އެންސްޕާގެ އޯޑިޓް ރިޕޯރޓް: އެހީ ދޭން ނުޖެހޭ ފަރާތްތަކަށް 18 މިލިއަން ރުފިޔާ އިތުރަށް ދޫކޮށްފައިވޭ

ނެޝަނަލް ސޯޝަލް ޕްރޮޓެކްޝަން އެޖެންސީ، އެންސްޕާގެ 2022 ވަނަ އަހަރުގެ އޮޑިޓް ރިޕޯޓުގައިވާ ގޮތުން އެ އެޖެންސީން  އެހީދޭން ނުޖެހޭ ފަރާތްތަކަކަށް 18 މިލިއަން ރުފިޔާ ވަނީ އިތުރަށް ދޫކޮށްފައެވެ.

ރިޕޯޓުގައި ވާގޮތުން، 2021 ވަނަ އަހަރުގެ ނިޔަލަށް އެންސްޕާއަށް 18،466،814 ރުފިޔާ އަނބުރާ ލިބެންޖެހެއެވެ. އޭގެ ތެރޭގައި ހިމެނެނީ އެކަނި ދަރިން ބަލަހައްޓާ މައިންނާއި ބަފައިންނަށް ދޭ އެލަވަންސްގެ ގޮތުގައި ދޫކޮށްފައިވާ 10,621,020 ރުފިޔާ އާއި ނުކުޅެދުންތެރިކަން ހުންނަ ފަރާތްތަކަށް ދޭ ތަޕިއުޓިކް އެހީގެ ގޮތުގައި ދޫކޮށްފައިވާ 7,611,500 ރުފިޔާ އާއި އަދި ނުކުޅެދުންތެރިކަން ހުންނަ ފަރާތްތަކަށް ދޭ މާލީ އެހީގެ ގޮތުގައި ދޫކޮށްފައިވާ 234,294 ރުފިޔާއެވެ.

އެންސްޕާގެ އޮޑިޓް ރިޕޯރޓުގައިވާ ގޮތުން އެހީގެ ގޮތުގައި އެކި ފަރާތްތަކަށް އެންސްޕާއިން ދޭ ފައިސާ އިތުރަށް ދެވިފައިވަނީ އެހީ ލިބޭ ފަރާތްތަކުގެ ހާލަތު ބަދަލުވުމަށްފަހު ނުވަތަ ނިޔާވާ ފަރާތްތަކުގެ މައުލޫމާތު އެންސްޕާއާ ފަސޭހަކަމާއި އެކު ހިއްސާކުރެވޭނެ އިންތިޒާމު ހަމަޖެހިފައި ނެތުމުގެ ސަބަބުންނެވެ.

އެންސްޕާއިން އެގޮތަށް އިތުރަށް ޖަމާކުރެވިފައިވާ ފައިސާ އަނބުރާ ހޯދުމަށްޓަކައި އެ އެޖެންސީގައި ރިކަވަރީ ޔުނިޓެއް ގާއިމްކުރެވިފައިވާ ކަމަށާއި، އެހެން ނަމަވެސް އެ ޔުނިޓުގައި މަސައްކަތް ކުރަނީ އެންމެ މުވައްޒަފެއް ކަމަށްވުމުން ރިކަވަރީގެ މަސައްކަތްތައް ކުރިއަށްގެންދަން ބޭނުންވާ ގޮތަށް އަދި އަވަސްމިނުގައި އެ މަސައްކަތް ކުރިއަށް ނުގެންދެވޭ ކަމަށް އެ އެޖެންސީން ބުނެފައިވާ ކަމަށެވެ.

އެސްޕާގެ އޮޑިޓް ރިޕޯޓުގައި އިތުރަށް ބުނެފައިވާ ގޮތުގައި  އޮގަސްޓު 16، 2023 ގެ ނިޔަލަށް އެއިން އެއްވެސް ފައިސާއެއް އެސްޕާއަށް ހޯދިފައެއް ވެސް ނުވެއެވެ. އެހެންކަމުން، އެންސްޕާއިން ދައުލަތުގެ މާލިއްޔަތުގެ ޤަވާއިދުގައި ބަޔާންކޮށްފައިވާ ގޮތަށް އެ ފައިސާ ހޯދުމަށް ޤަވާއިދުގައި ބަޔާންކޮށްފައިވާ މަސައްކަތް ކޮށްފައިނުވާކަމަށް ވެސް އެސްޕާގެ އޮޑިޓުގައި ފާހަގަކޮށްފައި ވެއެވެ.