރިކަމެއްގައި ރައްޔިތަކަށް ގެއްލުމެއް އޮތް ކަމެއްގައި ނާހާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

މިރޭ އޮތް ދަ ގްރޭޓާ އައްޑޫ ވިޝަންގެ ތަފްސީލު ލޯންޗުކުރުމުގެ ހަފްލާގައި ރައީސް ވަނީ އައްޑޫ ސިޓީގެ ކައުންސިލްގެ ހުރިހާ ގޮނޑިއަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ ހުރިހާ ގޮނޑިތަކަކަށް ޕީއެންސީގެ ކެންޑިޑޭޓުން ހޮވައިދިނުމަށް އެދިވަޑައިގެންފަ އެވެ.

އަންނަ މަހުގެ ހަތަރުވަނަ ދުވަހު އޮންނަ އިންތިހާބުގައި ވާދަކުރާ ޕީއެންސީގެ ހުރިހާ ކެންޑިޑޭޓުންނަށް ވޯޓް ދެއްވުމަށާއި އެ ދުވަހު ނަގާ ފެންނަ ނުފެންނަ ވޯޓްގައި "އާއެކޭ" އަށް ވޯޓް ދެއްވުމަށް ވެސް އެމަނިކުފާނު އެދިވަޑައިގަތެވެ. ރައީސް ވިދާޅުވީ އެމަނިކުފާނުގެ ވެރިކަމެއްގައި ރައްޔިތަކަށް ގެއްލުމެއް އޮތް ކަމެއްގައި ވޯޓަށް ނާހާނެ ކަމަށެވެ.

އަދި ފައިދާއެއް އޮތް ކަމެއް މެނުއީ ތަންފީޒު ނުކުރައްވާނެ ކަމުގެ ޔަގީންކަން ދެއްވި އެވެ. އަދި ވިދާޅުވީ އެމަނިކުފާނުގެ ތާއީދާއެކު ޕީއެންސީން ކުރިމަތިލީ އެއްވެސް ކެންޑިޑޭޓަކަށް ވޯޓް ދީގެން ގެއްލުމެއް ނުވާނެ ކަމަށެވެ.

"ދޫންޏަށް ވޯޓް ދީގެން ވާނީ ފައިދާ," ޕީއެންސީގެ ލޯގޯގައިވާ ދޫންޏަށް އިޝާރާތް ކުރައްވާ ރައީސް ވިދާޅުވި އެވެ.