ޣައްޒާ ހިމެނޭހެން މުސްލިމު ގައުމުތަކުގައި ހާލުގައި އުޅޭ ޢާއިލާތައް ސްޕޮންސާ ކުރުމުގެ ފުރުސަތު

އިސްލާމީ އުންމަތުގެ އެކި ކަންކޮޅުތަކުގައި ހާލުގައި ޖެހިފައިވާ މުސްލިމު އަޚުންނާއި އުޚުތުންނަށް އެހީތެރިކަން ފޯރުކޮށްދިނުމަށް އިންޓަރނޭޝަނަލް އެއިޑް ކެމްޕޭން (އައިއޭސީ) އިން ކުރިއަށްގެންދާ "ރޯދަ ހަދިޔާ" ކެމްޕޭނުގެ ދަށުން، ޣައްޒާ ހިމެނޭހެން މުސްލިމު ޤައުމުތަކުގެ ޢާއިލާތައް ސްޕޮންސާ ކުރުމުގެ ފުރުސަތު ހުޅުވާލައިފިއެވެ.

"އައިއޭސީ ސްޕޮންސަރޝިޕްސް" ގެ ނަމުގައި ފެށި މި މަސައްކަތަކީ، އެކި ސަބަބުތަކާ ހުރެ ގެދޮރު ގެއްލި، ހާލުގައި ޖެހިފައިވާ ޢާއިލާތަކާއި އެހެން ޤައުމުތަކަށް ހިޖުރަކުރަން ޖެހިފައިވާ ފަރާތްތަކަށް ދާއިމީ ސިފައެއްގައި އެހީތެރިކަން ފޯރުކޮށްދިނުމަށް ފެށި ހަރަކާތެކެވެ.

މި ސްޕޮންސަރޝިޕްގެ ދަށުން ޣައްޒާ، މިސްރު، ސޫދާން އަދި ސްރީލަންކާގެ ޢާއިލާތަކުގެ އިތުރުން ޣައްޒާގެ ޔަތީމު ކުދިން ސްޕޮންސާ ކުރުމުގެ ފުރުސަތު މިހާރު ވަނީ ހުޅުވާލެވިފައެވެ.

ސްޕޮންސަރޝިޕް ޕެކޭޖްތަކުގެ ތަފްސީލު:

މިސްރު އަދި ސޫދާނުގެ ޢާއިލާތައް: މަހަކު 2,365 ރުފިޔާއަށް ޢާއިލާއެއް ސްޕޮންސާ ކުރެވޭނެއެވެ. މިއީ އެ ފަރާތްތަކުގެ މަހުން މަހަށް ބޭނުންވާ ކަންކަން ފުއްދުމަށް ދެވޭ ފައިސާގެ އެހީއެކެވެ.

ސްރީލަންކާގެ ޢާއިލާތައް: މަހަކު 945 ރުފިޔާއަށް ޢާއިލާއެއް ސްޕޮންސާ ކުރެވޭނެއެވެ. މި ޕެކޭޖުގެ ދަށުން ފޯރުކޮށްދެވޭނީ ކާބޯތަކެތީގެ ޕެކޭޖެވެ.

ޣައްޒާގެ ޢާއިލާތައް: މަހަކު 5,925 ރުފިޔާއަށް ޢާއިލާއެއް ސްޕޮންސާ ކުރެވޭނެއެވެ. ފައިސާ ބޭނުންކުރެވޭ ސަރަހައްދުތަކުގައި ފައިސާގެ އެހީ އަދި އެ ނޫން ސަރަހައްދުތަކުގައި ކާބޯތަކެތީގެ ޕެކޭޖް ފޯރުކޮށްދެވޭނެއެވެ.

ޣައްޒާގެ ޔަތީމު ކުދިން: ކޮންމެ ކުއްޖަކަށް މަހަކު 1,200 ރުފިޔާގެ މަގުން ސްޕޮންސާ ކުރެވޭނެއެވެ.

ޣައްޒާގެ އެތެރޭގައި ދިރިއުޅޭ ޢާއިލާތަކާއި ޔަތީމުންނަށް އެހީ ފޯރުކޮށްދިނުމުގައި، އެ ފަރާތްތަކާ މަޝްވަރާކޮށް އެންމެ ބޭނުންޖެހިފައިވާ ކަންކަމަށް އިސްކަންދެވޭނެ ކަމަށް އައިއޭސީން ބުނެއެވެ. އަދި މި އެހީތައް ފޯރުކޮށްދެވޭނީ ކޮންމެ 3 މަހަކުން އެއްފަހަރު 3 މަސްދުވަހަށެވެ. ޣައްޒާގެ ޢާއިލާއެއް ނުވަތަ ޔަތީމު ކުއްޖަކު ސްޕޮންސާ ކުރެވޭނީ މަދުވެގެން 3 މަސްދުވަހުގެ މުއްދަތަށެވެ. އަދި ބޭނުންވާ ފަރާތްތަކަށް އެއް އަހަރު ދުވަހުގެ މުއްދަތަށްވެސް ސްޕޮންސާ ކުރެވިދާނެއެވެ.

މި ޕްރޮގްރާމާ ގުޅޭ އިތުރު ތަފްސީލު ހޯއްދެވުމަށާއި ސްޕޮންސަރޝިޕްގައި ބައިވެރިވުމަށް އައިއޭސީގެ ހޮޓްލައިން ނަންބަރު 9458822 އަށް ގުޅުމަށް އެ ޖަމްޢިއްޔާއިން އެދެއެވެ.

އަދި https://bit.ly/45HJzAgg ލިންކު މެދުވެރިކޮށް ވެސް އިތުރު މަޢުލޫމާތު ލިބޭނެއެވެ. .

ދުނިޔޭގެ އެކި ކަންކޮޅުތަކުގައި ނިކަމެތިކަމާއި ހަނގުރާމައިގެ ސަބަބުން ހާލުގައި ޖެހިފައިވާ މުސްލިމުންނަށް އެހީތެރިވުމަކީ ދިވެހިން އަބަދުވެސް ނަމޫނާ ދައްކަމުން އަންނަ ކަމެކެވެ.