ރިސޯޓު ހަދަން ދޫކުރި ރަށްތަކުން 18672 ވަޒީފާ އުފެދިގެންދާނެ: އަލީ ވަހީދު

ރިސޯޓު ހަދަން އަލަށް ދޫކުރަން ނިންމި ރަށްތަކާއި ބިންތަކުގައި 1370 އެނދާއި 18672 ވަޒީފާ އުފެދިގެންދާނެ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ޓޫރިޒަމް މިނިސްޓްރީން "ބުރަބި"ގެ ނަމުގައި ރޭ ދަރުބާރުގޭގައި ބޭއްވި ޖަލްސާގައި ރިސޯޓުގެ ގޮތުގައި އަލަށް ދޫކުރި ރަށްތަކާއި ބިންތައް އިއުލާންކޮށްދެއްވައި ދެއްކެވި ވާހަކައިގައި މިނިސްޓަރު އަލީ ވަހީދު ވިދާޅުވީ، ސަރުކާރުން އަލަށް ނެރޭ ބިންތަކާއި ރަށްތަކުގައި އަންނަ އަހަރުގެ ފުރަތަމަ ހަ މަސް ދުވަސް ތެރޭގައި މަސައްކަތް ފެށޭވަރު ވާނެ ކަމަށެވެ.

މި ދައުރު ނިމޭއިރު އެތަންތަން ހުޅުވާނެކަން ފާހަގަކުރައްވައި އަލީ ވަހީދު ވިދާޅުވީ، ފަތުރުވެރިކަމަށް ސަރުކާރުން އަލަށް ދޫކުރަން ނިންމި ބިންތަކާއި ރަށްތަކުގައި 1370 އެނދާއި 18672 ވަޒީފާ އުފެދިގެންދާނެ ކަމަށް ލަފާ ކުރައްވާ ކަމަށެވެ.

އަލީ ވަހީދު ވިދާޅުވީ ބައެއް ރަށްރަށުގައި ހިމާޔަތް ކުރަންޖެހޭ ސަރަހައްދުތައް ހުރިކަމަށާއި، ރިސޯޓުގެ ގޮތުގައި އެ ރަށްތައް ތަރައްގީ ކުރާނީ އެ ތަންތަން ހިމާޔަތްކޮށް، ގެއްލުން ނުވާ ގޮތަށް ކަމަށެވެ.

އަލަށް ދޫކުރާ ރަށްތަކުގައި ރިސޯޓުތައް ތަރައްގީވެ ނިމޭއިރު، ރައީސް ސޯލިހުގެ ރިޔާސީ ވައުުދުފުޅާއި މެނިފެސްޓޯއާ އެއްގޮތަށް 2023 ވަނަ އަހަރު ކުރީކޮޅު 35،000 ޓޫރިސްޓު އެނދު ގެނެވޭނެ ކަމަށް އަލީ ވަހީދު ވިދާޅުވިއެވެ.

މިސަރުކާރުން ފަތުރުވެރިކަމަށް ދޫކުރާ ރަށްތައް އިއުލާން ކުރި އިރު، މިރޭ ހަތް ބިމަކާއި 28 ރަށެއް ފަތުރުވެރިކަމަށް އަލަށް ހުޅުވާލަން ވަނީ ނިންމާފައެވެ.