އަދަދުތަކާއެކު ރައީސް ވިދާޅުވެ ދެއްވީ ”ފަސް މިނެޓް ތެރޭގައި“ ވާނުވާ އުވާނުލެވޭނެ ސަބަބުތައް

ކުޑަކުދިންނަށް ޖިންސީ ގޯނާކުރުންފަދަ ބޮޑެތި ކުށްތައް ކޮށްގެން ވާނުވާ ޖަހާފައި ތިބި މީހުން ދޫކޮށްލުމަކީ އެމަނިކުފާނަށް ލިބިގެންވާ ހައްގެއް ނޫން ކަމަށާ، އެއީ އެމަނިކުފާނު ކޮށްގެންވާނެ ކަމެއްވެސް ނޫން ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރޭ ރައީސް މުޢިއްޒު މާފަންނު ރައްޔިތުންނާއެކު ބޭއްވެވި ބައްދަލުވުމުގައި ވާހަކަދެއްކި އާއްމުންގެ މީހަކުވަނީ، ހޯމް މިނިސްޓަރު ޢަލީ އިހްސާން އަންގަވައި، ޕީޖީއަށް ދަންނަވައިގެން ވާނުވާ ބަންދު އުވާލެވޭނެ ކަމަށާ، އެކަމަށް ނަގާނީ އެންމެ ފަސް މިނެޓް ކަމަށް ކުރީގެ ރައީސް ޔާމީން އަބްދުލްޤައްޔޫމް ވިދާޅުވެފައިވާކަން ފާހަގަކޮށް އެކަން އެގޮތަށް ކުރެއްވޭނެ ކަމަށް ބުނެފައެވެ. އަދި އެފަދައިން ނުފޫޒު ފޯރުވައިގެން އެކަން ކުރެވެން އޮއްވައި އެކަން ލަސްވަނީ ކީއްވެތޯ އޭނާ ވަނީ ސުވާލުކޮށްފައެވެ.

އެ ސުވާލަށް ޖަވާބުދެއްވަމުން ރައީސް ވިދާޅުވީ، އެމަނިކުފާނު އެމަނިކުފާނުގެ ވަޢުދު ފުއްދަވާނެ ކަމަށާ، ނަމަވެސް އެއްވެސް ބޭފުޅަކު ސިޔާސީ  ވިސްނުމެއްގައި، ޒިންމާދާރުކަން ކުޑަގޮތެއްގައި ވިދާޅުވާ އެއްޗެއްގައި ނުޖެހޭނެ ކަމަށެވެ.

ފަސްމިނެޓެއްނޫން އެއް ސުކުންތުގައި ދޫކޮށްލެވޭނެއޭ ވިދާޅުވިޔަސް އަޅުގަނޑެއް ކުޑަކުދިންނަށް ޖިންސީ ގޯނާކުރި ކަމަށް ތުހުމަތު ކުރެވޭ މީހަކު، ޓެރަރިޒަމްގެ ޢަމަލެއް ހިންގާފައިވާ ކަމަށް ތުހުމަތު ކުރެވޭ މީހެއް، މާރާމާރީ ނުވަތަ މަރުގެ ކަމެއް ކޮށްފައި ހުރި މީހެއް، ޑްރަގް ޓްރެފިކް ކޮށްފައި ހުރި މީހެއް، ދޫކުރާކަށް އަޅުގަނޑު ހިތުން އަޅުގަނޑު ހައްގެއް ނޫން، އަޅުގަނޑަށް ލިބިފައި އޮތް ފުރުސަތެއްވެސް ނޫން، އަޅުގަނޑު ކޮށްގެންވާނެ ކަމެއްވެސް ނޫން. އެހެންވީމާ އެކަން ނުކުރަނީ

ރައީސް ޑރ. މުޙައްމަދު މުޢިއްޒު

މިއާއެކު ރައީސުލްޖުމްހޫރިއްޔާ ވަނީ، "ވާނުވާ" ބަންދުގައި މިވަގުތު ތިބި މީހުންގެ ޢަދަދާއި، އެމީހުންގެ މައްޗަށް ތުހުމަތު ކުރެވޭ ކުށުގެ ބާވަތްތައް އާންމު ރައްޔިތުންނާ ހިއްސާކުރައްވާފައެވެ.

އެގޮތުން "ވާނުވާ" ބަންދުގައި މިވަގުތު 347 މީހުން އެބަ ތިބިކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، އޭގެ ތެރޭގައި ކުޑަކުދިންނަށް ޖިންސީ ގޯނާކުރުމުގެ ކުށުގެ ތުހުމަތު ކުރެވޭ 117 މީހަކާއި، މަސްތުވާތަކެތި އެތެރެކުރުމުގެ ތުހުމަތުކުރެވޭ 116 މީހުންގެ އިތުރުން، ޓެރަރިޒަމާއި، މީހުން މެރުމާއި، މާރާމާރީގެ ކުށުގެ ތުހުމަތު ކުރެވޭ މީހުން ހިމެނޭ ކަމަށެވެ.

މީގެ އިތުރުން، ކަޅުފައިސާ ދޮވުމާއި، ހަށިވިއްކުމާއި، އެއްޖިންސުން ގުޅުން ހިންގުމުގެ ކުށުގެ ތުހުމަތުގައި ހައްޔަރުކުރެވިފައި ތިބި ބަޔަކުވެސް އޭގެ ތެރޭގައި ހިމެނޭ ކަމުގައި އެމަނިކުފާނު ވިދާޅުވިއެވެ. އަދި މިފަދަ ކުށްކުށުގައި ހައްޔަރުކުރެވިފައިވާ ބަޔަކު، ބަލަންޖެހޭ މިންވަރަށް ކަންކަމަށް ބެލުމެއް ނެތި މުޖުތުމަޢުގެތެރެއަށް ދޫކޮށްލުމަށް އެއްވެސް ރައްޔިތަކު ބޭނުންފުޅުވާނެތޯ ރައީސުލްޖުމްހޫރިއްޔާ ވަނީ ސުވާލުކުރައްވާފައެވެ.

ރައީސް މުޢިއްޒު ވިދާޅުވީ ވާނުވާ ބަންދު ޖަހާފައި ހުރި މީހަކު މިނިވަން ކުރަން ނުވަތަ ބަންދު ކުރާކަށްވެސް ސަރުކާރުން ނާންގާނެ ކަމަށެވެ.

މި ސަރުކާރަކުން ޖުޑިޝަރީ ތެރެއަކަށް ނުވަންނާނެ.

ރައީސް ޑރ. މުޙައްމަދު މުޢިއްޒު

މާލީ އަދި އިދާރީ ގޮތުންވެސް ޝަރުޢީ ދާއިރާއަށް މިނިވަންކަން ހޯއްދަވައިދެއްވާފައިވާނެ ކަމަށާ، އަދުގެ ސަރުކާރަކީ ވަކި މީހަކަށް ވަކި ގޮތަކަށް ޙުކުމެއް ކުރުމަށް ޝަރުޢީ ދާއިރާގެ ތެރެއަށް ނުފޫޒު ފޯރުވާފައިވާ ސަރުކާރެއް ނޫން ކަމަށާ، ކުރިއަށް އޮތްތަނުގައިވެސް އެކަން އޮންނާނީ އެގޮތުގައި ކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ތަކުރާރުކޮށްދެއްވާފައެވެ.