"ސެކިއުރިޓީ ރައުންޑްޓޭބަލް 2026" އެމްއެންޔޫގެ ވައިސް ޗާންސެލަރ އިފްތިތާޙުކޮށްދެއްވައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިންތިޒާމުކޮށްގެން ބާއްވާ "ސެކިއުރިޓީ ރައުންޑްޓޭބަލް 2026" އެ ޔުނިވަރސިޓީގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް އިފްތިތާޙުކޮށްދެއްވައިފިއެވެ.

މި މަހުގެ 23 ވަނަ ދުވަހު ބޭއްވި މި ބައްދަލުވުމަކީ އެމްއެންޔޫގެ ސްކޫލް އޮފް ސެކިއުރިޓީ އެންޑް ސްޓްރެޓީޖިކް ސްޓަޑީޒް އަދި ދިވެހި ފުލުހުންގެ ޚިދުމަތުގެ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ގުޅިގެން، ޤައުމީ ސަލާމަތާއި ޤާނޫނު ތަންފީޛުކުރާ މުއައްސަސާތަކަށް އަމާޒުކޮށްގެން ބޭއްވި ބައްދަލުވުމެކެވެ. މީގެ މައިގަނޑު މަޤްޞަދަކީ ޒަމާނީ ސަލާމަތީ ގޮންޖެހުންތަކާއި، ޤައުމީ މުހިންމު ސްޓްރެޓީޖިކް މައްސަލަތަކާ މެދު މަޝްވަރާކޮށް ހައްލު ހޯދުމެވެ.

މި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވަނީ، ސަލާމަތީ ދާއިރާގެ ދިރާސާތައް ކުރިއެރުވުމަށާއި، މި ދާއިރާއިން މަތީ ތަޢުލީމުގެ ފުރުޞަތުތައް ފަހިކޮށްދިނުމުގައި ސްކޫލް އޮފް ސެކިއުރިޓީ އެންޑް ސްޓްރެޓީޖިކް ސްޓަޑީޒްއިން އަދާކުރާ މުހިންމު ދައުރު ފާހަގަކުރައްވާފައެވެ. އަދި ހެކީގެ މައްޗަށް ބިނާކޮށް ސިޔާސަތުތައް އެކުލަވައިލުމާއި، ފަންނީ ހުނަރު އިތުރުކުރުމާއި، ސަރަޙައްދީ އެއްބާރުލުން އިތުރުކުރުމަށް އެ ސްކޫލުން ކުރަމުންދާ މަސައްކަތްތަކަށް އަލިއަޅުއްވާލެއްވިއެވެ.

މީގެއިތުރުން، އެމްއެންޔޫ އާއި މޯލްޑިވްސް ޕޮލިސް ސަރވިސްއާ ދެމެދު ވެވިފައިވާ ފަހުމުނާމާ (އެމްއޯޔޫ) ގެ މުހިންމުކަން ފާހަގަކުރައްވަމުން، މިފަދަ ގުޅުންތަކުގެ ސަބަބުން މިފަދަ ބައްދަލުވުންތައް އިންތިޒާމުކުރުމަށް މަގުފަހިވެގެންދާކަން ޑރ. ޝެހެނާޒް ވިދާޅުވިއެވެ. އަދި ޔުނިވަރސިޓީގެ ސެކިއުރިޓީ ސްޓަޑީޒް ޕްރޮގްރާމްތަކުގެ ތެރެއިން ފުލުހުންގެ ރިސާޗް ފެލޯއިން ހަމަޖެއްސުމަކީ ތަޢުލީމީ މުއައްސަސާތަކާއި ޕްރޮފެޝަނަލް މުއައްސަސާތަކުގެ ގުޅުން އިތުރަށް ބަދަހިވެގެންދާނެ ކަމެއް ކަމަށްވެސް ވިދާޅުވިއެވެ.

މި ރައުންޑްޓޭބަލްގައި ރާއްޖޭގެ މުހިންމު ސަލާމަތީ އަދި ޤާނޫނު ތަންފީޛުކުރާ ގިނަ މުއައްސަސާތަކަކުން ބައިވެރިވިއެވެ. އޭގެ ތެރޭގައި މޯލްޑިވްސް ޕޮލިސް ސަރވިސް، މޯލްޑިވްސް ކަސްޓަމްސް ސަރވިސް، މޯލްޑިވްސް އިމިގްރޭޝަން، މޯލްޑިވްސް ކަރެކްޝަނަލް ސަރވިސް، ނޭޝަނަލް ޑްރަގް އޭޖެންސީ (އެންޑީއޭ) އަދި އެމްއެންޔޫގެ ފެކަލްޓީ އޮފް އާޓްސްގެ މަންދޫބުން ހިމެނެއެވެ.

މި ސެމިނާރގެ ތެރެއިން ބައިވެރިންނަށް އެކި ދާއިރާތަކުން މަޢުލޫމާތާއި ތަޖުރިބާ ޙިއްޞާކުރުމުގެ ފުރުޞަތު ލިބިގެންދިޔައިރު، އަލަށް ފެންމަތިވަމުން އަންނަ ސަލާމަތީ ގޮންޖެހުންތަކާ ކުރިމަތިލުމުގައި މުއައްސަސާތަކުގެ މެދުގައި ގުޅުން ބަދަހިކުރުމުގެ ފުރުޞަތުތައް ހޯދާފައިވެއެވެ. އަދި ޤައުމީ ސިޔާސަތުތައް އެކަށައެޅުމުގައި އިލްމީ ދިރާސާތަކުގެ ބޭނުން ހިފުމާއި، ބަދަލުވަމުން އަންނަ ޙާލަތްތަކަށް އިޖާބަދިނުމުގެ ޤާބިލުކަން އިތުރުކުރުމުގެ މުހިންމުކަމާ މެދު ފުޅާ ދާއިރާއެއްގައި ވަނީ މަޝްވަރާކޮށްފައެވެ.

އެމްއެންޔޫގެ މި އިސްނެގުމަކީ އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތައް (އެސްޑީޖީސް) ޙާޞިލުކުރުމަށް ކުރެވޭ މުހިންމު މަސައްކަތެކެވެ. އެގޮތުން ފެންވަރު ރަނގަޅު ތަޢުލީމު ކަށަވަރުކުރުމުގެ ލަނޑުދަނޑި (އެސްޑީޖީ 4) އާއި، ޞުލްޙައާއި އިންޞާފާއި ހަރުދަނާ މުއައްސަސާތައް ޤާއިމުކުރުމުގެ ލަނޑުދަނޑި (އެސްޑީޖީ 16) ގެ އިތުރުން، ލަނޑުދަނޑިތައް ޙާޞިލުކުރުމަށް ބައިވެރިވުން އިތުރުކުރުމުގެ ލަނޑުދަނޑި (އެސްޑީޖީ 17) ޙާޞިލުކުރުމަށް މި ހަރަކާތުން ބާރުއަޅައެވެ. މިފަދަ ޕްލެޓްފޯމްތަކުގެ ޒަރީއާއިން ޤައުމީ ތަރައްޤީއަށް ބޭނުންވާ މުހިންމު ދާއިރާތަކުން ދިރާސާތައް ކުރުމާއި، އިލްމު ފެތުރުމުގައި އެމްއެންޔޫއިން އަދާކުރާ ދައުރު އިތުރަށް ވަރުގަދަވެގެންދާނެއެވެ.