ރާއްޖެ އިސްލާމްވިތާ 900 އަހަރު ފުރުން، ކުލަގަދަކޮށް ފާހަގަކުރަނީ

ދިވެހިރާއްޖެ އިސްލާމްވިތާ 900 އަހަރު ފުރުން، ކުލަގަދަކޮށް ފާހަގަކުރުމަށް ސަރުކާރުން ނިންމައިފިއެވެ.

މިކަމާ ގުޅޭގޮތުން ދައުލަތުގެ މީޑިއާގައި މިރޭ ވާހަކަދައްކަވަމުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވީ، ރާއްޖެ އިސްލާމްވިތާ 900 އަހަރުފުރޭ މުނާސަބާ ކުލަގަދަ ގޮތެއްގައި ފާހަގަކުރުމަށް ރައީސުލްޖުމްހޫރިއްޔާ ނިންމަވާފައިވާކަމަށެވެ.

ރާއްޖެ އިސްލާމްވިތާ 900 އަހަރު ފުރޭނީ 2026 ވަނަ އަހަރެވެ. މިއަހަރު މި ފުރުނީ ރާއްޖެ އިސްލާމްވިތާ 898 އަހަރެވެ.

ދައުލަތުގެ މީޑިއާގެ ހަބަރުޗެނަލް، ޕީއެސްއެމްނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ވަޒީރު ވިދާޅުވީ، ދިވެހިން އިސްލާމްދީނުގައި ދެމިތިބޭތާ 900 އަހަރު ފުރުން ވެގެންދާނީ ވަރަށް ތާރީހީ އަހަރެއްގެ ގޮތުގައި ކަމަށާއި ދެން އޮންނާނީ ހާސް އަހަރުފުރުމަށް ކުރާ ދަތުރު ކަމަށެވެ.

ޕްރޮގްރާމްގައި ވާހަކަދައްކަވަމުން ވަޒީރު ވަނީ، ރާއްޖެ އިސްލާމްވިތާ 900 އަހަރުފުރޭ މުނާސަބާ ފާހަގަކުރުމުގެ ކައުންޓް ޑައުން މިހާރު ފަށާފައިވާކަމަށެވެ.

ރާއްޖެ އިސްލާމްވި ދުވަހުގެ ގޮތުގައި ފާހަގަކުރަނީ، ކޮންމެ އަހަރެއްގެވެސް ރަބީޢުލްއާޚިރު މަހުގެ 2ވަނަ ދުވަހެވެ. މިދުވަސް ފާހަގަކުރަނީ އޭރު ރާއްޖޭގެ ރަސްކަމުގައި ހުންނެވި ސިރީ ތްރިބުވަނަ އާދީއްތަ މަހާރަދުން އިސްލާމްދީން ޤަބޫލުފުޅު ކުރައްވައި، ދިވެހިން އެ ދީނަށް އެނބުރުމަށް 548ވަނަ އަހަރުގެ ރަބީޢުލްއާޚިރު މަހުގެ ކުރީކޮޅުގެ އަމުރުކުރެއްވުމުންނެވެ.

އިސްލާމް ވުމަށްފަހު ރަދުން އިޚްތިޔާރު ކުރެއްވި ނަންފުޅަކީ އައްސުލްޠާނު މުޙައްމަދު އިބްނު ޢަބްދުﷲއެވެ. ދިވެހީންގެ މެދުގައި މި ރަދުންގެ ނަންފުޅު މަޝްހޫރު ވެފައި ވަނީ ދަރުމަވަންތަ ރަސްގެފާނުގެ ނަންފުޅުންނެވެ.

ރާއްޖެއަށް އިސްލާމްދީން އައުމުގެ ކުރިން ރާއްޖޭގައި ބުޑިޒަމާއި ހިންދުއިޒަމަށް މީހުން އުޅުނެވެ. މިކަން އިހުގެ ލިޔުންތަކުން ފެންނަން ހުރިއިރު، ރާއްޖެ އިސްލާމް ވި ހާދިސާއަކީ ރާއްޖޭގެ ތާރީހުގައި ހިނގާފައިވާ އެންމެ މުހިއްމު ހާދިސާއެވެ.

ރާއްޖޭގެ އޭރުގެ ރަދުން އިސްލާމް ވުމަށްފަހު ރާއްޖޭގެ ހުރިހާ ރަށްތަކަކަށް އިސްލާމްދީން ފެތުރިފައިވަނީ 60 ހަކަށް އަހަރު ފަހުންކަމަށް ތާރީހީ ލިޔުންތަކުގައި ބުނެއުޅެއެވެ.