މިއަންނަ އަހަރު ފަހުކޮޅު ހުރިހާ ރަށެއްގެ ފިޓްނަސް ސެންޓަރުތަކުގެ މަސައްކަތް ނިމޭނެ: ރައީސް މުޢިއްޒު

ރާއްޖޭގެ މީހުން ދިރިއުޅޭ ހުރިހާ ރަށެއްގައި ޒަމާނީ ފެންވަރަށް ތަރައްޤީކުރާ ފިޓްނަސް އެންޑް ރެކްރިއޭޝަން ސެންޓަރުތައް އަންނަ އަހަރުގެ ނޮވެމްބަރު މަހަށް ނިންމައިލެވޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް އޮފީހުން ގެނެސްދޭ "ދަ ޕަލްސް" ޕޮޑްކާސްޓުގައި ވާހަކަފުޅު ދައްކަވަމުން ރައީސް ވިދާޅުވީ އަތޮޅުތެރޭގެ ރަށްރަށުގައި މިހާރު ފެށިފައިވާ ކުޅިވަރު މަޝްރޫޢުތައް ނިމުމާ އެކު ރާއްޖޭގެ ކުޅިވަރު އިންފްރާސްޓްރަކްޗަރަށް ބޮޑު ބަދަލެއް އަންނާނެ ކަމަށެވެ. އަދި މި ދައުރުގެ ތެރޭގައި ރާއްޖޭގެ ހުރިހާ ރަށެއްގައި ޒަމާނީ ފިޓްނަސް ސެންޓަރެއް ޤާއިމުކުރައްވާނެ ކަމުގެ ޔަގީންކަން ވަނީ ދެއްވާފައެވެ.

"އަމަލީ މަސައްކަތްތައް އެދަނީ ކުރިއަށް. ބައެއް ރަށްރަށުގައި ނިމެމުންވެސް އެބަދޭ. އަންނަ އަހަރު ނިމޭއިރު އިރާދަކުރެއްވިއްޔާ ހުރިހާ ރަށެއްވެސް ނިމޭނެ" ރައީސް ވިދާޅުވިއެވެ.

ރަށްރަށުގެ އިތުރުން މާލެ ސަރަޙައްދުގައި ވެސް ތަފާތު ކުޅިވަރު ވަސީލަތްތައް ތަރައްޤީކުރެއްވުމުގެ ޕްލޭންތައް ރައީސް ހާމަކުރެއްވިއެވެ. އެ ގޮތުން ސަލްޓަން ޕާކާއި ހުޅުމާލޭގައި އިންޑޯ ގޭމިން ސެންޓަރުތަކެއް ބިނާކުރައްވަން ނިންމަވާފައިވާ ކަމަށް ވިދާޅުވިއެވެ. ހަމައެއާ އެކު ހުޅުމާލޭގައި ރޭސިން އަދި ޑްރިފްޓިން ޓްރެކަކާއި ޒަމާނީ ގޯކާޓް އެރީނާއެއް ހެދުމުގެ މަސައްކަތް ކުރިއަށްދާ ކަމަށާއި މި ތަންތަން 2028 ވަނަ އަހަރުގެ ކުރީކޮޅަށް ނިމޭނެ ކަމަށް ވިދާޅުވިއެވެ. އެ ތަންތަނުގައި ގާތްގަނޑަކަށް 1,200 މީހުންގެ ޖާގަ ހުންނާނެ ކަމަށް ވެސް ރައީސް ވިދާޅުވިއެވެ.

މާލެ ސަރަޙައްދުގައި ރާވާފައިވާ އިތުރު މަޝްރޫޢުތަކުގެ ތެރޭގައި ރާޅުގަނޑު ސަރަޙައްދުގައި ސާފިން ސްޓޭޑިއަމެއް ޤާއިމުކުރުމާއި ހުޅުމާލޭގައި އިންޑޯ ބޯލިން އެރީނާއެއް ތަރައްޤީކުރުން ހިމެނެއެވެ. އޭގެ އިތުރުން ފުޓްސަލް ސްޓޭޑިއަމްތަކާއި ނެޓްބޯލް ސްޓޭޑިއަމްތައް ވެސް ބިނާކުރައްވާނެ ކަމަށް ރައީސް ވިދާޅުވިއެވެ.

ހަމައެކަނި ވެރިރަށް މާލެއަށް ކުޅިވަރު ވަސީލަތްތައް ޖަމާކުރެއްވުމަކީ ސަރުކާރުގެ އަމާޒު ނޫން ކަމަށް ރައީސް ތަކުރާރުކޮށް ވިދާޅުވިއެވެ. އެ މަނިކުފާނު ވިދާޅުވީ އަތޮޅުތެރޭގައި ޔޫތް ހަބްތައް ޤާއިމުކުރުމަށް ބޭނުންވާ ފައިސާ މިހާރު ދޫކުރައްވާފައިވާ ކަމަށެވެ.

"މިއީ ފެށުމެއް. ހަމައެކަނި މާލެއަކު ނޫން. މާލެ އާއި ހުޅުމާލެގެ އިތުރުން އަތޮޅުތެރޭގައި ވެސް ޔޫތްހަބްތައް ހެދުމަށްޓަކާ، އެއްބަސްވުންތައް އެކުލަވާލާ، އެކަމަށް ބޭނުންވާ ފައިސާ ދީފައިވާނީ." ރައީސް މުއިއްޒު ވިދާޅުވިއެވެ.

މި ހުރިހާ މަޝްރޫޢުތަކަކީ ހަށިހެޔޮ ދުޅަހެޔޮ ޒުވާން ޖީލެއް ބިނާކުރެއްވުމަށް ސަރުކާރުން ދެއްވާ އިސްކަމުގެ ހެތްކެއް ކަމަށް ރައީސް ސިފަކުރެއްވިއެވެ. މި މަޝްރޫޢުތައް ޝެޑިއުލާ އެއްގޮތަށް ނިމޭ ނަމަ ކުރިއަށް އޮތް ދެ އަހަރެއްހާ ދުވަހުގެ ތެރޭގައި ރާއްޖޭގެ ކުޅިވަރު ދާއިރާގެ ޢުމްރާނީ ވަސީލަތްތަކަށް ފާހަގަކޮށްލެވޭ ބޮޑު ބަދަލެއް އަންނާނެއެވެ.