ސައިކަލުގައި ތިބީ 16 އަހަރު ކުއްޖަކާ 17 އަހަރުގެ ކުއްޖެއް، ނިޔާވީ އަޝްފާ ތޭރަގެ ދަރިފުޅު

މިރޭ ހިނގި ނުރައްކާތެރި އެކްސިޑެންޓް ގައި ނިޔާވީ މަޝްހޫރު ލަވަކިޔުންތެރިން ކަމަށްވާ މުހައްމަދު އަބްދުލްޣަނީއާ މަރިޔަމް އަޝްފާގެ ދަރިފުޅު އަލްސަން ކަމަށް އެނގިއްޖެ އެވެ.

އެކްސިޑެންޓް ހިނގީ މާފަންނު ބަސް ޓާމިނަލް ކައިރީގަ އެވެ. އެކްސިޑެންޓްވީ ކާރު ސްޕީޑްގައި ދުއްވާފައި އައި ސައިކަލަކުން މަގު ހުރަސްކުރި މީހެއްގެ ގައިގައި ޖެހިގެންނެވެ. ޕިކަޕެއްގައި ވެސް ޖެހުނެވެ.

އެ މީހާ ގައިގައި ޖެހުނީ ކަފިހި ހުރަހުން މަގު ހުރަސް ކުރަނިކޮށެވެ.

އެކްސިޑެންޓްގައި ތިން މީހަކަށް އަނިޔާވި އެވެ. އެ މީހުންނަށް ފަރުވާ ދެމުން ދަނީ އައިޖީއެމްއެޗް ގަ އެވެ. އެއީ 16 އަހަރުގެ ކުއްޖަކާ 17 އަހަރުގެ ކުއްޖަކާ 40 އަހަރުގެ މީހެކެވެ.

އޭގެ ތެރެއިން އެއް ކުއްޖަކު ވަނީ މަރުވެފަ އެވެ. އެއީ 17 އަހަރުގެ ކުއްޖެކެވެ. އެއީ މަޝްހޫރު ލަވަކިޔުންތެރިން ކަމަށްވާ މުހައްމަދު އަބްދުލްޣަނީއާ މަރިޔަމް އަޝްފާގެ ދަރިފުޅު އަލްސަން އެވެ. މޭ 7 ގައި 17 އަހަރު ފުރުނު އަލްސަން ނިޔާވީ ފަރުވާ ދެމުން ދަނިކޮށެވެ.