މޯލްޑިވިއަންގެ އެއާބަސް ބޯޓަށް މައްސަލައެއް ދިމާވެ، ދަތުރުތަކެއް ކެންސަލްކޮށްފި

މިއަދު މޯލްޑިވިއަންގެ އެއާބަސް ބޯޓަކަށް ޓެކްނިކަލް މައްސަލައެއް ދިމާވުމާ ގުޅިގެން، މާލެއިން ދަކާއަށް ދަތުރުކުރާ ދެ ފްލައިޓެއް ކެންސަލްކޮށްފިއެވެ.

މިކަން އަންގައި މޯލްޑިވިއަނުން އެކްސްގައި ކުރި ޕޯސްޓުގައި ބުނެފައިވަނީ، މިއަދު މާލެއިން ދަކާއަށް ދަތުރުކުރުމަށް ހަމަޖެހިފައިވާ ފްލައިޓް ނަންބަރު Q2-502 އާއި Q2-2502 ކެންސަލްކޮށްފައިވާ ކަމަށެވެ.

އަދި އެއާބަހަށް ދިމާވެފައިވާ މައްސަލަ ހައްލުކުރުމަށް މަސައްކަތްކުރަމުންދާ ކަމަށާއި، މި ދަތުރުތަކުގެ ޓިކެޓް ނަގާފައިވާ ފަސިންޖަރުންނަށް އެހެން އޮޕްޝަންތަކެއް ހޯދައިދިނުމަށް މަސައްކަތްކުރަމުންދާ ކަމަށްވެސް ބުނެފައިވެއެވެ.

މި މައްސަލައާ ގުޅިގެން އިތުރު މަޢުލޫމާތު ބޭނުންވާ ފަރާތްތަކަށް މޯލްޑިވިއަންގެ ކޯލް ސެންޓަރުގެ ނަންބަރު 1671 އަށް ގުޅުމަށް ނުވަތަ [email protected] އަށް އީމެއިލް ކުރުމަށް އަންގާފައިވެއެވެ. އަދި ދަކާގައި ތިބި ކަސްޓަމަރުންނަށް  8801708810798+ ނަންބަރަށް ގުޅުމަށްވެސް އަންގާފައިވެއެވެ.

މި މައްސަލައާ ގުޅިގެން ކަސްޓަމަރުންގެ ކިބައިން މާފަށް އެދި، ކެތްތެރިކަމާއެކު ތިބުމަށް އެދިފައިވާއިރު، އިތުރު އަޕްޑޭޓްތައް ދޭނެ ކަމަށްވެސް މޯލްޑިވިއަންއިން ބުނެފައިވެއެވެ.