މަސްތުވާތަކެތި ބޭނުންކޮށް، ޓްރެފިކްކުރާކަމުގެ ތުހުމަތުގައި 18 އަހަރުގެ އަންހެނަކު ހައްޔަރުކޮށްފި

މަސްތުވާތަކެތި ބޭނުންކޮށް، ގެންގުޅެ، އަދި އެތަކެތީގެ ވިޔަފާރިކޮށް ޓްރެފިކް ކުރާކަމުގެ ތުހުމަތުގައި 18 އަހަރުގެ ދިވެހި އަންހެނަކު ފުލުހުން ހައްޔަރުކޮށްފިއެވެ.

ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން، އަންހެންމީހާ ހައްޔަރުކޮށްފައިވަނީ ޖުލައި މަހުގެ 26 ވަނަ ދުވަހުއެވެ. އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ކަސްޓޯޑިއަލް ޖަލެއްގައި ބަންދުގައި ބެހެއްޓުމަށް 15 ދުވަހުގެ މުއްދަތެއް ވަނީ ދީފައެވެ. އެހެންކަމުން އޭނާގެ ބަންދުގެ މުއްދަތު ހަމަވާނީ 10 އޮގަސްޓު 2026 އަށެވެ.

ކޯޓު އަމުރުގައި ބަޔާންކޮށްފައިވާ ގޮތުގައި، އަންހެންމީހާ ހުރި ކޮޓަރިން ގިނަ އަދަދެއްގެ މަސްތުވާތަކެތި ވަނީ ފެނިފައެވެ. އަދި އޭނާގެ ކުޑަކަމުދާތަކެތި މަސްތުވާތަކެއްޗަށް ފައްސި ވެފައިވާކަން ވަގުތީ ނަތީޖާއިން ދައްކައެވެ.

މީގެ އިތުރުން، ހާދިސާ ހިނގި ސީންއަށް ދިޔަ ފުލުސް އޮފިސަރުގެ ބަޔާނަކީވެސް އޭނާގެ މައްޗަށް ތުހުމަތުކުރެވޭ މިންވަރަށް ހުރި ހެކިތަކެއްގެ ގޮތުގައި ކޯޓުން ވަނީ ބަލައިގެންފައެވެ.

އަންހެންމީހާ ބަންދުގައި ބެހެއްޓުމަށް ކޯޓުން ނިންމީ، އޭނާ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީއެވެ.

މި މައްސަލައިގެ ބަންދު މަޖިލީހުގައި އަންހެންމީހާ ވަނީ އޭނާގެ ބަންދަށް ލުޔެއް ދިނުމަށް އެދިފައެވެ. ނަމަވެސް، ކޯޓުން ކަނޑައަޅާފައިވަނީ އޭނާ ހައްޔަރުކޮށްފައިވަނީ އިޖުރާއަތްތަކާ އެއްގޮތަށް ކަމަށާއި، މައްސަލައިގެ ސީރިއަސްކަމަށް ބަލައި ބަންދުގައި ބަހައްޓަންޖެހޭ ކަމަށެވެ.