ހުޅުމާލެ ޓާމިނަލުން މުދާ ދޫކުރުމަށް އެމްޕީއަލުން އިލެކްޓޯނިކް ވެހިކަލް ކިޔުއެއް ގާއިމްކުރަނީ

ހުޅުމާލެ ޓާމިނަލުން މުދާ ދޫކުރުމުގެ ކަންކަން ހަރުދަނާގޮތެއްގައި ކުރިއަށްގެންދިއުމުގެ ގޮތުން މޯލްޑިވްސް ޕޯޓްސް ލިމިޓެޑް، އެމްޕީއެލުން އިލެކްޓޯނިކް ވެހިކަލް ކިޔުއެއް ގާއިމްކުރުމަށް ނިންމައިފިއެވެ.

މިކަމާ ގުޅޭގޮތުން އެމްޕީއެލުން ބުނެފައިވަނީ، ހުޅުމާލެ ޓާމިނަލްއިން މުދާ ދޫކުރަމުންދާ އުސޫލް މިހާރަށްވުރެ ހަރުދަނާކުރުމުގެ ގޮތުން، އިލެކްޓްރޯނިކް ވެހިކަލް ކިޔުއެއް ގާއިމްކުރުމަށް މަސައްކަތްކުރަމުންދާކަމަށެވެ. އެގޮތުން އެމްޕީއެލްއިން ނިންމާފައިވަނީ މިހިނގާ ސެޕްޓެމްބަރުމަހުގެ 21 ވަނަ ދުވަހުން ފެށިގެން މި ކިއު ލައިވްކޮށް، ބޭނުންކުރުމަށް ކަމަށެވެ.

މި ކިއު ތައާރަފްވުމާއެކު، ހުޅުމާލެ ޓާމިނަލްއިން މުދާ ކްލިއަރކުރެވޭނީ މި ކިޔުގެ ތެރެއިން ކަމަށް އެމްޕީއެލުން ބުންޏެވެ. އަދި  މިބަދަލާއެކު ހުޅުމާލެ ޓާމިނަލް އިން މުދާ ކްލިއަރ ކުރުން އަވަސްވެ، އާންމުނަށް ދެވޭ ޚިދުމަތަށް އިތުރަށް އަވަސް ވެގެންދާނޭކަމަށް އެކުންފުނިން ވަނީ ބުނެފައެވެ.

އެމްޕީއެލުން ވަނީ މި ކިއުގައި ބައިވެރިވުމަށް އެ ކުންފުނީގެ ވެބަސައިޓުން ފޯމް ޑައުންލޯޑުކޮށް ފުރުމަށްފަހު އޮފީހަށް ހުށަހެޅުމަށް އެދިފައެވެ. މެއިލް މެދުވެރިކޮށް ފޮނުވާނަމަ ( [email protected] ) ނުވަތަ ހުޅުމާލޭ ފައިނޭންސް ކައުންޓަރ އަށް ހުށަހެޅުމަށް އެމްޕީއެލުން ވަނީ އެދިފައެވެ. އެމްޕީއެލުން ބުނީ ކިއުގައި ބައިވެރިކުރުމަށް ބަލާނެ މިންގަނޑުތައްވެސް ހާމަކޮށްފައެވެ.