އިތުރު 3 އަތޮޅަކަށް އާރްޓީއެލް ފެރީގެ ޚިދުމަތް ފަށަނީ

ކުރީގެ ރައީސް، އިބްރާހިމް މުހައްމަދު ޞާލިހުގެ ސަރުކާރުގައި، ފެށި ރާއްޖެ ޓްރާންސްޕޯޓް ލިންކު، އާރްޓީއެލް ފެރީގެ ހިދުމަތް މިއަހަރު ނިމުމުގެ ކުރިން އިތުރު 3 އަތޮޅެއްގައި ފެށުމަށް ސަރުކާރުން ނިންމައިފި އެވެ.

ދަތުރުފަތުރާއި ބެހޭ ވުޒާރާއިން އިއްޔެ ބޭއްވި ނޫސްވެރިންގެ ބައްދަލުވުމުގައި އެ ވުޒާރާގެ ވަޒީރު މުހައްމަދު އަމީން ވިދާޅުވީ ރައްޔިތުންނަށް މުހިއްމު ހިދުމަތެއް ކަމަށެވެ. އެހެން ކަމުން، އެ ހިދުމަތް ނުފެށި އޮތް ތިން އަތޮޅެއްގައި ޚިދުމަތް ފެށުމަށް ތައްޔާރީތައް ވަމުން އަންނަ ކަމަށް ވިދާޅުވިއެވެ.

އެގޮތުން ޚިދުމަތް ފެށުމަށް ނިންމާފައިވާ އަތޮޅު ތަކަކީ؛

• ނ އަތޮޅު. އެ އަތޮޅުގައި ޚިދުމަތް ފަށަން ސަރުކާރުން ނިންމާފައިވަނީ މި ފެށޭ ޖޫން މަހު

• ރ. އަތޮޅު. އެ އަތޮޅުގައި ޚިދުމަތް ފަށަން ނިންމާފައިވަނީ ކުރިއަށް އޮތް އޯގަސްޓް މަހު

• ބ. އަތޮޅު. އެ އަތޮޅުގައި ހިދުމަތް ފަށަން ނިންމާފައިވަނީ ސެޕްޓެމްބަރު މަހުގައި.

މީގެ އިތުރުން އަމީން ވިދާޅުވީ އާރްޓީއެލް ހިދުމަތުގައި ބޭނުންކުރާ ލޯންޗްތައް ދަތުރުކުރާ ބައެއް ރޫޓްތަކަށް ބަދަލުތައް ގެންނަމުންދާ ކަމަށެވެ. އެގޮތުން، ބައެއް ލޯންޗްތައް މަޑުކުރަން ނިންމާފައިވާ ސްޓޮޕްތަކަށް ބައެއް ބަދަލުތައް ގެންނަމުންދާ ކަމަށާއި އެ ބަދަލުތައް ގެންނަނީ ލޯންޗްގައި ދަތުރުކުރާ މީހުންގެ ތަފާސްހިސާބުތަކަށް ބަލައިގެން ކަމަށް ވަޒީރު ވިދާޅުވުއެވެ.

އާރްޓީއެލް ފެރީގެ ހިދުމަތް ރަސްމީކޮށް ފަށާފައިވަނީ 2023 ވަނަ އަހަރުގެ ޖޫން 12 ގައެވެ. އެ ޚިދުމަތް ފުރަތަމަ ފެށީ ޒޯން 1 ގައި ހިމެނޭ އަތޮޅުތަކުގެ ތެރެއިން ހއ. އަތޮޅުންނެވެ. މި އާރްޓީއެލްގެ ހިދުމަތް ދޭން ރާވާފައި އޮތީ ހަ ޒޯނަކަށް ބަހާލައިގެންނެވެ. އެގޮތުން މިހާރު 4 ޒޯނެއްގައި ހިދުމަތް ފަށާފައިވެ އެވެ.