ނުކުޅެދުންތެރިކަން ހުންނަ ފަރާތްތައް ވަޒީފާއަށް ތައްޔާރުކުރުމުގެ ޕްރޮގްރާމަށް ހުޅުވާލައިފި

ނުކުޅެދުންތެރިކަން ހުންނަ ފަރާތްތަކުން ވަޒީފާގެ މާޙައުލަށް ތައްޔާރު ކުރުމަށް ކުރިއަށްގެންދާ ޕްރޮގްރާމްގެ ތިންވަނަ ބުރުގައި ބައިވެރިވުމުގެ ފުރުޞަތު ހުޅުވާލައިފިއެވެ.

"ޖޮބް ރެޑިނަސް" ގެ ނަމުގައި އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއިން ކުރިއަށްގެންދާ މި ޕްރޮގްރާމަކީ، ނުކުޅެދުންތެރިކަން ހުންނަ ފަރާތްތަކަކީ، މުޖުތަމަޢު ބަލައިގަންނަ އަދި ހަމަހަމަ ފުރުޞަތުތައް ފަހިކަމާއެކު ލިބޭ ބަޔަކަށް ހެދުމުގެ މަގުސަދުގައި ފަށާފައިވާ ޕްރޮގުރާމެކެވެ. މި މަގުސަދުގައި ވޭތުވެދިޔަ ދެ އަހަރު ސަރުކާރުން ތަފާތު ޕްރޮގްރާމްތައް ފަށާފައިވާއިރު، "ޖޮބް ރެޑިނަސް" ޕްރޮގްރާމަކީ ވަރަށް ޚާއްޞަ އިސްކަމެއްދީގެން ކުރިއަށްގެންދާ ޕްރޮގްރާމެކެވެ.

މި ޕްރޮގްރާމްގައި، ވަޒީފާގެ މާޙަޢުލުގައި ޢަމަލުތައް ބަހައްޓާނެ ގޮތާއި، ގުޅިގެން މަސައްކަތް ކުރުމާއި، ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކާއި އަދި މަސައްކަތުގެ މާޙައުލުގެ ޢާއްމު ހުނަރުތަކަށް ހޭލުންތެރިކޮށް އަހުލުވެރިކުރުން ހިމެނެއެވެ.

މި ޕްރޮގްރާމްގައި ބައިވެރިވުމަށް އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާގެ ސޯޝަލް މީޑިއާގައި ހިމަނާފައިވާ ލިންކް އަދި ކިއު އާރް ކޯޑް މެދުވެރިކޮށް އެޕްލިކޭޝަން ފޯމު ހުށައެޅޭނެއެވެ. މިއީ، 6 މަސް ދުވަހުގެ ޕްރޮގްރާމެކެވެ. މި ޕްރޮގްރާމްގައި ބައިވެރިވުމަށް އެދި ހުށަހެޅޭނީ، މިމަހުގެ 12 ވަނަ ދުވަހުގެ ނިޔަލަށެވެ.

ނުުކުޅެދުންތެރިކަން ހުންނަ ފަރާތްތަކަށް ސަރުކާރުގެ ކުންފުނިތައް މެދުވެރިކޮށް، ވަޒީފާގެ ގިނަ ފުރުޞަތުތަކެއް ދަނީ ފަހިކޮށްދެމުންނެވެ. އެގޮތުން އެމްޕީއެލް، ސްޓެލްކޯ އަދި ސަރުކާރު ޙިއްސާވާ ބައެއް އެހެން ކުންފުނިތަކުންވެސް އަންނަނީ، އެކި ދާއިރާތަކުން ވަޒީފާގެ ފުރުޞަތު ދެމުންނެވެ.  މި 2 އަހަރުގެ ތެރޭގައި ނުކުޅެދުންތެރިކަން ހުންނަ 350 މީހުންނަށް ސަރުކާރުން ވަނީ ވަޒީފާގެ ފުރުޞަތު ފަހިކޮށްދީފައެވެ.