ހިޔާގައި އިތުރު ލިފްޓް ހަރުކުރުމަށް 18 މިލިއަން ޑޮލަރު ހަރަދުވޭ: ފަޒުލް

ހިޔާ ޓަވަރުގައި ލިފްޓް ހަރުކުރުމަށް 18 މިލިއަން ޑޮލަރު ހަރަދުވާކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރުި ފަޒުލް ރަޝީދު ވިދާޅުވެއްޖެއެވެ.

ރައްޔިތުން މަޖިލީހުގެ މާލިއްޔަތު ކޮމިޓީގައި މިއަދު މެމްބަރަކު ކުރިމަތިކުރުވި ސުވާލަކަށް ޖަވާބުދެއްވަމުން ފަޒުލް ވިދާޅުވީ، ހިޔާގެ ހުރިހާ ޓަވަރެއްގައި އިތުރަށް ހަރުކުރަންޖެހޭ ލިފްޓްތަކަށް 18 މިލިއަން ޑޮލަރު ހަރަދުވާކަމަށެވެ. އެއީ ދިވެހި ފައިސާއިން ބަލާނަމަ، 277.5 މިލިއަން ރުފިޔާއެވެ. ފަޒުލް ވިދާޅުވީ ހިޔާގައި 16 ޓަވަރު ހިމެނޭއިރު، ޖުމްލަ 32 ލިފްޓް ހަރުކުރުމަށް ނިންމާފައިވާކަމަށެވެ.

ހިޔާގެ ކޮންމެ ޓަވަރެއްގައި އިތުރަށް 2 ލިފްޓް ހަރުކުރުމަކީ އަދުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދެކެވެ. ހިޔާގައި ލިފްޓް ހަރުކުރުމުގެ އަމަލީ މަސައްކަތް ފަށައިގެން ކުރިއަށްދާއިރު، އިތުރުކުރެވޭ ދެ ލިފްޓްގެ ތެރެއިން އެއް ލިފްޓަކީ ސްޓްރެޗަރު އެރުވޭނެ ވަރުގެ ލިފްޓެއްކެވެ. ލިފްޓް ހަރުކުރުމުގެ މަސައްކަތް އެޗްޑީސީން ހަވާލުކޮށްފައިވަނީ، ޝެންޔަންގް ޔުއާންޑ އިންޓެލެކްޗުއަލް ގުރޫއްޕާއެވެ. އެ މަސައްކަތް ފަށާފައިވަނީ މިއަހަރުގެ ފެބުރުއަރީމަހުގެ 14 ވަނަ ދުވަހުއެވެ.

ހިޔާގައި އިތުރު ލިފްޓް ހަރުކުރުމަށް ކުރިއަށްގެންދާ މަޝްރޫއު އަކީ ހިޔާ ފްލެޓްތަކުގައި ދިރިއުޅެމުންދާ ފަރާތްތަކަށް ލިފްލެޓްގެ ދަތިކަން ދިމާވާތީ އެކަމަށް ހައްލެއް ގެނައުމަށް ކުރިއަށް ގެންދެވޭ މަޝްރޫއެކެވެ. އަދި މި ލިފްޓުތައް ގާއިމްކުރުމުން ލިފްޓަށް އެރުމަށް އޮންނަ ކިއޫ ކުޑަވެ، ލިފްޓް ގެ އިންތިޒާރުގައި ހޭދަކުރަންޖެހޭ ވަގުތު ކުޑަވެގެންދާނޭކަމަށް އެޗްޑީސީން އުއްމީދުކުރެއެވެ.