ކުޅުދުއްފުއްޓާއި މާލެ ސިޓީ ކައުންސިލްގެ ގޮނޑިތަކަށް ވާދަކުރަނީ ޕީއެންސީއާއި އެމްޑީޕީ

ހދ.ކުޅުދުއްފުށި ސިޓީ ކައުންސިލާއި މާލެ ސިޓީ ކައުންސިލުން ހުސްވި ގޮނޑިތަކަށް މެމްބަރުން އިންތިހާބު ކުރުމަށް ބާއްވާ ބައި އިލެކްޝަންގައި ވާދަކުރަނީ ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އާއި އިދިކޮޅު އެމްޑީޕީއަށް ނިސްބަތްވާ ކެނޑިޑޭޓުންކަން އިލެކްޝަން ކޮމިޝަން (އީސީ) އިން އާއްމުކުރި މައުލޫމާތުތަކުން ހާމަވެއްޖެއެވެ.

އަންނަ ޖުލައި މަހުގެ 20 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި ދެ ބައި އިލެކްޝަން ގައި ވާދަކުރާ ކެނޑިޑޭޓުންގެ މައުލޫމާތު އީސީ އިން ވަނީ އާއްމުކޮށްފައެވެ.

މި އިންތިހާބުގައި،  މާލެ ސިޓީ ކައުންސިލުގެ ހެންވޭރު ހުޅަނގު ދާއިރާ އާއި މައްޗަންގޮޅި މެދު ދާއިރާ އާއި ހުޅުމާލެ ދާއިރާ އަށް ކައުންސިލަރުން އިންތިހާބު ކުރުމަށް ހަމަޖެހިފައިވާއިރު، ކުޅުދުއްފުށި އުތުރު ދާއިރާ އަށް ވެސް ކައުންސިލް މެމްބަރަކު އިންތިހާބު ކުރުމަށް ވަނީ ހަމަޖެހިފައެވެ.

މި ގޮނޑިތައް ހުސްވީ، މީގެ ކުރިން އިންތިހާބުވެވަޑައިގެންނެވި ބޭފުޅުން ރައްޔިތުންގެ މަޖިލީހުގެ އިންތިހާބު ކާމިޔާބު ކުރައްވާ، މަޖިލީހުގެ ގޮނޑި ކަށަވަރު ކުރެއްވުމުންނެވެ.

މިގޮތުން، މާލެ ސިޓީ ކައުންސިލުން ހުސްވި ހެންވޭރު ހުޅަނގު ދާއިރާގެ މެންބަރު އަހްމަދު އައިފާން އާއި މައްޗަންގޮޅި މެދު ދާއިރާގެ ކައުންސިލަރު ކަން ކުރެއްވި އަހްމަދު ޒަމީރު އެ ދެ ދާއިރާގެ މަޖިލިސް ގޮނޑި ކާމިޔާބު ކުރެއްވިއިރު، ހުޅުމާލެ ދާއިރާގެ ކައުންސިލަރަށް ހުންނެވި އިބްރާހިމް ޝުޖާއު ވަނީ ބާރަށު ދާއިރާގެ ގޮނޑި ކާމިޔާބު ކުރައްވާފައެވެ.

ހަމައެއާއިއެކު، ކުޅުދުއްފުށި އުތުރު ދާއިރާގެ ކައުންސިލަރަށް ހުންނެވި މުހައްމަދު ދާއޫދު ވެސް ވަނީ ރައްޔިތުންގެ މަޖިލީހުގެ ގޮނޑި ކަށަވަރު ކުރައްވާފައެވެ.

އީސީން ވަނީ މި ގޮނޑިތަކަށް ވާދަކުރައްވާ ކެނޑިޑޭޓުންގެ ނަންތައް އާއްމުކޮށްފައެވެ.

މިގޮތުން، ކުޅުދުއްފުށި އުތުރު ދާއިރާއަށް އެމްޑީޕީގެ ކެންޑިޑޭޓް ޝަމްނޫޒް މުހައްމަދު ނައީމް ވާދަކުރައްވާއިރު، ޕީއެންސީން ވާދަކުރައްވަނީ އިބްރާހިމް އަހްމަދެވެ.

އޭގެ އިތުރުން، މާލެ ސިޓީ ކައުންސިލުގެ ހުސްވި ގޮނޑިތަކުގެ ތެރެއިން ހުޅަނގު ދާއިރާ ވާދަ ކުރައްވަނީ ޕީއެންސީގެ ކެންޑިޑޭޓް ފާތިމަތު އިޝާން އަލީ އާއި އެމްޑީޕީގެ ކެންޑިޑޭޓް ހައްވާ ޝިފާނާ އެވެ. އަދި މައްޗަންގޮޅި މެދު ދާއިރާއަށް އެމްޑީޕީގެ ފަރާތުން މުހައްމަދު އަލީ ޖިނާދު ވާދަކުރައްވާއިރު، ޕީއެންސީގެ ފަރާތުން ވާދަކުރައްވަނީ ފާތިމަތު ޝައުފާ ސަލީމެވެ. އަދި ހުޅުމާލެ ދާއިރާ އަށް ޕީއެންސީގެ ކެންޑިޑޭޓް އަލީ އައިމަން އާއި އެމްޑީޕީގެ ކެންޑިޑޭޓް އަހްމަދު ރަޝީދު ވާދަކުރުމަށް ވަނީ ހަމަޖެހިފައެވެ.