ބިބީގެ އެންމެ ފަހު ޝޯތައް މިމަހުގެ، 19 އަދި 20 ވަނަ ދުވަހުގެ ރޭ އޮލިމްޕަހުގައި

ބިރުވެރި/މަޖާ ފިލްމް "ބިބީ" ގެ ވަދާއީ ޝޯތައް މިމަހުގެ 19 އަދި 20 ވަނަ ދުވަހުގެ ރޭ އޮލިމްޕަހުގައި ދެއްކުމަށް ތައްޔާުވެއްޖެއެވެ.

އޮލިމްޕަހުގައި ބިބީ ޕްރިމިއާކޮށްފައިވަނީ އޮކްޓޯބަރުމަހުގެ 7 ވަނަ ދުވަހުއެވެ. ބިބީގެ ޝޯތައް އޮލިމްޕަހުގައި އޮކްޓޯބަރުމަހުގެ 20 ވަނަ ދުވަހުގެ ރެއާ ހަމަޔަށް ކާމިޔާބުކަމާއެކު ކުރިއަށް ގެންގޮސްފައިވާއިރު، އެންމެފަހުން އޮލިމްޕަހުން ޖާގަ ނުލިބިގެން ޝޯތައް ދެއްކުން ވަނީ މެދުކަނޑާލާފައެވެ. މި ފިލްމު އޮލިމްޕަހުން ނެދި ނަމަވެސް ޔޫރަޕްގެ ބައެއް ޤައުމުތަކުގައި އުޅޭ ދިވެހިންނަށް ފިލްމު ބަލާލުމުގެ ފުރުސަތު ޑާކުރެއިނުން ވަނީ ފަހިކޮށްދީފައެވެ.

ވޮއިސްއާ ވާހަކަދައްކަމުން ބިބީގެ ޕްރޮޑަކްޝަން ހައުސްގެ ވެރިޔާ އަދި ޕްރޮޑިއުސަރު، މުހައްމަދު އަލީ (މޮގަ) ބުނީ، މި ފިލްމުގެ އެންމެ ފަހު ދެ ޝޯ މިމަހުގެ 19 ވާ ބްރާސްފަތި އަދި ޖެހިގެން އަންނަ ހުކުރުދުވަހުގެ ރޭ އޮލިމްޕަހުގައި ދެއްކުމަށް ނިންމާފައިވާކަމަށެވެ.

ބިބީގެ މި ދެ ޝޯގެ ޓިކެޓް އޮލިމްޕަހުން މިހާރު ވިއްކަމުންދާއިރު، ޑާކްރެއިނުން ވަނީ އޮލިމްޕަހަށް ނުގޮސްވެސް ޓިކެޓް ގަނެވޭނޭ އިންތިޒާމް ހަމަޖައްސާފައެވެ. "ބިބީ" ގެ ހޮޓްލައިން ނަމްބަރު 9911229 އަށް ވައިބާ /ވަޓްސްއަޕް މެދުވެރިކޮށް މެސެޖް ކޮށްލުމުން ބޭނުންވާ ޝީޓެއް ޓިކެޓް ނެގުމަށް، އޮންލައިނުކޮށް ޓިކެޓަށް ފައިސާ ދައްކާލެވޭނެއެވެ.

ބިބީ އަށް ބެލުންތެރިންގެ ބޮޑު ތަރުހީބެއް ލިބިފައިވާއިރު، ރިވިއުތަކުން ފެންނަގޮތުގައި ބެލުންތެރިން ވަނީ މި ފިލްމް ވަރަށްބޮޑަށް ބަލައިގަނެފައެވެ. ބެލުންތެރިން ބިބީއަކީ ދިވެހި ސިނަމާގައި ދައްކަންފެށި ހެއްވާ މަޖާ މި ޖޯންރާގެ ފުރަތަމަ ދިވެހި ފިލްމެވެ.

ފިލްމުގެ މެއިން ކާސްޓުންގެ ގޮތުގައި ފެނިގެން ގޮސްފައިވަނީ، އެކްޓަރު ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ. މި ފިލްމުން ތަޖުރިބާކާރު ފިލްމީތަރި ޝީލާ ނަޖީބުގެ އިތުރުން އިތުރު ތައާރަފަކަށް ބޭނުންނުވާ، އަހުމަދު ސައީދު، މަލީހާ ރަޒާން ރާމިޒުވެސް ފެނިގެންދިޔައެވެ. އަދި ހާއްސަ ފެނިލުމެއްގެ ގޮތުން ދިވެހި އެތައް ފިލްމަކުން ފެނިގެންދިޔަ ކުޅަދާނަ އެކްޓަރު އިސްމާއީލް ވަޖީހުވެސް މި ފިލްމުން ފެނިގެންދިޔައެވެ.