ޕީއެންސީ އަންހެނުންގެ މަޖިލީހަށް 10 މެމްބަރުން އިންތިޚާބުކޮށްފި، އެންމެ ގިނަ ވޯޓު ޝިއުނާއަށް

ވެރިކަންކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެންބަރުންގެ މަޖިލީހުގައި (ސެނެޓް) އަންހެނުންނަށް ޚާއްޞަކޮށްފައިވާ 10 ގޮނޑިއަށް ބޭފުޅުން އިންތިޚާބުކޮށްފިއެވެ.

އިއްޔެ ފެށިގެން ކުރިއަށްދާ ޕީއެންސީގެ ކޮންގްރެސްގެ ތެރެއިން މިއަދު ކުރިއަށްދަނީ ޕާޓީގެ އިސް އެކި މަޤާމުތަކަށް މީހުން ހޮވުމުގެ ވޯޓުލުމެވެ. އެގޮތުން ޕާޓީގެ ނައިބު ރައީސްކަމަށް 6 ބޭފުޅަކު މިހާރު އިންތިޚާބުކޮށްފައިވާއިރު، މެންބަރުންގެ މަޖިލީހަށް މެންބަރުން އިންތިޚާބުކުރުމުގެ މަސައްކަތް ވެސް ދަނީ ބާރަށް ކުރިއަށެވެ.

ޕީއެންސީގެ މެންބަރުންގެ މަޖިލީހުން އަންހެނުންނަށް ޚާއްޞަކުރި 10 ގޮނޑިއަށް ޖުމްލަ 22 އަންހެނުން ވާދަކުރެއްވިއެވެ. މި އިންތިޚާބު ކާމިޔާބު ކުރެއްވި 10 ބޭފުޅުންނަކީ:

މަރްޔަމް ޝިއުނާ

ޝެރީން ޢަބްދުއްޞަމަދު

ޢާއިޝަތު މުޙައްމަދު

ފާޠިމަތު ރުހުސާނާ

ފާޠިމަތު މިޒުނާ

ފާޠިމަތު މުޙައްމަދު

އާސިޔަތު ރިޔާސާ

އާމިނަތު ނަމްޒާ

އާމިނަތު ޝުހުދާ

މަރިޔަމް ސާމިޔާ

މި ގޮނޑިތަކަށް ވާދަކުރެއްވި ކެންޑިޑޭޓުންގެ ތެރެއިން އެންމެ ގިނަ ވޯޓު ހޯއްދަވައިގެން ސެނެޓަށް ހޮވިވަޑައިގަތީ މަރްޔަމް ޝިއުނާއެވެ. އޭނާއަށް ވަނީ 931 މަންދޫބުންގެ ވޯޓު ލިބިވަޑައިގެންފައެވެ.

އަންހެނުންގެ އިތުރުން ޒުވާނުންނަށް ޚާއްޞަ ގޮނޑިތަކެއް ވެސް އެ ޕާޓީގެ މެންބަރުންގެ މަޖިލީހުގައި ހިމަނާފައިވެއެވެ. މީގެ އިތުރުން، އެންމެންނަށް ވާދަކުރެވޭ ގޮތަށް އާންމު މެންބަރުންގެ ގޮތުގައި ހޮވާ 18 ގޮނޑިއަށް މެންބަރުން އިންތިޚާބުކުރުން ވެސް އޮންނާނެއެވެ. މި 18 ގޮނޑިއަށް 70 އަށް ވުރެ ގިނަ ބޭފުޅުން ވަނީ ވާދަކުރައްވާފައެވެ.