ދޮގު މައުލޫމާތުދޭ މައްސަލަ ތަހުޤީގުކުރަން ނިންމީ މަޖިލީހުގައި ތެދުވެރިކަމަށް ބާރުއަޅަން: ރައީސް ނަޝީދު
ދައުލަތުގެ މުއައްސަސާތަކުގެ އިސްވެރިން ރައްޔިތުންގެ މަޖިލީހުގެ ކޮމެޓީތަކަށް ދޮގު މައުލޫމާތުދޭ މައްސަލަ ތަހުގީގުކުރަން ނިންމީ މަޖިލީހުގައި ތެދު ވަހުން ވާހަކަދައްކަން ބާރު އެޅުމުގެ ގޮތުން ކަމަށް މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ބޭއްވި ރައްޔިތުންގެ މަޖަިލީހުގެ ޖަލްސާ ފެށުމުގެ ގޮތުން ދެއްކެވި ވާހަކަފުޅުގައެވެ.
ރައީސް ނަޝީދު ވިދާޅުވީ، ބީއެމްއެލްގެ އޮފިޝަލް މަޖިލީހުގެ ކޮމިޓީއެއްގައި ތެދު ބަހުން ވާހަކަ ދެއްކެވިކަމަށް ދެކެވަޑައިނުގެން، އެމައްސަލަ ތަހުގީގަށް ފޮނުވުމާއެކު އެ އޮފިޝަލް މަޖިލީހަށް ސީޓިއެއް ފޮނުއްވާފައިވާ ކަމަށެވެ.
އަދި ބޭންކުގެ އޮފިޝަލް މިހާރު މަޖިލީހުގެ މާލިއްޔަތު ކޮމިޓީން އެދޭގޮތަށް އެއްބާރުލުން ދެއްވަމުން ގެންދަވާނެ ކަމަށް އުންމީދުކުރައްވާ ކަމަށާއި އަދި ސާފުބަހުން ވިދާޅުވެ ތެދުބަހުން ވާހަކަދައްކަވާނެ ކަމަށް އޭނާ ފޮނުއްވި ސިޓީން ސާފުވާ ކަމަށް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ބޭންކުގެ އޮފިޝަލްގެ އެ ސިޓީއާ ގުޅިގެން މާލިއްޔަތު ކޮމިޓީގެ މުގައްރިރާ ވާހަކަ ދެއްކެވުމަށްފަހު، މަޖިލީހުން ފުލުހުންނަށް ހުށަހެޅި މައްސަލައާމެދު އަލުން ވިސްނެވުމަށް މިހާރު ނިންމާފައިވާނެ ކަމަށެވެ.
އަދި ދޮގު މައުލޫމާތު ދޭ މީހުންގެ މައްސަލަ ތަހުގީގުކޮށް ދައުވާކުރަން ނިންމީ އެއްވެސް ހާލެއްގައި އެމީހަކަށް އުގޫބާތެއް ދިނުމުގެ ގޮތުން ނޫން ކަމަށް ނަޝީދު ވިދާޅުވިއެވެ.
މާލިއްޔަތު ކޮމެޓީއަށް ދޮގު މައުލޫމާތު ދިން ކަމަަށް ތުހުމަތުކޮށް، ބީއެމްއެލްގެ ޑެޕިއުޓީ ސީއީއޯ މުހައްމަދު ޝަރީފްގެ މައްސަލަ ތަހުގީގު ކުރަން ފުލުހުންގެ އިދާރާއަށް ވަނީ ހުށަހަޅައިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
