ފެންނަނީ ބޮޑުތަނުން ސަރުކާރަށް ނޫނެކޭ ބުނާތަން: އެމްޑީޕީ

މާދަމާ ބާއްވާ އިންތިޚާބުތަކުގައި ރައްޔިތުން މި ސަރުކާރަށް "ބޮޑުތަނުން ނޫނެކޭ" ބުނާނެ މަންޒަރު ފެންނަމުންދާ ކަމަށް އިދިކޮޅު އެމްޑީޕީން ބުނެފިއެވެ.

ރިފަރެންޑަމް އާއި ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގެ ކެންޕެއިން ނިންމާލުމަށް އެމްޑީޕީންވެސް ވަނީ މާލޭގައި ހާއްސަ ރެލީއެއް ބާއްވާފައެވެ.

މި ރެލީގައި ވާހަކަދައްކަވަމުން އެމްޑީޕީގެ އިސް ލީޑަރު އަދި ކުރީގެ ރައީސް އިބްރާހިމް މުޙައްމަދު ޞާލިޙް ވަނީ އެމްޑީޕީގެ މެންބަރުންނަށް ވޯޓު ލުމަށް ހުރަސް އެޅުމަށް ފްލައިޓްތަކަށް ބަދަލު ގެނެސް ސަރުކާރުން ފިއްތުންތައް ކުރިމަތިކުރުވަމުންދާ ކަމަށް ވިދާޅުވެފައެވެ. އަދި އެފަދައިން ކަން ކުރަނީ، އިންތިޚާބުތަކުގައި ސަރުކާރު ބަލިވާނެ ގަބޫލުލޮށްފައިވާތީ ކަމަށްވެސް ވިދާޅުވިއެވެ.

މި ރެލީގައި ވާހަކަދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ، މި ސަރުކާރުން ރައްޔިތުންނަށް ފޯރުކޮށްދޭންޖެހޭ އަސާސީ ޚިދުމަތްތައް، ޚާއްޞަކޮށް ބޭސްފަރުވާގެ ކަންކަމުގައި އިންތިހާއަށް އިހުމާލުވެފައިވާ ކަމަށެވެ. އެހެންކަމުން، ސަރުކާރުގެ އަމަލުތަކާ ގުޅިގެން ރައްޔިތުން ބަދަލަކަށް ބޭނުންވެފައިވާ މަންޒަރު މުޅި ރާއްޖެއިން ފެންނަމުންދާ ކަމަށާ ކުރިއަށް އޮތް އިންތިޚާބުގައި އެމްޑީޕީގެ ކެންޑިޑޭޓުން ހޮވަން ރައްޔިތުން ތިބީ ކެތްމަދުވެފައި ކަމަށެވެ.

"ފުރިހަަމަ ސިއްހަތެއްގައި ބޭތިއްބުމަކީ ރާއްޖޭގެ ރައީސުލްޖުމްހޫރިއްޔާގެ ވަރަށް ބޮޑު ޒިންމާއެއް. އެހެންނަމަވެސް ބޭހެއް ނުލިބޭ، އާސަންދައެއް ނުލިބޭ، އެންސްޕާއެއް ނުލިބޭ. މިއިން ޒަމާނެއްގައި ނިކަމެތި ނުވާ މިންވަރަށް ރައްޔިތުން ނިކަމެތިވެއްޖެ،" އާޒިމް ވިދާޅުވިއެވެ.

މީގެ އިތުރުން، އެމްޑީޕީގެ ކުރީގެ ޗެއާޕާސަން ފައްޔާޒު އިސްމާޢީލްވެސް ވަނީ މި އިންތިޚާބުގައި ރައްޔިތުން ސަރުކާރަށް ބޮޑުތަނުން "ނޫނެކޭ" ބުނާނެ ކަމަށާ ރާއްޖޭގެ ހުރިހާ ރަށަކުންވެސް ފެންނަނީ ސަރުކާރާމެދު ރައްޔިތުން ހިތްހަމަނުޖެހިފައިވާ މަންޒަރު ކަމަށް ވިދާޅުވެފައެވެ.

އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާ ވަނީ، ގައުމަށް ހެޔޮ ބަދަލެއް ގެނައުމަށްޓަކައި "ތިލަފަތަށް" ވޯޓު ދިނުމަށް އެދިލައްވާފައެވެ. އަދި މި އިންތިޚާބަކީ ގައުމުގައި ހިނގަމުންދާ ބޭއިންސާފާ ދެކޮޅަށް ރައްޔިތުންގެ ބަސް އިއްވައި، "ނޫނެކޭ" ބުނުމަށް ލިބޭ ރަނގަޅު ފުރުސަތެއްގެ ގޮތުގައި އޭނާ ސިފަކުރެއްވިއެވެ.