ތާރީޚީ ކަމެއް: ޙާފިޒުންނަށް ޚާއްސަ ގައުނާއި ތާކިހާ، ރަމްޒުކޮށް ދެނީ ދީނާ ދިވެހި ސަޤާފަތް

ހާފިޒުކަމުގެ ތާޖު އެރުވޭ ހަފްލާ އަކީ ވަކީން ބޭއްވޭ ގައުމީ ފެންވަރުގެ ބޮޑު ހަފްލާއަކަށް ހައްދަވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިއުލާނު ކުރެއްވީ މިދިޔަ އަހަރު އެވެ. މީގެ ކުރީން ހާފިޒު ކަމުގެ ތާޖު ހަވާލު ކުރަނީ ކީރިތި ގުރުއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރުމުގެ ޖަލްސާގަ އެވެ.

ބައެއް ފަހަރު ގައުމީ ދުވަހާއި ޖުމްހޫރީ ދުވަހުގެ މުނާސަބަތުގައި ބާއްވާ ޖަލްސާގައި ވެސް ހާފިޒު ކަމުގެ ތާޖު ހަވާލު ކުރުން ކުރިއަށް ގެންގޮސްފައިވެ އެވެ.

މިނިސްޓަރު ޝަހީމްގެ މި އިއުލާނު ކުރެއްވުމާއެކު ހާފިޒުން ދަސްވެނިވުމަށް ބާއްވާ ތާރީހީ ފުރަތަމަ ހަފްލާ މިރޭ ބޭއްވުމަށް ވަނީ ނިންމާފަ އެވެ.

ހާފިޒުކަމުގެ ތާޖު އެރުވޭ ހަފްލާ އަކީ ވަކީން ބޭއްވޭ ގައުމީ ފެންވަރުގެ ބޮޑު ހަފްލާއަކަށް ހެއްދެވުމުގެ އިތުރުން ހާފިޒުންނަށް ހާއްސަކޮށް ގައުނަކާއި ތާކިހަލެއް ވެސް ފަރުމާ ކުރުމަށް މިނިސްޓަރު ނިންމެވި އެވެ. އެ ނިންމެވުމާ އެއްގޮތަށް ހާފިޒުންނަށް ހާއްސަކޮށް ގައުނާއި ތާކިހާ ވެސް ވަނީ ފަރުމާ ކޮށްފަ އެވެ.

މިރޭގެ ޝަރަފުވެރި ރަސްމިއްޔާތުގެ ކުރީން މިނިސްޓަރު ޝަހީމް ވަނީ ގައުނު އަދި ތާކިހާ ނޫސްވެރީންނާއި ހިއްސާކޮށްފަ އެވެ.

މިނިސްޓަރު ވިދާޅުވި ގޮތުގައި ޙާފިޒުންގެ ދަސްވެނިވުމުގައި ބޭނުންކުރާ (ގައުނު އަދި ތާކިހާ) ތައްޔާރު ކޮށްފައިވަނީ ދިވެހިންގެ ދީނީ ޢަޤީދާ އާއި ދިވެހީންގެ މެދުގައިވާ އިސްލާމީ އުޚުއްވަތްތެރިކަމާއި ޤުރްއާންގެ ޢިލްމުގެ ކުރިބޯށިކަމުގައިވާ މާލޭ ހުކުރުމިސްކިތުގައިވާ އިސްލާމީވަންތަ ކުރެހުންތައް އަސްލަކަށް ބަލައިގެން ދިވެހި ސަޤާފަތާއި ތާރީޚާއި ޢިލްމީ ޙަޟާރަތު ރަމްޒުވާ ގޮތަށެވެ.

ގައުނާއި ތާކިހާގައި ވަނީ ހުކުރުމިސްކިތުގައިވާ އިސްލާމީ ރީތި ކުރެހުންތައް ހިމަނާފަ އެވެ. ގައުނާއި ތާކިހާ ވަނީ ނޫ ކުލައިންނެވެ.

މިރޭގެ ރަސްމިއްޔާތު ވަރަށް ހާއްސަ, 24 ހާފިޒުން

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވި ގޮތުގައި މިރޭގެ ރަސްމިއްޔާތު ހުރިހާ ގޮތަކުން ވެސް ހާއްސަ އެވެ.

މިއީ ހާފިޒުކަމުގެ ތާޖު އެރުވޭ ދިނުމަށް ވަކީން ބޭއްވޭ ގައުމީ ފެންވަރުގެ ފުރަތަމަ ޖަލްސާ އެވެ. މިނިސްޓަރު ވިދާޅުވި ގޮތުގައި މިރޭގެ ރަސްމިއްޔާތުގައި 24 ހާފިޒަކަށް ތާޖު ދޭނެ އެވެ. އަދި އެކަމުގެ ސަނަދު އެރުވުމަށް ވަނީ ހަމަޖެހިފަ އެވެ.

މިރޭގެ ރަސްމިއްޔާތު ޝަރަފުވެރި ކޮށްދެއްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

ހާފިޒުން އުފެއްދުމަށް ބޮޑު ހޭދައެއް, އިނާޔަތް ދެގުނަ

ގުރުއާން ހިތުދަސް ހާފިޒުންނަށް ސަރުކާރުންދޭ އިނާޔަތް ދެގުނަ އަށް ބޮޑު ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ އަހަރު ވަނީ އިއުލާނު ކުރައްވާފަ އެވެ. ރައީސް ވިދާޅުވީ މި ސަރުކާރުގެ ސިޔާސަތަކީ ސިޔާސަތަކީ ކީރިތި ގުރްއާން ހިތުދަސް ހާފިޒުން އުފެއްދުމަށް ސަރުކާރުން ހާއްސަ ހޭދައެއް ކުރުން ކަމަށެވެ.

އަދި ހިލޭ ކީރިތި ގުރްއާން ކިޔެވޭނެ ކިލާސްތައް އިތުރު ކުރެވޭނެ ކަމަށާ މި ހިދުމަތް މުޅި ރާއްޖެއަށް ފުޅާ ކުރެވޭނެ ކަމަށް ވިދާޅުވި އެވެ.

އެ ނިންމެވުމާއި އެއްގޮތަށް ހާފިޒުން އުފެއްދުމަށް އިސްލާމިކް މިނިސްޓްރީން ވަރަށް ބޮޑު ސަމާލު ކަމެއް ދެ އެވެ. އެ މަސައްކަތް ކުރާ ފަރާތްތަކަށް އެކި ގޮތްގޮތުން އެހީތެރިވެ ދެއްވަ އެވެ.