ސިޓީ ޝަކުވާތަކުން ބަލާނީ ތިންވަނަ ފަރާތަކުން ހުށައަޅާފައިވާ ޝަކުވާ އެކަނި

އީމެއިލް ޒަރިއްޔާ އިންނާއި ސިޓީ މެދުވެރިކޮށް ހުށައަޅާފައިވާ ޝަކުވާތަކުގެ ތެރެއިން މިނިސްޓްެރީން ހަމައެކަނި ބަލާނީ ލިސްޓްގައިވާ މީހުންނާއި ގުޅިގެން ތިންވަނަ ފަރާތަކުން ހުށައަޅާފައިވާ ޝަކުވާތައް ކަމަށް ހައުސިން މިނިސްޓްރީން ބުނެފި އެވެ.

ގެދޮރުވެރިޔާ ސްކީމްގެ ދަށުން އެމްޑީޕީ ސަރުކާރުން އެކުލަވާލި ފްލެޓް ލިސްޓް މުރާޖައާ ކުރުމަށްފަހު އަދުގެ ސަރުކާރުން އެ ލިސްޓް އާއްމުކޮށްފައިވަނީ، މިއަހަރުގެ ފެބުރުއަރީމަހުގެ 27 ވަނަ ދުވަހުއެވެ. ފްލެޓް ލިސްޓަށް ޝަކުވާ ހުށަހެޅުމަށް ފުރުސަތު އެންމެ ފުރަތަމަ ހުޅުވާލާފައިވަނީ، ހުސްވި މާޗްމަހުގެ އެއްވަނަ ދުވަހެވެ. އޭގެފަހުން ދެވަނަ ފަހަރަށް ޝަކުވާ ހުށަހެޅުމުގެ މުއްދަތު އިތުރުކޮށްފައިވަނީ، އިއްޔެގެ ނިޔަލަށެވެ.

އެ މިނިސްޓްރީން ބުނީ ޝަކުވާގެ ގޮތުގައި އެ ވުޒާރާއިން ކަނޑައަޅާފައިވާ އީމެއިލްއަށް 2,840 ޝަކުވާ ލިބިފައިވާ ކަމަށާ މިނިސްޓްރީއަށް އެޑްރެސްކޮށް 526 ސިޓީ ހުށައަޅާފައިވާ ކަމަށެވެ. އަދި ބުނީ އީމެއިލް ޒަރިއްޔާ އިންނާއި ސިޓީ މެދުވެރިކޮށް ހުށައަޅާފައިވާ ޝަކުވާތަކުގެ ތެރެއިން މިނިސްޓްެރީން ހަމައެކަނި ބަލާނީ ލިސްޓްގައިވާ މީހުންނާއި ގުޅިގެން ތިންވަނަ ފަރާތަކުން ހުށައަޅާފައިވާ ޝަކުވާތައް ކަމަށް ވެސް އެ ވުޒާރާ އިން ބުންޏެވެ.

އެ މިނިސްޓްރީން މިރޭ ނެރުނު ބަޔާނެއްގައި ބުނެފައި ވަނީ ސްކީމަށް ފޯމް ހުށައެޅި މީހުން, ޕޯޓަލް މެދުވެރިކޮށް 4,625 ޝަކުވާ ހުށައަޅާފައިވާ ކަމަށެވެ. މީގެ ތެރެއިން މިނިސްޓްރީން ސައްހަކަން ކަށަވަރު ކުރެވުނު 4000 ފްލެޓް ލިބޭ މީހުންގެ ލިސްޓްގައި ހިމެނޭ 2,555 އެޕްލިކަންޓުން ޝަކުވާ ހުށައަޅާފައިވާ ކަމަށެވެ. ކޮންމެ އެލްޕިކަންޓަކަށް އެއް ޝަކުވާއަށް ވުރެ ގިނަ ޝަކުވާ ހުށައަޅަން ފުރުސަތު ދީފައިވާ ކަމަށާ އެގޮތަށް ދިން ފުރުސަތާ އެކު ޖުމްލަ 5,236 ޝަކުވާ ލިބިފައިވާ ކަމަށެވެ.