ނޭޕާލް އަންހެން މީހާ ފަސް ދުވަސް ފަހުން ފެނިއްޖެ، ވީގޮތެއް ނުބުނޭ

ނޭޕާލް އަންހެނަކު ގެއްލިގެން ފުލުހުންނަށް ރިޕޯޓްކުރުމާ ގުޅިގެން އެމީހާ ހޯދުމުގެ މަސައްކަތް ކުރަމުން ދަނިކޮށް އޭނާ މިއަދު ފެނިފައިވާ ކަމަށް ފުލުހުން ބުނެފި އެވެ.

ގެއްލިގެން ހޯދަމުން ދިޔައީ ނޭޕާލް ރައްޔިތެއްކަމަށްވާ ޕޫރްނީމާ ގަޖްމަރ (19އ) އެވެ.

ފުލުހުން ބުނީ ޕޫރްނީމާ ގަޖްމާ ހޯދަން ފެށީ އޮކްޓޯބަރ 21 ވަނަ ދުވަހުގެ މެންދުރު 2:00 އެހައިކަންހާއިރުން ފެށިގެން ދިޔަ ތަނެއް ނޭނގި ގެއްލިފައިވާ ކަމަށް ފުލުހުންނަށް ރިޕޯޓްކުރުމާ ގުޅިގެން ކަމަށެވެ. އަދި އޭނާ ގެއްލިގެން ފުލުހުންނަށް ރިޕޯޓްކުރުމާއެކު ކަމާ ގުޅުންހުރި އެންމެހާ ބަހާތަކަށް އެކަމުގެ މައުލޫމާތު ހިއްސާކުރެވި، ހޯދުމަށް މިހަތާނަށް ކުރެވުނު މަސައްކަތުން އޭނާއާ ބެހޭ އެއްވެސް މައުލޫމާތެއް އަދި އުޅޭތަނެއް ހޯދިފައިނުވާ ކަމަށް ބުންޏެވެ.

ނަމަވެސް ފުލުހުން ބުނީ މިއަދުގެ ވަގުތެއްގައި އޭނާ ފެނިފައިވާ ކަމަށެވެ. ހާލު ރަނގަޅު ކަމަށް ބުނެ އިތުރު ތަފްސީލެއް ނުދެ އެވެ.

އެހެން ކަމުން މިދިޔަ ފަސް ދުވަހު އޭނާ އުޅުނު ތަނެއް / ވީގޮތެއް ސާފެއް ނުވެ އެވެ. އޭނާ ފިލީ ކަމެއް، އެހެން ނަމަ ފިލީ ކީއްވެ ކަމެއް ނުވަތަ ބަޔަކު އޭނާ ފޮރުވައިގެން ގެންގުޅުނީ ކަމެއް ސާފެއް ނުވެ އެވެ.