ނޫސް ކޮންފަރެންސްތަކަކީ ޒާތީގޮތުން ދިމާކުރުމާ، ކޯޓުގެ ޙުރުމަތް ކެނޑުމަށް އޮތް ފުރުޞަތެއް ނޫން: ސަޢީދު

ނޫސްވެރިންގެ ބައްދަލުވުންތަކަކީ ވަކިވަކި ފަރުދުންނާ ޒާތީގޮތުން ދިމާކޮށް، ދޮގު މަޢުލޫމާތު ފެތުރުމާއި ކޯޓުތަކުގެ ޙުރުމަތް ކެނޑުމަށް އޮތް ފުރުޞަތެއް ނޫން ކަމަށް އިކޮނަމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރު ސަޢީދު މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ބޭއްވެވި ނޫސްވެރިންގެ ބައްދަލުވުމުގައި "އަދަދު" ނޫހުގެ ނޫސްވެރިއަކު ކޯޓު އަމުރަކާ ޚިލާފަށް ސުވާލުކުރި ކަމަށް ވިދާޅުވެ، އެ ނޫސްވެރިޔާ ބައްދަލުވުމުން ނެރުނު ހާދިސާއަށް އިޝާރާތް ކުރައްވައި އެކްސްގައި ކުރެއްވި ޕޯސްޓެއްގައެވެ.

މިނިސްޓަރު ސަޢީދު ވިދާޅުވީ، ޚިޔާލުފާޅުކުރުމާއި ނޫސްވެރިކަމުގެ މިނިވަންކަމަކީ ޑިމޮކްރަސީގެ އެންމެ ވަރުގަދަ އަސާސް ކަމަށާއި، މި ސަރުކާރުން އަބަދުވެސް އެކަމަށް ޖާގަދޭނެ ކަމަށެވެ. ނަމަވެސް، ލިބިފައިވާ މިނިވަންކަމުގެ ނާޖާއިޒް ފައިދާ ނަގައި، އިދިކޮޅު ސިޔާސީ ހަރަކާތްތައް ހިންގާ އުޞޫލުން ރައީސް އޮފީސްތެރޭގައި ހަޅުތާލުކުރާ މޭރުމުން ބައެއް ނޫސްތަކުން އަމަލުކުރަމުންދާ ކަމަށް ސަޢީދު ތުހުމަތު ކުރެއްވިއެވެ.

"ނޫސް ކޮންފަރެންސްތަކަކީ ޒާތީގޮތުން ދިމާކުރުމާ، ދޮގު ވާހަކަ ހަދަހަދައިގެން އިއްވުމާ، ޤާނޫނުތައް މުގުރުމާ، ކޯޓުގެ ޙުރުމަތް ކެނޑުމަށް އޮތް ފުރުޞަތެއް ނޫން،" މިނިސްޓަރު ވިދާޅުވިއެވެ.

ސަޢީދު އިތުރަށް ފާހަގަކުރެއްވި ގޮތުގައި، ރައީސް ޑރ. މުޢިއްޒަކީ ކުރީގެ އެއްވެސް ސަރުކާރަކުން ނޫސްވެރިންނަށް މަޢުލޫމާތު ނުދޭ މިންވަރަށް ފުރުޞަތު ދެއްވާ ބޭފުޅެކެވެ. އެއްވެސް މޮޑަރޭޝަނެއް ނެތި ކޮންމެ ހަފްތާއަކު ރައީސް ނޫސްވެރިންނާ ބައްދަލުކުރައްވަނީ ސަރުކާރުގެ ސިޔާސަތުތައް ޒިންމާދާރުކަމާއެކު ހާމަކުރުމަށް ކަމަށާއި، ނޫސްވެރިން މި ފުރުޞަތުގެ ބޭނުން ހިފަންވާނީ ޤާނޫނީ އަމުރުތަކަށް ޙުރުމަތްތެރިކޮށް ހިތުމާއެކު ކަމަށް އޭނާ ވިދާޅުވިއެވެ.

ކްރިމިނަލް ކޯޓުން ވަނީ "އަދަދު" ނޫހުން އުފެއްދި "އައިޝާ" ޑޮކިއުމަންޓްރީއާ ގުޅޭ އެއްވެސް ވާހަކައެއް ދައުރުނުކުރުމަށް އަމުރެއް ނެރެފައެވެ. ނަމަވެސް އަދަދު ނޫހުގެ ނޫސްވެރިޔާ ވަނީ މައްސަލައާ ގުޅޭ ސުވާލެއް ކޮށްފައެވެ.

އެއާއެކު، ރައީސް މުޢިއްޒު ވަނީ ރައީސް އޮފީސް ތެރޭގައި ޤާނޫނީ ސިޔާދަތު ނަގަހައްޓަވާނެ ކަމަށް ވިދާޅުވެ، ސުވާލުކުރި ނޫސްވެރިޔާ ބައްދަލުވުމުން ނިކުތުމަށް އަމުރުކުރައްވާފައެވެ.

ރައީސް ވިދާޅުވީ ރާއްޖޭގައި ޚިޔާލުފާޅުކުރުމުގެ މިނިވަންކަން އޮތް ނަމަވެސް، އެކަން ކުރަންޖެހޭނީ އިސްލާމްދީނާއި ޤާނޫނުއަސާސީގެ އިންތަކުގެ ތެރެއިން ކަމަށެވެ.