ޝާހިދު ގޮވާލެއްވީ އދ. ސެކްރެޓަރީ ޖެނެރަލްކަމަށް އަންހެނަކު ހޮވުމަށް

އދ.ގެ އައު ސެކްރެޓަރީ ޖެނެރަލްގެ މަޤާމަށް އަންހެން ބޭފުޅަކު ހޮވުމަށް، ބައިނަލްއަގުވާމީ ދުނިޔެއަށް އދ.ގެ 76 ވަނަ ޢާންމު މަޖިލީހުގެ ރައީސްކަމުގެ މަގާމު ފުރުއްވެވި ޢަބްދުﷲ ޝާހިދު އިލްތިމާސް ކުރައްވައިފިއެވެ.

އދ. ގެ 80 ވަނަ އަހަރީ ދުވަހުގެ މުނާސަބަތުގައި ބޭރުގެ ނޫހެއްގައި ޝާއިއުކުރި ލިޔުމެއްގައި ރާއްޖޭގެ ކުރީގެ ޚާރިޖީ ވަޒީރުކަން ވެސް ކުރެއްވި ޝާހިދު ވިދާޅުވީ، އދ.ގެ ކުރިއަށް އޮތް ދައުރުގެ ސެކްރެޓަރީ ޖެނެރަލްގެ މަޤާމަށް ތާރީޚު ބަދަލުކުރުމަށް އަންހެން ބޭފުޅަކު އިންތިޚާބުކުރަން ޖެހޭ ކަމަށެވެ.

އެގޮތުން އދ. ގެ ފާއިތުވެ ދިޔަ 80 އަހަރުގެ ތާރީޚުގައި ވެސް އެ މަގާމަށް އިންތިޚާބުވެފައިވަނީ ފިރިހެން ބޭފުޅުން ކަމުގައި ފާހަގަކުރައްވައި ޝާހިދުވަނީ، ހަޤީގީ ބަދަލެއް ގެނައުމުގެ ވަގުތު މިހާރު ޖެހިފައިވާކަން ފާހަގަކުރައްވާފައެވެ.

އެގޮތުން ދުނިޔޭގެ ހުރިހާ ގައުމަކުންހެން ވެސް މިންތީގެ ހަމަހަމަ ކަމުގެ ވާހަކަ ދެއްކި ނަމަވެސް، ދުނިޔޭގެ އެންމެ އިސް ޑިޕްލޮމެޓިކް މަގާމަށް އަންހެނަކު ހޮވުމަށް އެ ގައުމުތަކުން ނުރުހޭ ކަމަށާއި، އދ.ގެ އިސް ސަފުގައި އަންހެނުންނަށް ވެސް ހަމަހަމަ ފުރުސަތު ދިނުން މުހިންމުކަމަށް ޝާހިދު ވަނީ ވިދާޅުވެފައެވެ.

އެ މަގާމަށް ވެސް ޤާބިލު އަންހެން ބޭފުޅުން މަދެއް ނޫން. މަދުވަނީ އެ ބޭފުޅުން ނޮމިނޭޓްކޮށް، އެ ބޭފުޅުންނަށް ތާއީދުކޮށް، އެ ބޭފުޅުން އައްޔަންކުރުމުގެ ޢަޒުމު. 80 އަހަރު ފަހުން، އެއީ އަޅުގަނޑުމެންނަށް އިސްލާޙުކުރެވޭނެ ކަމެއް. މިކަން އަނެއްކާ ވެސް ތާރީޚަކަށް ވުމުގެ ކުރިން، ބަދަލަކަށް ޢަމަލުކުރަންވީ ވަގުތަކީ މިއީ،

އދ.ގެ 76 ވަނަ ޢާންމު މަޖިލީހުގެ ރައީސް ޢަބްދުﷲ ޝާހިދު

ޝާހިދު އިތުރަށް ވިދާޅުވީ، ޤައުމުތަކުން އަންހެނުން އިސްސަފުން ފެންނަން ތާއީދުކުރާނެކަމަށް ވަޢުދުވި ނަމަވެސް، އިސް ސަފުގެ މަގާމުތަކަށް ހޮވުމުގެ މަސައްކަތް ފެށުމުން ސިޔާސީ މަޞްލަޙަތުތައް އިސްކުރާ ކަމަށެވެ. އެހެންކަމުން އެ އުސޫލުތައް ހުއްޓާލަން ޖެހޭ ކަމަށް ޝާހިދު ވިދާޅުވިއެވެ.

