ރައީސުލްޖުމްހޫރިއްޔާ ތ.އަތޮޅަށް ކުރެއްވި ދަތުރުފުޅު ނިންމަވާލައްވައިފި

ރާއްޖޭގެ ރައީސުލްޖުމުހޫރިއްޔާ ކަމުގެ މަޤާމާއި ހަވާލުވެ ވަޑައިގެންނެވުމަށް ފަހު ރައީސް ޑރ.މުހައްމަދު މުއިއްޒު ފުރަތަމަ ފަހަރަށް ރާއްޖޭގެ އަތޮޅުތަކަށް  ކުރައްވަން ފެއްޓެވި ދަތުރުފުޅުގެ ތެރެއިން 3 ދުވަހަށް ކޮޅުމަޑުލުގެ ބައެއް ރަށްރަށަށް ކުރެއްވި ދަތުރުފުޅު ނިންމަވާލެއްވުމަށް ފަހު މާލެ ވަޑައިގެންފިއެވެ.

ރައީސްގެ މި ދަތުރުފުޅުގައި އެމަނިކުފާނު ވަނީ ކޮޅުމަޑުލުގެ 10 ރަށަކަށް ވަޑައިގަންނަވާފައެވެ. އެގޮތުން  އެމަނިކުފާނު އެންމެ ފުރަތަމަ ވަޑައިގަންނަވާފައިވަނީ ރިޔާސީ އިންތިހާބުގައި އެމަނިކުފާނަށް އެންމެ ބޮޑު އަޤްލަބިއްޔަތެއް ހޯއްދަވައިދެއްވި ތ. ގުރައިދޫއަށެވެ. ދެން އެމަނިކުފާނު ވަޑައިގަންނަވާފައި ވަނީ ދިޔަމިގިއްޔަށާއި، މަޑިފުއްޓަށާއި، ވޭމަންޑޫއަށާއި، ބުރުންޏަށާއި، ކަނޑޫދޫއަށާއި، ވަންދޫއަށާއި، އޮމަދޫއަށާއި، ކިނބިދޫއަށާއި އަދި ގާދިއްފުށްޓަށެވެ.

ރައީސުލްޖުމުހޫރިއްޔާގެ މި ދަތުރުފުޅުގައި 10 ރަށަށް ވަޑައިގެންނެވި ނަމަވެސް ދަތުރުފުޅުގެ ތެރޭގައި އެމަނިކުފާނުވަނީ ތ. އަތޮޅު ކައުންސިލާއި ތ. ވިލުފުށީ ކައުންސިލާއި ހިރިލަންދޫ އަދި ތިމަރަފުށީ ކައުންސިލާއި އެރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ބައްދަލުކުރައްވައި މަޝްވަރާކުރައްވާފައެވެ.

ރައީސުލްޖުމުހޫރިއްޔާގެ މި ދަތުރުފުޅުގައި އެންމެ ބޮޑަށް ފާހަގަކުރެއްވި އެއްކަމަކީ ނިމިދިޔަ ރައީސް އިބުރާޙިމް މުޙައްމަދު ޞާލިހްގެ ވެރިކަމުގެ ފަސް އަހަރު ދުވަހުގެ ތެރޭގައި ތ.އަތޮޅުގެ ރަށްތައް ރާޑަރުން އެކަހެރި ކޮށްލައިފައި އޮތްއޮތުމަށް ނިމުން ގެނެސް ދެއްވާ، އެމަނިކުފާނުގެ ވެރިކަމުގައި ތ.އަތޮޅުގެ ރަށްތަކަށް ބޭނުންވާ އެންމެ ފުރިހަމަ ތަރައްޤީ ގެނައުމުގައި ބުރަކޮށް މަސައްކަތް ކުރައްވާނެކަމުގެ ޔަޤީންކަމެވެ.

"އިރާދަކުރެއްވިއްޔާ މި އަތޮޅަކީ ތަރައްގީގެ އެންމެ ކުރީ ސަފުގައި ފުރުސަތުތައް ލިބޭ، ތަރައްގީ ވެފައިހުރި ރަށްތަކެއް ހިމެނޭ އަތޮޅަކަށް ހަދައިދޭނަމޭ"

ކަނޑޫދޫގައި ދެއްކެވި ވާހަކަ ފުޅުގައި ރައީސް ޑރ.މުއިއްޒު ވިދާޅުވިއެވެ.

ރައީސް ޑރ. މުހައްމަދު މުއިއްޒުގެ މި ދަތުރުފުޅުގައި އެމަނިކުފާނާއި އެކު ސަރުކާރުގެ ތަފާތު ވުޒާރާތަކުގެ ވަޒީރުން ހިމެނިވަޑައި ގަންނަވާހެން މަތީފަންތީގެ ވަފުދެއް ބައިވެރިވެ ވަޑައިގެންނެވިއެވެ.