ސިޔާސީ ވިސްނުން ދޫކޮށްލުމަށްފަހު ގައުމީ ތަރައްގީގެ ޕްލޭންގައި ބައިވެރިވުމަށް ރައީސް ޑރ.މުޢިއްޒު އެދިވަޑައިގެންފި

ސިޔާސީ ވިސްނުން ދޫކޮށްލުމަށްފަހު ރާއްޖޭގެ 20 އަހަރުގެ ގައުމީ ޕްލޭންގައި ބައިވެރިވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެދިވަޑައިގެންފިއެވެ.

ކުރިއަށް އޮތް 20 އަހަރުގެ ގައުމީ ތަރައްގީގެ ޕްލޭން އިފްތިތާހްކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، މިއަދު ފެށިގެންދާ މަސައްކަތް ރާއްޖޭގެ ހުރިހާ ރަށެއްގައި ކުރިއަށް ގެންދާނެކަމަށެވެ.

ކޮންމެ ރަށެއްވެސް މި ޕްލޭންގައި ތަމްސީލު ކުރަންޖެހޭނެ ކަމަށާއި، އެހެން ހުރިހާ ދާއިރާއަކުންވެސް މިފަދައިން އަމަލުކުރަން ޖެހޭނެކަން ފާހަގަކުރައްވާ ރައީސް ޑރ.މުޢިއްޒު ވަނީ ސިޔާސީ ޕާޓީތަކުންވެސް މި ޕްލޭންގައި ބައިވެރިވެވަޑައިގަތުމަށް ގޮވާލައްވާފައެވެ.

"އަޅުގަނޑު އެދެން ހުރިހާ ސިޔާސީ ޕާޓީތައްވެސް ސިޔާސީ ވިސްނުން ދޫކޮށްލާފައި، މިއީ ގައުމީ މަސައްކަތެއް. ގައުމީ ތަރައްގީގެ ވާހަކަ މިދައްކަނީ،"

ރައީސް ޑރ.މުޢިއްޒު ވިދާޅުވިއެވެ.

މި ޕްލޭން އެކުލަވާލާފައިވާ 20 އަހަރަކީ ޖީލެއް ކަމަށާއި، ޖީލެއްގެ ތަސައްވުރު ކަނޑައަޅަން އުޅޭއިރު މިއީ ސިޔާސީ ކަމެއް ނޫންކަމަށް ރައީސް ޑރ.މުޢިއްޒު ވިދާޅުވިއެވެ.

އެހެންކަމުން، ރައީސް ޑރ.މުޢިއްޒު ވަނީ ހުރިހާ ސިޔާސީ ޕާޓީތަކާއި، މަދަނީ ޖަމިއްޔާތަކާއި، ރާއްޖޭގެ އެންމެހާ ފަރާތްތަކުން ބައިވެރިވެގެން މި ޕްލޭންގެ މަސައްކަތް ކުރުމަށް އެއްބާރުލުން ދިނުމަށް ރައީސް ޑރ.މުޢިއްޒު ވަނީ ތަކުރާރުކޮށް ގޮވާލައްވާފައެވެ.