އަދި އަންހެނަކު ހޮވުމަކީ މިންގަނޑު ދަށްވުމެއް ނޫން ކަމަށާއި، އެއީ ގިނަ ދުވަހު ނުދެކި، ދޫކޮށްލާފައިވާ ހުނަރުތަކަށް ޤަބޫލުކުރުން ކަމަށް ވެސް ޝާހިދު ވިދާޅުވިއެވެ. އެގޮތުން ދުނިޔޭގެ މައިދާނުގެ އިސްސަފުގައި މަސައްކަތްކުރަން ތައްޔާރަށް ތިބި އަންހެނުންނަށް ތާއީދުކުރުމަށް ސަރުކާރުތަކުން ހިތްވަރުގަދަކުރަން ޝާހިދު ވަނީ ބައިނަލްއަގުވާމީ ދުނިޔެއަށް ގޮވާލައްވާފައެވެ.

ޤާބިލުކަމާއި މިންތީގެ ހަމަހަމަކަމަކީ ދެކޮޅު ނުޖެހޭ ދެޚިޔާލެއް ނޫން. އަޅުގަނޑުމެންނަށް އެންމެ ރަނގަޅު ކެންޑިޑޭޓު ހޮވައި، ޤާބިލު އަންހެނުންނަށް ތާއީދުކޮށްގެން ތާރީޚު އާކުރެވިދާނެ،

އދ.ގެ 76 ވަނަ ޢާންމު މަޖިލީހުގެ ރައީސް ޢަބްދުﷲ ޝާހިދު

އެއާއެކު ޝާހިދު ހަނދާންކޮށްދެއްވީ، ދުނިޔެ މިހާރު ކުރިމަތިލާން ޖެހިފައިވަނީ ހަނގުރާމަތަކާއި، މޫސުމަށް އަންނަ ބަދަލުތަކާއި، އިންސާނީ ކާރިސާތައް ފަދަ ބޮޑެތި ގޮންޖެހުންތަކަށެވެ. އަދި އެ މައްސަލަތައް ހައްލުކުރުމަށް އ.ދ. އަށް އައު އީޖާދީ ވިސްނުންތަކާއި ވަރުގަދަ ޝަޚްސިއްޔަތުތައް ބޭނުންވާ ދަނޑިވަޅަކީ މިއީ ކަމަށް ވެސް ޝާހިދު ވިދާޅުވިއެވެ.

އެހެންކަމުން އދ. އަށް އައު ސެކްރެޓަރީ ޖެނެރަލެއް ހޮވުމުގެ މަސައްކަތް ކުރިއަށްދާއިރު، މިންތީގެ ހަމަހަމަކަމަށް ހަޤީޤީ މަންޒަރެއް ދެއްކުމަށް ޝާހިދު ވަނީ ޤައުމުތަކަށް ގޮވާލައްވާފައެވެ.

އދ.ގެ 76 ވަނަ އާންމު މަޖިލީހުގެ ރައީސްކަމަށް ޝާހިދު ހޮވެވަޑައިގެންނެވީ 2021 ވަނަ އަހަރުއެވެ. އެ މަގާމަށް އިންތިހާބުވެވަޑައިގެންނެވުމަށް ފަހު ވެސް، އދ.ގެ އިސްސަފުގައި އަންހެނުންގެ ބައިވެރިވުން އިތުރުކުރުމަށް ދުނިޔޭގެ އެއްބާރުލުން ބޭނުންވާކަން ޝާހިދު ފާހަގަކުރައްވައިފައިވެއެވެ.

އަދި އެ މިސްރާބަށް މަސައްކަތްކުރެއްވުމަށް މެންބަރު ގައުމުތަކަށް ޝާހިދު އަބަދުވެސް ގޮވާލައްވާކަން ފާހަގަކުރެވެއެވެ.