3 އަހަރު ތެރޭ ހުޅުމާލެ ހޮސްޕިޓަލް ޓަރޝިއަރީ ފެންވަރަށް ބަދަލުކުރެވޭނެ: ހަލީމް

ކުރިއަށް އޮތް 3 އަހަރު ތެރޭ ހުޅުމާލެ ހޮސްޕިޓަލް ޓަރޝިއަރީ ފެންވަރަށް ބަދަލުކުރެވޭނެކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުލްރައްޒާގް ހަލީމް ވިދާޅުވެއްޖެއެވެ.

ދައުލަތުގެ މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަފުޅުދައްކަވަމުން ހަލީމް ވިދާޅުވީ ހުޅުމާލޭގައި ވަޒަންވެރިވާ މީހުން ދުވަހެއް ދުވަހަކަށް އިތުރުވަމުން ދާއިރު، ހުޅުމާލޭ ހޮސްޕިޓަލުގެ ވަސީލަތްތަކާއި ޖާގަވެސް އިތުުރު ކުރަންޖެހިފައިވާ ކަމަށެވެ.

އެހެންކަމުން މިއަހަރުތެރޭގައި 4 އޮޕަރޭޝަން ތިއޭޓަރުގައި މަސައްކަތްކުރަން ފަށާނެކަމަށާއި، އަދި އެންއައިސީޔޫ އާއި އައިސީޔޫގެ ޚިދުމަތްވެސް މިއަހަރުތެރޭ ފަށާނެ ކަމަށް ހަލީމް ވިދާޅުވިއެވެ.

ހަލީމް އިތުރަށް ވިދާޅުވީ، ހުޅުމާލެ ހޮސްޕިޓަލުގެ ގޯތިތެރޭގައި 10 ފަންގިފިލާއަށް ހިއްލާފައިިވާ އިމާރާތެއް ގާއިމްކުރުމުގެ މަސައްކަތް މިހާރުވެސް ކުރިއަށްދާ ކަމަށާ، އެ މަސައްކަތައް ފައިނޭންސް ލިބުނުހާ އަވަހަކަށް އިމާރާތް އަޅަން ފެށޭނެ ކަމަށެވެ. އަދި އެއިމާރާތުގައި 250 އެނދާއި ޕްރައިވެޓް ރޫމުތަކެއް ޤާއިމް ކުރުމަށް ޕްލޭންކޮށްފައިވާކަމަށް ވެސް އޭނާ ވިދާޅުވިއެވެ.

ކުރިއަށް އޮތް ތިން އަހަރު ދުވަހުގެ ތެރޭގައި އިރާދަކުރެއްވިއްޔާ މި އިމާރާތް ގާއިމް ކުރެވިއްޖެ ކަމުގައި ވަނީ ނަމަ، ހުޅުމާލެ ހޮސްޕިޓަލަކީ ޓަރޝަރީ ފެންވަރުގެ ޚިދުމަތް ދެވޭ ހޮސްޕިޓަލަކަށް ބަދަލު ވެގެންދާނެ. މީގެ އިތުރުން މިހާރު ހުޅުމާލެ ހޮސްޕިޓަލްގައި ހުރި އީއާރު އިތުރަށް ބޮޑުކޮށް އެނދު އިތުރު ކުރުމުގެ މަސައްކަތްވެސް ކުރަމުން މިދަނީ. އަދި ޑައިލެސިސް ހަދާ ފަރާތްތަކަށް ޚިދުމަތް ދިނުމަށް އިތުރު 29 އެނދު ގާއިމް ކުރުމަށް ވަނީ ޕްލޭން ކުރެވުފައި. އިރާދަކުރެވިއްޔާ މި ބަންދު ތަކަށްފަހު މި ޕްރޮޖެކްޓަ ފަށާނަން.

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުލްރައްޒާގް ހަލީމް

މީގެ އިތުރުން، މިއަހަރުގެ ދެވަނަ ކުއާޓަރގެ ކުރިން އޮޕަރޭޝަން ތިއޭޓަރާއި އައިސީޔޫ އާއި އެން އައިސީޔޫގެ މަސައްކަތް އެއްކޮށް ނިމި ޚިދުމަތްދެވޭނެކަން ވެސް ހަލީމް ފާހަގަކުރެއްވިއެވެ. އަދި އަލަށް ހަދާ އިމާރާތަށް މިހާރުހުރި އިމާރާތުގެ ބައެއް މަސައްކަތް ބަދަލުކުރެވުމުން، މިހާރުގެ އިމާރާތުގައި އަންހެނުންނަށް ދެވޭ ފަރުވާގެ ޚިދުމަތް ފުޅާކުރެވޭނެކަމަށްވެސް ވިދާޅުވިއެވެ.